2 Samuẹl 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ozighi rẹ Absalọm gbe kpahe Devid

¹ Rẹ ọna vwọ wan nu, Absalọm de rhi vwo ekpẹrẹ rẹ ofovwi te iyesi vẹ ihwo ujuvẹ gbe ihwe re djẹ nene.

² Absalọm vrẹn vwẹ irhiọke o mi mudia vwẹ akakọ rẹ unurhoro rẹ orere na ọke ri kohwo kohwo ro vwo aphro de bru ovie cha che guẹdjọ, Absalọm mi ghwe se, ọ me ta, Didi orho wo nurhe? Ọke ro da ta, Odibo wẹn asan tiọna o nurhe vwẹ Izrẹl na.

³ Absalọm me ta kẹ, Mrẹ nẹ eta wẹn yovwiri o mi ji shephihọ; ẹkẹvuọvo o vwo ohwo ro mudia phihọ ẹdia rẹ ovie ro nyo we-e.

⁴ Absalọm da ta, ọ rọ marho, E, ọ dianẹ ko mẹvwẹ e vwo ru oguẹdjọ vwẹ otọ na, kohwo kohwo de vwo ẹdjọ yẹrẹ ota vwo rhe vwe, Ki mi vwẹ evuesiri guẹdjọ rọye.

⁵ Ọke rẹ ohwo de si kẹrẹ rhe vwẹ ọghọ kẹ, ọ me yọnrọn ọ fiọnfiọn.

⁶ Uruemn tiọna kọye Absalọm kẹ ihwo rẹ Izrẹl ejobi ri bru ovie rhe fiki ẹdjọ. Ọtiọye Absalọm vwọ riẹriẹ ihwo Izrẹl ejobi.

⁷ Ikpe ẹne vwọ wan nu, Absalọm da ta kẹ ovie, biko ju vwe yanran ra hwa osa rẹ ri mi veri kẹ Ọrovwohwo vwi Hebrọn

⁸ Kidie odibo wẹn ve ive ọke me vwọ Gẹshọ vwi Aram nẹ, Ọrovwohwo da sa vwo vwẹ hirhe rhe Jerusalẹm, ke me ga Ọrovwohwo.

⁹ Ovie da ta kẹ, Yanran ufuoma. Etiyin o vrẹnri ọ da yanran Hebrọn.

¹⁰ Ẹkẹvuọvo Absalọm de orhẹn phihọ orua rẹ Izrẹl ejobi nẹ, Siẹvuọvo we de nyo umri rẹ owanre we mi kperi tanẹ, Absalọm ọye ovie vwi Hebrọn.

¹¹ Ihwo uri de nene Absalọm rhe; ayen da yanran vugheghẹn, ayen riẹn emu ọvuọvo-o.

¹² Ọke Absalọm vwo ze izobo na, o de ji ohwo re Ahitofẹl ohwo ri Gilọn, obruche ri Devid, phihọ, ihwo ri nene Absalọm ki buẹ phihọ.

¹³ Orhẹn ọvo de bru Devid rhe ẹwẹn rẹ ihwo rẹ Izrẹl ejobi guọnọ Absalọm.

¹⁴ Devid da ta kẹ idibo rọye re vọye gba Jerusalẹm, E vrẹn ra djẹ; ọ dia ọtiọye-e gbe sa vabọ rẹ Absalọmu-u; jọphẹrẹ yanran, o de rhi di avwanre ku kpregede, o ru avwanre obo re brare, ọ da rhe vwẹ ọlọkọ hwe orho na ejobi.

¹⁵ Idibo rẹ ovie da ta kẹ ovie, Nighere idibo wẹn choma rẹ ayen vwo ru obo wọ tare ejobi.

¹⁶ Etiyin ovie da ro otafe, evwruwevwi rọye ejobi vwọ kpahọ ovie da yan jẹn eya ẹsen rọye ihwe vwo nẹ e sẹro rẹ uwevwi.

¹⁷ Ovie da yan hẹ obaro, ihwo rọye ejobi de nene, aye de mudia vwẹ asan uwevwi rọ ka oba.

¹⁸ Idibo rọye ejobi da wan vrẹn; ihwo Chẹrẹt ejobi, kugbe ihwo ri Pẹlẹt, kugbe ihwo ri Git uri erha ri nene Devid nẹ Git rhe, ayen da ka obaro kẹ ovie.

¹⁹ Etiyin ovie da ta kẹ Itai rẹ ohwo ri Git, Die wo vwo nene avwanre? Rhivwi, wọ dia kerẹ ovie; kidie wẹ ọrhorha, kugbe oghuvwu rọ djẹ nẹ uwevwi wẹn.

²⁰ Odẹ kpori wọ rhere, me ghwa vwi nonẹ ru vwo nene avwanre, avwanre re yancha yankpo na, ri vughe asan rẹ ra-a? Rhivwi reyọ ihwo wẹn rhe. Jẹn ehrọre vẹ ẹguọnọ ro jẹrhẹriẹ rẹ Ọrovwohwo nene uwe dia.

