2 Samuẹl 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Natan ghwọ ku Devid

¹ Ọrovwohwo de ji Natan bru Devid rhe. O de bro rhe, ọ da ta kẹ, Ihwo ivẹ ẹvo hẹ evun rẹ orere ọvo, ọvo ọdafe, ọrivẹ rha vwẹ ovwiogbere.

² Ọdafe na vwo igodẹ buebu kugbe ichuru; ẹkẹvuọvo ovwiogbere na vwo emu ọvuọvo-o jokpa rẹ ọmọ rẹ ogodẹ rẹ aye, otete ọvo rọ dẹre.

³ Ọ da yọnrọn ghwanre, ọ vọye vẹ emọ rọye da rhe rho kugbe; emu rọ ria ọye ọ ria; uko rọ vwọ da ame ọye ọ vwọ da, o mie sherhẹ agada rọye, ọ da họhọ ọmọtẹ rọye.

⁴ Ọrhorha ọvo de rhi wo ọdafe na, ọ rhọvwe hwe ogodẹ ọvo vwẹ usun rẹ ichuru rọye na vwo chere emu kẹ ọrhorha ro woro na-a; ẹkẹvuọvo ọ da reyọ omogodẹ rẹ ovwiogbere na, o de hwe vwo chere emu kẹ ọrhorha ro woro na.

⁵ Ophu de mu Devid gangan kpahe ọdafe na; ọ da ta kẹ Natan, Kirobo rẹ Ọrovwohwo herọ na, ohwo ro ru emu nana fo ughwu;

⁶ kọ rha hwaosa rẹ omogodẹ na asakuẹne, fikiridie o ru emu nana, kidie o vwo ehrọre-e.

⁷ Natan da ta kẹ Devid, Wẹ ohwo na. Enẹ Ọrovwohwo tare, Ọghẹnẹ rẹ Izrẹl. Me vwẹ owẹ mu ovie vwẹ enu rẹ Izrẹl, Mi de si we nẹ obọ ri Sọl;

⁸ Me da vwẹ uwevwi rẹ onini wẹn kẹ wẹ, kugbe eya rẹ onini wẹn Me ghwẹ phihọ agada wẹn, Me da vwẹ uwevwi rẹ Izrẹl kugbe Juda vwọ kẹ wẹ; ọ da dianẹ enana havwe nọ, manẹ Me je vwẹ efa ha kẹ wẹ.

⁹ Die wọ vwọ jẹ ota rẹ Ọrovwohwo fia, ri wo ru emu ọbrabra nana vwẹ obaro rọye? Wọ vwẹ oda hwe Uraya rẹ ohwo ri Hẹt, wọ da reyọ aye rọye vwọ rọvwọ, wọ da vwẹ ọlọkọ rẹ ihwo ri Ammọn vwo hwe.

¹⁰ Fiki rẹ ọtiọye na, ọlọkọ gbi se nẹ anurhoro wẹn bẹdẹ-ẹ, kidie wọ jẹn vwẹ fia, wọ da reyọ aye rẹ Uraya rẹ ohwo ri Hẹt vwo ru aye wẹn.

¹¹ Enẹ Ọrovwohwo tare, Nighere, Ke Me kpare umwemwu vwọ so wẹ vwẹ uwevwi rẹ obọ wẹn na; ke Me reyọ eya wẹn vwẹ irharo wẹn na, ke Me vwẹ ayen vwọ kẹ ọrivẹ wẹn, kọ vayen sherhẹ vwẹ oghẹruvo koko na.

¹² Kidie wọ bẹbẹ ruo; ẹkẹvuọvo mi ru ọnana vwẹ obaro rẹ Izrẹl ejobi, vwẹ uvo gbagba.

¹³ Devid da ta kẹ Natan, Mi ru umwemwu kpahe Ọrovwohwo, Natan da ta kẹ Devid, Ọrovwohwo ku imwemwu wẹn kufia; wo gbi che ghwu-u.

¹⁴ Dede na, fikirobo wo vwo ru emu nana wọ vwẹ Ọrovwohwo jehwẹ ọmọ na ri wo vwiẹri na ko ghwu.

¹⁵ Etiyin Natan de kpo uwevwi rọye. Ọrovwohwo da ghwiẹ ọmọ rẹ aye rẹ Uraya vwiẹ kẹ Devid na kọ rhe muọ ọga.

