2 Samuẹl 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ A da ta kẹ Joab, Nighere, ovie ra viẹ ode rhe muomahọ kẹ Absalọm.

² Kọye ephiokparobọ rẹ ẹdẹ yena o de hirhe omamuohọ vwọ kẹ ihwo na ejobi kidie ihwo na nyori vwẹ ẹdẹ na nẹ, Ovie muomahọ kẹ ọmọ rọye.

³ Ihwo na da bẹbẹ yan ro orho ẹdẹ yena vẹ omẹvuọ kerẹ ihwo ra djẹ nẹ ofovwi rhe.

⁴ Ovie de rhurhu opharo rọye, ovie da viẹ vẹ urhuru rọ ganre, E ọmọ mẹ Absalọm, E Absalọm, ọmọ mẹ ọmọ mẹ.

⁵ Etiyin Joab da ro uwevwi bru ovie ra ọ da ta, Wọ vwẹ omẹvuọ rhurhu epharo rẹ idibo wẹn vwẹ ẹdẹ ri nonẹ, re sivwi we, vẹ emọ wẹn rẹ eshare kugbe ere emetẹ, vẹ eya wẹn kugbe esen wẹn

⁶ kidie wo vwo ivuavwerhe kẹ ivwighrẹ wẹn wo de rhe vwo ivuemiovwo kẹ igbeyan wẹn, kidie wọ je ghwa vwọ phia nonẹ nẹ inotu wẹn vẹ idibo wẹ fiemuọvo kẹ wẹ-ẹn; fikiridie me riẹnre nonẹ nẹ ọ dianẹ Absalọm herọ, avwanre de ghwu nonẹ, manẹ oma ka vwerhe owẹ.

⁷ Fiki rẹ ọtiọye na vrẹn asakiephana wọ yanran, wọ ta ota rẹ uchebro vwọ kẹ idibo wẹn; kidie me vwẹ Ọrovwohwo duvwu iyori nẹ, wọ rha ra-a, ohwo ọvuọvo ro che chekọ kẹ wẹ vwẹ etinẹ ason nana herọ-ọ. Ọnana kọye ma bra kẹ wẹ nọ emu re phia kẹ wẹ nẹ ọke emọ wẹn rhe ri te ọke na.

⁸ Etiyin ovie de vrẹn o de tidia anurhoro. A da ta kẹ ihwo ejobi nẹ, Nighere, ovie tidia anurhoro ihwo na ejobi da rhe obaro rẹ ovie. Kidie Izrẹl ejobi dohwo duwevwi rọye djẹ ra.

Devid hirhe kpo Jerusalẹm

⁹ Ihwo na ejobi rẹ orua rẹ Izrẹl na de rhi vwo oseghe kẹ ayen ra, Ovie sivwi avwanre nẹ obọ rẹ ivwighrẹ rẹ avwanre, o de si avwanre nẹ obọ rẹ ihwo ri Filistia; Asakiephana ọ djẹ nẹ otọ na vwọ kẹ Absalọm.

¹⁰ Ẹkẹvuọvo Absalọm re ma vwọ re oviẹ vwẹ enu rẹ avwanre, o ghwuru vwẹ ofovwi asakiephana fiki rẹ ọtiọye na, kidie ma rha jẹn iroro rẹ obo ra vwọ reyọ hirhe-e?

¹¹ Ovie Devid de ji ohwo re se Zadọk vẹ Abiata rẹ irherẹn nẹ, Ta ota kẹ ekpako ri Juda, Mavọ okrite rẹ ovwan ke reyọ ovie rhivwi kpo uwevwi rọye, jẹn ovuẹ rẹ Izrẹl ejobi re ovie obọ nure?

¹² Ovwan ejobi imoni mẹ, ovwan ubeku mẹ vẹ uvwo mẹ; die we vwo kruko wa ke reyọ ovie rhivwi?

¹³ Gbe je ta kẹ Amasa, Wọ dia ubeku mẹ, kugbe uvwo mẹ-ẹ? Jẹn Ọghẹnẹ ru etiọye vwẹ ọ ro je nọ ọtiọye re me gbe vwẹ owẹ ma ono vwẹ ẹdia ri Joab nẹ ọke na yanra-an.

