2 Samuẹl 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ephio kua rẹ ihwo rẹ Ammọn vẹ o rẹ Ihwo ri Siria

¹ Ọna vwọ wan na ovie rẹ ihwo rẹ Ammọn de ghwu, Hanun rẹ ọmọ rọye da re vwẹ ẹdia rọye.

² Etiyin Devid da ta, Mi ru uruemu rẹ ovie kẹ Hanun rẹ ọmọ ri Nahash, kirobo rẹ ọsẹ rọye nene uvwe ru. Etiyin idobo ri Devid de rhi te otọ rẹ ihwo rẹ Ammọn.

³ Ẹkẹvuọvo isun rẹ Ammọn da ta kẹ Hanun rovwayen, Wo rori nẹ, fikirobọ ri Devid vwo ji ihwo rhi bru we uche na, kọ vwẹ ọghọ kẹ ọsẹ wẹn? Ọ dianẹ Devid ji idibo rọye rhe re guọnọ otọ rẹ orho na, re ọ dọrhe rọye, re ọ rhe kua?

⁴ Kọye Hanun da reyọ idibo ri Devid, ọ da wanre ẹtuegba rayen ọvuọvo, o de bru ewun rayen fi vwẹ ugava, vwẹ asan ubiọchọ, o de ji ayen kpo.

⁵ Ọke ra vwọ ta ota na kẹ Devid, o de ji ihwo ra vwa ayen kidie oma vo ihwo na gangan. Ovie na da ta, Daji Jẹriko bẹsiẹ rẹ ẹtuegba rẹ ovwan vwo di rhe, we ki rhivwi rhe.

⁶ Rẹ ihwo rẹ Ammọn rhe vwọ riẹn nẹ ayen gbo hwe Devid, ihwo rẹ Ammọn de re durhie ihwo ri Siria ri Bẹtrehọb, kugbe Siria ri Zobah, isodje uriori uje re vwẹ owọ yan, kugbe ovie ri Maakah vẹ ihwo uriori kugbe ihwo ri Tọb, uriori ihwivẹ.

⁷ Ri Devid vwo nyo, o de ji Joab vẹ isodje na, egba eshare na ejobi.

⁸ Etiyin ihwo rẹ Ammọn da rhe ayen de rhi si ofovwi koko vwẹ ughere rẹ orere na; kugbe Siria ri Zobah vẹ Rehob, kugbe ihwo ri Tọb vẹ Maakah, e vayen gbe mudia vwẹ asan ophephẹn rẹ orho na.

⁹ Ọke ri Joab rhe vwọ mrẹ nẹ ofovwi na ganre kọye vwẹ obaro vẹ obuko, ọ da jẹn ihwo rẹ Izrẹl ẹvo rọ sanọre, ọ da vwẹ ayen tẹrẹ edje hirhe aro ku ihwo ri Siria;

¹⁰ Ọ de phi ihwo ri chekọ phihọ obọ rẹ Abishai rẹ oniọvo rọye, ayen da tẹrẹ edje hirhe aro ku ihwo rẹ Ammọn.

¹¹ Ọ da ta, Ihwo ri Siria da gan nọ kẹ vwẹ, wọ me cha vwẹ uko, ihwo ri Ammọn da rha gan nọ kẹ wẹ, ke me rha cha wẹ uko.

¹² Yivwaro, je ru oma kerẹ eshare vwọ kẹ ihwo rẹ avwanre; kugbe irere rẹ Ọghẹnẹ rẹ avwanre; e gbe jẹn Ọrovwohwo ru obo ri jere.

¹³ Etiyin Joab vẹ ihwo rọye de si kẹrẹ ayen vẹ Siria de mu ofovwi chivwi; ayen da mrẹ Joab djẹ.

¹⁴ Ọke rẹ ihwo ri Ammọn rhe vwọ mrẹ nẹ ihwo ri Siria djẹrẹ, ayen da je djẹ kẹ Abishai, ayen da ra djẹ ro evun rẹ orere na. Etiyin Joab de rhivwi jẹ ihwo ri Ammọn vwo, ọ da rhe Jerusalẹm.

¹⁵ Ẹkẹvuọvo ọke rẹ ihwo ri Siria vwọ mrẹ nẹ Izrẹl phi ayen kua, ayen da ghwẹ oma koko,

¹⁶ Etiyin Hadadezar de ji ikọn re se ihwo ri Siria re hẹ obovrẹn rẹ urhie ri Yufretis, ayen da rhe Hilam, vẹ Shobak rẹ onotu rẹ ofovwi ri Hadadezar rọ ka obaro kẹ ayen.

¹⁷ Ra rhe vwọ ta kẹ Devid, ọ da ghwẹ Izrẹl ejobi koko, ọ da shariẹ Jọdan vrẹn, o de rhi te Hilam. Etiyin ihwo ri Siria da gba phihọ Devid, ayen vọye da họnre.

¹⁸ Etiyin ihwo ri Siria da djẹ kẹ ihwo rẹ Izrẹl; Devid de hwe ihwo ri Siria re gua ekpẹrẹ ujori ighwrẹn, kugbe uriori ujuvẹ re gua iyesi, ọ da wan Shobak onotu rẹ ofovwi rayen oma o de ghwu vwẹ etiyin.

¹⁹ Ọke rẹ ivie re dia idibo ri Hadadezar rhe vwọ mrẹ nẹ Izrẹl phi ayen kparobọ, ayen vẹ Izrẹl da rhe rhuẹrẹ kugbe, ayen da ga ihwo rẹ Izrẹl. Oshọ de mu ihwo ri Siria ayen gbe cha ihwo ri Ammọn uko ọfa-a.