2 Samuẹl 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid kugbe Batsheba

¹ Vwẹ ọke evwru vwẹ ukpe, ọke rẹ ivie vwo kpo ofovwi, Devid de ji Joab, vẹ idibo rọye ri nene, kugbe Izrẹl ejobi; ayen de gborho ihwo ri Ammọn, ayen da kpare imu kpo Rabbah. Ẹkẹvuọvo Devid daji obi Jerusalẹm.

² Emu ọvo da rhe phia vwẹ oghẹruvo ọvo, ri Devid vwo vrẹn nẹ ehwa rọye kọ vwẹ enu rẹ uwevwi rọye, ọ da dia obenu rẹ uwevwi na kparo mrẹ aye ọvo rọ họ; aye na yovwiri gangan.

³ Devid de ji ohwo ra nọ ekpẹn rẹ aye na. Ohwo ọvo da ta, Ọna gbe dia Batsheba, rẹ ọmọtẹ rẹ Eliam, rẹ aye rẹ Uraya rẹ ohwo ri Hẹt?

⁴ Devid de ji ikọn ra reyọ rhe, o de bro rhe, ọ vọye da mroma; fikiridie ọ ghwa họ nẹ afe vwẹ obọ; aye na de rhivwi kpo uwevwi rọye.

⁵ Aye na da mrevun o de ji ihwo bru Devid, Ọ da ta, Mi mrevun.

⁶ Ọye Devid de ji ohwo bru Joab, tanẹ, Jẹn e re se Uraya rẹ ohwo ri Hẹt na rhe vwe. Joab de se Uraya rhe Devid.

⁷ Ọke rẹ Uraya vwo re asan ri Devid, Devid da nọ obo ri Joab ruẹ, vẹ obo rẹ ihwo na epha, vẹ obo rẹ ofovwi na epha.

⁸ Devid da ta kẹ Uraya, Yanran kpo uwevwi wẹn, wọ ra hworhẹ awọ wẹn. Uraya da yanran nẹ uwevwi rẹ ovie; etiyin e de mu emu re vwo ruẹse nene.

⁹ Ẹkẹvuọvo Uraya de sherhẹ anurhoro rẹ ovie vẹ idibo rẹ onini rọye, o gbi rhivwi kpo uwevwi rọye-e,

¹⁰ Ọke ra vwọ ta kẹ Devid nẹ, Uraya gbi rhivwi kpo uwevwi rọye-e, Devid da ta kẹ Uraya nẹ, Wo ji nẹ oyan wẹn rhe-e? Kidie wo gbi kpo uwevwi wẹ-ẹn?

¹¹ Uraya da ta kẹ Devid, Ekpeti na kugbe Izrẹl vẹ Juda dia itughẹ; ọrovwovwe Joab kugbe idibo rẹ ọrovwovwe wo phihọ ophephe, ki mi kpo uwevwi, re me re, re me da mi rhe nene aye mẹ sherhẹ? Ọtiobọ wọ herọ kugbe obo rẹ ẹnwẹ wẹn herọ na, mi se ru emu nana-a.

¹² Etiyin Devid da ta kẹ Uraya, Ji mudia etinẹ nonẹ rhe, odẹ ki mi siobo nu we yanran. Etiyin Uraya da dia Jerusalẹm ẹdẹ yena vẹ ẹdẹ rọ vwọ kpahọ.

¹³ Devid vwo se, ọ da vwẹ emu kẹ re, ọ da vwẹ udi buebu kẹ da, ọ da nẹrhẹ idi muo; ọ da yanran re nene idibo rẹ ọrovworo sherhẹ, ẹkẹvuọvo o ji kpo uwevwi rọye-e.

¹⁴ Vwẹ irhiọke Devid de si ọbe vwọ kẹ Uraya no vwo rhe Joab.

¹⁵ O de si phihọ ọbe na nẹ, Phi Uraya phihọ obaro vwẹ asan rẹ ofovwi na da gan, rere wo tephe kẹ, rere a ghwiẹ she, re o ghwu.

¹⁶ Ri Joab vwo phiẹ orere na re, ọ da ghare Uraya te asan rẹ egba epha.

¹⁷ Ihwo rẹ orere na da kpare rhe re họnre Joab; ẹvo vwẹ idibo ri Devid de she vwẹ usun rẹ ihwo na. Uraya rẹ ohwo ri Hẹt na e de ji hwe rhe.

¹⁸ Etiyin Joab de ji ikọn re gbe ikun rẹ obo rẹ ofovwi na wanre kẹ Devid;

¹⁹ o de yono ikọn na tanẹ, wo de gbe ikun rẹ obo rẹ ofovwi na wanre kẹ ovie nu,

²⁰ ọ da dianẹ ophu mu ovie, ọ da rha ta kẹ wẹ nẹ, Die we vwo si kẹrẹ igbẹhẹ rẹ orere na ọtiọye re wa vwọ họnra na? Wa rha riẹn nẹ ayen dia enu rẹ igbẹhẹ na da sa ovwa-an?

²¹ Ono ri hwe Ahimẹlẹk rẹ ọmọ ri Jeruheshet? Ọ dia aye ọvo ri ghorie oragha nẹ enu rẹ igbẹhẹ na rhi she teyọ, o de ghwu vwi Tebez? Die we vwo si kẹrẹ igbẹhẹ na te ọtiọye? Gba tanẹ Odibo wẹn Uraya rẹ ohwo ri Hẹt na e ji hwe rhe.

²² Etiyin ikọn na da yanran ra ta kẹ Devid obo ri Joab jiro ejobi.

²³ Ikọn na da ta kẹ Devid, Ihwo na vwẹ emu ọvo yovwi nọ avwanre, ayen de bresi rhe vwa avwanre vwẹ evun rẹ aghwa; ẹkẹvuọvo avwanre da vwọ tua ayen rhi te ughere rẹ orere na.

²⁴ Etiyin esedada da sa idibo wẹn nẹ enu rẹ igbẹhẹ na rhe; ẹvo rẹ idibo rẹ ovie ghwuru; odibo wẹn Uraya rẹ ohwo ri Hẹt na ji ghwu rhe.

²⁵ Devid da ta kẹ ikọn na, Enẹ wọ ta kẹ Joab, Wo jẹn ota nana kpokpo uwe-e, kidie ọtiọye oda hwe ọvo nonẹ odẹ o mi rhe hwe ọfa; jẹn obọ rẹ ihwo wẹn tua gan kpahe orere na, ri we phio kua. Ọ da ta udu phihọ awọ.

²⁶ Ọke rẹ aye rẹ Uraya vwo nyo nẹ ọshare rọye ghwuru, o de muomahọ, ọ da viẹ ọshare rọye.

²⁷ Rẹ uvweri na vwọ ghwiẹ nu, Devid da reyọ vwo kpo uwevwi rọye, o de rhi hirhe phihọ aye rọye, o de vwiẹ ọmọshare vwọ kẹ. Ẹkẹvuọvo obo ri Devid ruru de miovwo Ọrovwohwo ivun.