¹⁴ O de phieghe ẹwẹn rẹ ihwo rẹ Juda ejobi kerẹ ẹwẹn rẹ ohwo ọvo; e de ji ohwo bru ovie Rhivwi te owẹ te idibo wẹn ejobi.

¹⁵ ovie de rhivwi rhe Jọdan; Juda da rhe Gilgal rhe vwa ovie, ayen da reyọ ovie wanvrẹn Jọdan.

¹⁶ Shimẹi rẹ ọmọ ri Gẹra rẹ ohwo ri Bẹnjamin ro nẹ Bahurim rhe, de broma nene ihwo ri Juda rhe ra vwa ovie Devid;

¹⁷ Ihwo uriori de nene nẹ uvwiẹ ri Bẹnjamin rhe. Kugbe Ziba rẹ odibo ri Sọl vẹ emọ rọye ihwiori kugbe idibo rọye uje de broma kpo Jọdan ra vwa ovie Devid;

¹⁸ Ayen da wan ushuame na vrẹn ra reyọ ovie vẹ evwruwevwi rọye rhe, ayen de ru obo ri fori vwọ kẹ; Shimẹi ọmọ ri Gera de she diguẹ vwẹ obaro rẹ ovie ọke rọ cha vwọ shariẹ Jọdan vrẹn

¹⁹ Etiyin ọ da ta kẹ ovie, Ẹjo ọrovwovwe brorhiẹ hwe vwe-e, yẹrẹ karophihọ obo re chọre rẹ odibo wẹn ruru vwẹ ẹdẹ rẹ ọrovwovwe vwo nẹ Jerusalẹm rhe-e; e jẹn ọrovwovwe ovie karophihọ-ọ.

²⁰ Kidie odibo wẹn riẹnre nẹ mi ru umwemwu; fiki rẹ ọtiọye na nighere, me rhere vwẹ ẹdẹ ri nonẹ, ohwo rẹ ẹsosuọ vwẹ uwevwi ri Josẹf rọ rhe vwa ọrovwovwe ovie.

²¹ Abishai rẹ ọmọ ri Zeruiah da kpahe, E gbi hwe Shimẹi vwi fiki rẹ ọnana, kidie ọ harhe ohwo rẹ Ọrovwohwo vwo mu?

²² Ẹkẹvuọvo Devid da ta, Die Me vẹ ovwan gbi ru ovwan emọ ri Zeruiah rẹ ovwan vwọ dia ukọn kẹ vwẹ vwẹ ẹdẹ ri nonẹ? A sa teyọ ohwo hwe vwẹ Izrẹl nonẹ? Kidie me jẹn riẹn nẹ mẹvwẹ ovie rẹ Izrẹl nonẹ-ẹ?

²³ Ovie da ta kẹ Shimẹi, Wo ghwu-u. Ovie da kpa okpa kẹ.

²⁴ Mefiboshẹt rẹ ọmọ ri Sọl de bru ovie rhe. ọ hworhẹ owọ rọye yẹrẹ ọ wanre ẹtoegba rọye-e, ọ je fọnrhọ amwa rọye-e, nẹ ọke rẹ ovie vwo nẹ uwevwi yanran re te ọke ro vwo rhivwi rhe egbẹrhẹnẹdẹ.

²⁵ Ọke ro vwo nẹ Jerusalẹm rhe rhe vwa ovie, ovie da ta kẹ, Die sorọ wo gbi nene uvwe ra-a Mefiboshẹt?

²⁶ Ọ da kpahe, E ovie ọrovwovwe, odibo mẹ phiẹn vwẹ; kidie odibo wẹn ta kẹ vwẹ ufi mu unu rẹ ekẹtẹkẹtẹ na kẹ vwẹ, re me gua nene ovie; Fikiridie odibo wẹn ukpono.

²⁷ Ọ rhi mu odibo wẹn mwemwerhe kẹ ọrovwovwe ovie. Ẹkẹvuọvo ọrovwovwe ovie họhọ amakashe rẹ Ọghẹnẹ; ru obo ri fori ru wo ru asakiephana.