¹⁶ Devid da rẹ Ọghẹnẹ vwọ kẹ ọmọ na; Devid de chiri owẹvwe, ọ da ro uwevwi o de sherhẹ otọ diodi vwẹ ason ejobi.

¹⁷ Ekpako rẹ uwevwi rọye de mudia kẹrẹ, ayen da kparọ nẹ otọ; ẹkẹvuọvo ọ rhọvwere-e, ọ je rhọvwe re emu-u.

¹⁸ Ẹdẹ rẹ ighwrẹ ọmọ na de ghwu. Oshọ gbi jẹ idibo ri Devid ta kẹ nẹ ọmọ na ghwuru-u, ayen da ta, Nighere, ọke rẹ ọmọ na ji ghwu-u, ma ta kẹ ọ rhọvwe nyo avwanre-e, komavọ ophu muo te ma da ta kẹ nẹ ọmọ na ghwuru? Ariẹnre-e o ru oma rọye emu ọbrabra.

¹⁹ Ẹkẹvuọvo ri Devid vwọ riẹn nẹ idibo rọye bẹbẹ ta ota kẹ ohwohwo, Devid da riẹn nẹ ọmọ na ghwu re; Devid da nọ idibo rọye, ọmọ na ghwuru? Ayen da kpahe, O ghwuru.

²⁰ Etiyin Devid de vrẹn nẹ ekpẹn, ọ họ re, o de ghworo oma rọye, o de wene amwa rọye; o de kpo uwevwi rẹ Ọrovwohwo, ọ da vwẹ ẹga kẹ Ọghẹnẹ. O de rhivwi rhe uwevwi rọye, ọ vwọ nọ ekpẹn rẹ emu, a da vwẹ emu kẹ ọ da re.

²¹ Etiyin idibo rọye da ta kẹ, Ọna didi emu wo ruru na? Wo de chiri owẹvwe wọ da viẹ kẹ ọmọ na, vwẹ ọke ro ji ghwu-u, ẹkẹvuọvo o vwo ghwu nu, wo vrẹnri wọ da re emu.

²² Ọ da ta, Ọke rẹ ọmọ na vwọ akpọ, mi chiri owẹvwe me da viẹ kidie me tare nẹ, a riẹnre-e Ọghẹnẹ me re ehrọre mẹ rẹ ọmọ mẹ na da rhọ?

²³ Ẹkẹvuọvo asakiephana o ghwuru, die sorọ mi vwo chiri owẹvwe? Mi ji se hirhe ọfa? Mẹvwẹ ri che bro, ẹkẹvuọvo o gbi se hirhe bru vwe rhe-e.

²⁴ Etiyin Devid de bru aye rọye Batsheba uche, o de bro kpo ovwerhẹ, o de vwiẹ ọmọshare, o de se odẹ rọye Solomọn: Ivun rọye da vwerhe Ọrovwohwo,

²⁵ o de ji ikọn wan obọ ri Natan rẹ ọmraro rhe; o de se odẹ rọye Jedidiah fiki rẹ Ọrovwohwo.

Devid phi Rabbah reyọ

²⁶ Vwẹ ọke yena Joab de phi Rabbah rẹ ihwo rẹ Ammọn, ọ da reyọ otorho rẹ ovie rayen.

²⁷ Joab de ji ikọn bru Devid, ọ da ta, Me họnre Rabbah me da reyọ otorho rẹ ame.

²⁸ Asakiephana; gba ghwẹ ihwo ri chekọ koko wọ họnre orho na wọ reyọ: me da rhe họnre orho na a da vwẹ odẹ mẹ se.

²⁹ Devid da ghwẹ ihwo na koko, o de kpo Rabbah, ọ da họnrọ ọ da reyọ.

³⁰ Ọ da reyọ erhu rẹ ovie rayen nẹ uyovwi rọye, ẹhọhọ rọye da dia talẹnt rẹ oro, vẹ ibieragha eghaghare, e de vwo tughẹ uyovwi ri Devid. Devid da ghwẹ emu buebu nẹ orho na kpo.

³¹ Ọ ghwẹ ihwo rẹ orho na, ọ vwẹ ẹvo ru ihwo re bẹrẹ irhe, ẹvo ri duvwẹ eghwro vẹ ishurhe, ẹvo re wian owian ri ikorekpẹn; ọtiọna o ru ihwo rẹ orho ri Ammọn. Etiyin Devid vẹ ihwo rọye de rhivwi kpo Jerusalẹm.