²¹ Ẹkẹvuọvo Itai da kpahe kẹ oviẹ, rẹ Ọrovwohwo herọ na kugbe obo rẹ ọrovwovwe ovie herọ na, asan kasan rẹ ọrovwovwe epha, owere ọ dia ughwu eyẹrẹ arhọ etiyin odibo wẹn je dia rhe.

²² Devid da ta kẹ Itai, Yanran wọ yan obaro. Etiyin Itai rẹ ohwo ri Git da wan obaro, kugbe ihwo rọye ejobi, vẹ imitete re vọye gba herọ.

²³ Ihwo rẹ orho na ejobi da viẹ gangan rẹ ayen vwọ wanvrẹn na, ovie na da rhe wanvrẹn uto ri Kidrọn, ihwo na ejobi da wanvrẹn, e garuvi obo aghwa na.

²⁴ Abiata da rhe, nighere, Zadọk kugbe ihwo ri Livae ejobi vọye he usun, ayen de mu ekpeti rẹ ọphọ rẹ Ọghẹnẹ na; ayen de mu ekpeti rẹ ive rẹ Ọghẹnẹ na te otọ, bẹsiẹ rẹ ihwo na ejobi rhe vwọ yan nẹ orho na re.

²⁵ Etiyin ovie da ta kẹ Zadọk, Mu ekpeti rẹ Ọghẹnẹ na hirhe kpo obo orere. Ọ da dianẹ me mrẹ ẹroesiri vwẹ obaro rẹ Ọrovwohwo, kọ vwo vwẹ hirhe rhe, me je mrẹ kugbe asan rọ dia;

²⁶ Ẹkẹvuọvo ọ da dianẹ ọ tare, Mi vwo omavwerhe kpahe owẹ-ẹ, nighere, mẹvwẹ na, jo ru vwe obo ri jere.

²⁷ Ovie da ta kẹ Zadọk rẹ orherẹn, Nighere, hirhe kpo obo orere vwẹ ufuoma, wẹ kugbe Abiata, vẹ emọ wẹn ivẹ na Ahimaaz rẹ ọmọ wẹn, kugbe Jonatan rẹ ọmọ rẹ Abiata.

²⁸ Nighe, me hẹrhẹ vwẹ asan ushuame na rọ hẹ obo aghwa na, bẹsiẹ Me vwọ mrẹ ovuẹ nẹ obọ wẹn rhe.

²⁹ Etiyin Zadọk vẹ Abiata de mu ekpeti rẹ Ọghẹnẹ hirhe kpo Jerusalẹm; ayen da daji oboyi.

³⁰ Etiyin Devid de yeri ugbenu rẹ Ọliv, kọ viẹ ro vwo yere kpenu na, owọ ofefe vẹ uyovwi rọye ro rhurhuru; ihwo na ejobi ri nenire kpo enu rẹ ugbenu na dohwo duyovwi rọye de rhurhu, ayen yere enu jẹ ayen viẹ.

³¹ Ohwo ọvo da ta kẹ Devid nẹ, Ahitofẹl ji hẹ usun rẹ ihwo re vẹ Absalọm gba ro ẹro riariẹ owẹ na. Devid da ta, E Ọrovwohwo me rẹ wẹ, rhẹriẹ iroro rẹ Ahitofẹl kpo ugheghẹn.

³² Ọke ri Devid rhi vwo te enu rẹ ugbenu na, asan ra da ga Ọghẹnẹ na, nighere, Hushai rẹ ohwo rẹ Archit da rhe vwa Devid vẹ ẹwun rọye rọ bẹre vẹ ekpẹn vwẹ uyovwi rọye.

³³ Devid da ta kẹ, Wo de nene uvwe ra ku wọ dia oghwa kẹ vwẹ.

³⁴ Ẹkẹvuọvo wo de hirhe kpo obo orere, ra ta kẹ Absalọm nẹ, me dia odibo wẹn, E ovie; kirobo me dia odibo rẹ ọsẹ wẹn jovwo na, etinẹ na ke me je dia odibo wẹn, kọ wọ nẹrhẹ ovwẹ phi iroro rẹ Ahitofẹl kparobọ.

³⁵ Ọ dianẹ wọ vẹ Zadọk kugbe Abiata rẹ orherẹn na gba oboyi kemu kemu wo nyori nẹ uwevwi rẹ ovie rhe, ta kẹ Zadọk kugbe Abiata rẹ irherẹn na.

³⁶ Nighere, emọ rayen ivẹ hẹ oboyi, Ahimaaz rẹ ọmọ ri Zadọk kugbe Jọnatan rẹ ọmọ rẹ Abiata; ayen wọ cha vuẹ ovuẹ rhe vwe.

³⁷ Etiọye Hushai rẹ ugbeyan ri Devid da yanran kpo obo orere rẹ Absalọm ghwa vwo ro Jerusalẹm na.