²⁸ Fiki rẹ evwruwevwi rẹ ọsẹ mẹ ejobi pha kerẹ ihwo re brorhiẹ rẹ ughwu hwe vwẹ obaro rẹ ọrovwovwe ovie, ẹkẹvuọvo wo ru odibo wẹn nẹ o nene uwe re emu vwẹ imẹjẹ wẹn. Didi ogangan ọfa mi rhe vwo, mi vwo kperi se ovie;

²⁹ Ovie da ta kẹ, Die wo rhe vwo gbe ikun rẹ oma wẹn kẹ vwẹ? Me tare nẹ wọ vẹ Ziba ghare otọ na.

³⁰ Mefiboshẹt da ta kẹ ovie, E, e jọ reyọ ayen ejobi kidie ọrovwovwe ovie guakẹ rhivwi rhe uwevwi rọye, vẹ egbẹrhẹnẹdẹ nure.

³¹ Etiyin Barzillai ti Gilead o de nẹ Rogelim rhe; o de nene ovie kpo Jọdan, rere o vwo suo ovie vrẹn Jọdan.

³² Barzillai ghwọrọ gangan, ohwo rẹ ẹgbukpe ujọne; o de kru emuọre rhe ovie, ọke rọ vwọ dia Mahanaim; kidie oferi gangan.

³³ Ovie da ta kẹ Barzillai; Vrẹn bru vwe rhe, ke me ghẹrẹ owẹ vwi Jerusalẹm.

³⁴ Ẹkẹvuọvo Barzillai da ta kẹ ovie, Bro ukpe me je cha tọn te, ri mi vwo nene uwe kpo Jerusalẹm?

³⁵ Mẹvwẹ ohwo rẹ ẹgbukpe ujọne; mi ji se vughe emuesiri vẹ ọbrabra? Kẹ odibo wẹn je riẹn avwerhe rẹ obo rọ ria yẹrẹ obo rọ da? Ke me je sa kerhọn rẹ urhuru rẹ une rẹ eshare vẹ ere eya? Die odibo wẹn vwọ rhoma dia oghwa vwọ kẹ ọrovwovwe ovie?

³⁶ Odibo wẹn sun we emerha wanvrẹn urhie ri Jọdan. Die ovie vwọ vwẹ ọyena kpẹvwẹ ovwẹ?

³⁷ Biko gbe jẹ odibo wẹn rhivwi, re mi ghwu phihọ orho mẹ, vwẹ oma rẹ ushi rẹ ọsẹ mẹ vẹ ọ rẹ oni mẹ. Ẹkẹvuọvo odibo wẹn Chimham na jo nene ọrovwovwe ovie yanran; ru kẹ obo ri je we.

³⁸ Ovie da kpahe, Chimham nene uvwe kpo oboyi, ki mi ru kẹ kirobo ri je we, obo wọ guọnọre kọye mi ru kẹ wẹ.

³⁹ Kẹsiẹye ihwo na ejobi ke shariẹ urhie na, ovie da shariẹ; ovie da fiọnfiọn Barzillai unu ọ da vwẹ ẹrhovwo kẹ o de rhivwi kpo uwevwi rọye.

⁴⁰ Ovie de kpo Gilgal, Chimham de nene; ihwo ri Juda ejobi vẹ ihwivẹ rẹ Izrẹl de nene ovie vwẹ idjerhe.

⁴¹ Etiyin ihwo rẹ Izrẹl ejobi de bru ovie rhe, ayen da ta kẹ ovie, Die sorọ imoni rẹ avwanre ri Juda vwo cho we yanran; ayen da rha vwẹ ovie vẹ evwruwevwi rọye shariẹ Jọdan vẹ ihwo ri Devid ọvo?

⁴² Ihwo ri Juda ejobi da kpahe kẹ ihwo rẹ Izrẹl. Fiki rẹ avwanre re kerẹ ovie vwẹ omoni. Die ophu rẹ ota nana rhe vwo mu ovwan? We rori nẹ ovie re ghẹrẹ avwanre? Gbenẹ o rhe ru ẹse kẹ avwanre?

⁴³ Ihwo rẹ Izrẹl da kpahe kẹ ihwo ri Juda, Avwanre vwo ẹbẹre ihwe, vwẹ oma rẹ ovie, Me ji vwo oma ri Devid nọ ovwan. Ọ rhọ wa rha vwọ jẹn avwanre fia? Ọ dia avwanre re ka ta nẹ vwẹ ovie rhivwi rhe? Ẹkẹvuọvo ota rẹ ihwo ri Juda da gan nọ ota rẹ ihwo rẹ Izrẹl.