2 Samuẹl 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọke ri Devid vwọ wan enu rẹ ugbenu na vrẹn nu emerha, Ziba rẹ odibo ri Mefiboshẹt da vwa, vẹ ekẹtẹkẹtẹ ivẹ ra vwẹ ufi mu unu, vẹ oghwa rẹ ikara rọ ghware ikori uri, kugbe razin ujọri, kugbe emamọ rẹ ọke uvo ujori, kugbe ophiẹn ri wain.

² Ovie da ta kẹ Ziba, Die wọ vwọ vwẹ enana rhe? Ziba da ta, A vwẹ ekẹtẹkẹtẹ na vwo rhe ovie vẹ evwruwevwi rọye rere ayen gua; a vwẹ ikara na vẹ emamọ na vwo rhe imighene na re ayen re; wain na rha vwọ kẹ ihwo rẹ oyan bẹn vwẹ aghwa na re ayen da.

³ Ovie da nọ, Ọmọ rẹ onini wẹn rhọ? Ziba da ta kẹ ovie, Nighere ọ daji obi Jerusalẹm; kidie ọ tare nẹ, Nonẹ na uwevwi rẹ Izrẹl cha vwẹ uvie rẹ ọsẹ me hirhe rhe vwe.

⁴ Etiyin ovie da ta kẹ Ziba, Nighere, emu ri Mefiboshẹt vwori ejobi kẹ owẹ. Ziba da ta, me vware; gbe ju vwe mrẹ ẹroesiri vwẹ obaro wẹn, ọrovwovwe ovie.

⁵ Ọke rẹ Ovie Devid vwo te Bahurim, ohwo ọvo rẹ uwevwi ri Sọl da rhe vwa, e se odẹ rọye Shimẹi, ọmọ ri Gẹra; rọ vwọ cha na ọ yan jo duvwu iyori.

⁶ Ọ da vwẹ ikpokpo vwo phi Devid, ọ da je kua ikpokpo vwo phi idibo rẹ ovie Devid; te ihwo na ejobi kugbe ihwo na ejobi ri vwo ẹgba na da hẹ obọrhe vẹ obọhwẹre rọye.

⁷ Etiyin Shimei da ta jo duvwu iyori nẹ, Yanran, Yanran, wẹ ohwo rọ vọnre vẹ ọbara na, wẹ orharhe rẹ ohwo na.

⁸ Ọrovwohwo rhe re ihri rẹ ọbara rẹ uwevwi ri Sọl vwẹ obọ wẹn, ohwo re wọ re uvie vwẹ adia rọye na; Ọrovwohwo vwẹ uvie wẹn vwọ hẹ obọ rẹ ọmọ wẹn Absalọm. Nighere, oghwọrọ wọ epha na, wẹ ohwo rẹ ọbara na.

⁹ Etiyin Abishai rẹ ọmọ ri Zeruiah da ta kẹ ovie, Die orivwi rẹ eranko nana vwo duvwu iyori kẹ ọrovwovwe ovie? Ju vwe yanran ra nyavwe uyovwi rọye.

¹⁰ Ẹkẹvuọvo ovie da ta, Die me vẹ owẹ gbe ru ovwan emọ ri Zeruiah? Ọ da dianẹ o duvwu iyori jo duvwu kidie Ọrovwohwo re ta kẹ nẹ, Harhe Devid, kono re ta kẹ nẹ, Die wo vwo ru ọtiọye?

¹¹ Devid da ta kẹ Abishai kugbe idibo rọye ejobi, Ọmọ mẹ ro nẹ oma mẹ rhe, guọnọ erhi mẹ hwe, kemavọ ọmọ ri Bẹnjamin rhe ru te? Jovwo rọ harhe; kidie Ọrovwohwo re ta kẹ.

¹² Ariẹnre-e Ọrovwohwo me mrẹ ọdjarhe re me epha, Ọrovwohwo da vwẹ ẹroesiri rọye kẹ vwẹ vwẹ oma rẹ iyori ro duvwu vwẹ nonẹ na,

¹³ Etiyin Devid vẹ ihwo rọye da ro idjerhe, ji Shimei ra yan hẹ obaro vwẹ oma rẹ ugbenu ro hirhe aro kuo, o duvwu iyori jọ yanran, ọ vwẹ ibieragha phio jọ ghwẹ ekpẹn kuo.

¹⁴ Te ovie, kugbe ihwo re vọye gba herọ, de rhi te Jọdan vẹ oma ẹghwọrọ, ọ da re emu rhọvwe oma vwẹ etiyin.

¹⁵ Etiyin Absalọm vẹ ihwo na ejobi, kugbe ihwo rẹ Izrẹl ejobi, da rhe Jerusalẹm, vẹ Ahitofẹl.

¹⁶ Ọke ri Hushai rẹ ohwo rẹ Archit ugbeyan ri Devid vwo bru Absalọm rhe, Hushai da ta kẹ Absalọm, Ovie, wọ tọn, ovie, wọ tọn;

¹⁷ Absalọm da ta kẹ Hushai, Ọnana hẹ ọghọ wo mu kẹ ugbeyan wẹn? Die wo gbi nene ugbeyan wẹ-ẹn?

¹⁸ Hushai da ta kẹ Absalọm, Ẹjo, ohwo rẹ Ọrovwohwo kugbe ihwo nana kugbe ihwo rẹ Izrẹl ejobi jẹreyọ, ọrọye me dia, ọye mi ji nene dia.

¹⁹ Ọfa, ono me tobọ ga? Ọ rha dia ọmọ rọye? Kirobo re me ga ọsẹ wẹn na, ọtiọye me je ga wẹ.

²⁰ Etiyin Absalọm da ta kẹ Ahitofẹl, Jẹn iroro wẹn rhe. Kẹ ọrhọ avwanre ru?

²¹ Ahitofẹl da ta kẹ Absalọm, Bru ẹsen rẹ ọsẹ wẹn kpo ovwerhe rọ yan jovwo nẹ e sẹro rẹ uwevwi, rere Izrẹl ejobi vwọ riẹn nẹ wọ ru ọsẹ wẹn oma; rere obọ rẹ ihwo ejobi re vo wẹ gba herọ na vwọ gan.

²² Etiyin ayen da tan utughe phihọ obenu rẹ uwevwi kẹ Absalọm; Absalọm de bru ẹsen rẹ ọsẹ rọye kpo ovwerhẹ vwẹ irharo rẹ Izrẹl ejobi.

²³ Ọke yena iroro rẹ Ahitofẹl jẹre, da họhọ obo rẹ ọboepha rẹ Ọghẹnẹ tare; ọtiọye iroro rẹ Ahitofel jẹ kẹ Devid kugbe Absalọm epha.