2 Samuẹl 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid nyo ughwu ri Sọl

¹ Ri Sọl vwo ghwu nu, ọke ri Devid vwo rhivwi nẹ ihwehwe rẹ Amalẹk rhe, Devid da daji Ziglag ẹdẹ ivẹ.

² Vwẹ ẹdẹ rerha, nighe, ọshare ọvo de nẹ erhọn ri Sọl rhe, vẹ emwa rọye re bẹre vẹ ekpẹn vwẹ uyovwi rọye. Ọke ro vwo bru Devid rhe, o de she gberi otọ ọ da vwarọ.

³ Devid da ta kẹ, Tivọ wo nurhe? ọ da ta kẹ, Me djẹ vabọ nẹ erhọn rẹ Izrẹl rhe.

⁴ Devid da nọ, Mavọ wọ yan wan? Ta kẹ vwẹ. Etiyin ọ da kpahe, Ihwo nana djẹ nẹ ofovwi, ihwo buebu ghwuru; Sọl vi Jonatan ji ghwu rhe.

⁵ Devid da ta kẹ emeghele na rọ ta kẹ na, Mavọ wo ru riẹn ni Sọl vi Jonatan ọmọ rọye ghwuru?

⁶ Emeghele rọ vuẹrẹ na da ta, Me de hẹ ugbenu ri Gilboa; etiyin Sọl da ghwoma nyẹ oshuẹ rọye, nighe, ihwo re gua ekpẹrẹ rẹ ofovwi vẹ iyesi vwọ kpahọ chacha,

⁷ o vwo nẹ obuko ọ da mrẹ vwẹ, o de se vwe. Me da kpahe, Mẹvwẹ na.

⁸ ọ da ta kẹ vwẹ, Wẹ ono? Me da kpahe kẹ, Mẹvwẹ ohwo rẹ Amalẹk.

⁹ Ọ da ta kẹ vwẹ, Mudia kẹrẹ ovwẹ wo hwe vwe; kidie ughwu mi epha na, jẹn ẹnwẹ mẹ ji gbeghẹrẹ.

¹⁰ Etiyin mi de si kẹrẹ mi de hwe, kidie Me riẹnre nọ gbe sa rhọ-ọ o de she nu, me reyọ erhu rọye rọ hẹ uyovwi rọye kugbe ibiegba rọ obọ rọye, me da vwẹ ayen djẹ rhe ọrovwovwe.

¹¹ Devid da yọnrọn emwa rọye, ọ da bẹrẹ ayen, etiọye ji te ihwo ri nenire:

¹² Ayen de muomahọ, ayen da viẹ, ayen de chiri owẹvwe re duvwu ovwọnvwọn vwọ kẹ Sọl vẹ Jonaran rẹ ọmọ rọye kugbe ihwo rẹ Ọrovwohwo, kugbe vwọ kẹ uwevwi rẹ Izrẹl, kidie a vwẹ ọlọkọ hwe ayen.

¹³ Devid da ta kẹ emeghele rọ ta kẹ na, Tivọ wo nurhe? ọ da kpahe, Mẹvwẹ ọmọ rẹ ọrhorha ohwo rẹ Amalẹk.

¹⁴ Devid da ta kẹ Mavọ oshọ vwo ju we emuo wọ vwọ riẹn obọ wẹn vwo hwe ohwo rẹ Ọrovwohwo vwo mu ovie?

¹⁵ Devid de se ọvo rẹ emeshare na, ọ da ta, Yanran wo rhurho muotọ. Etiyin ọ da ghwiẹ hwe.

¹⁶ Devid da ta kẹ, Ọbara wẹn dia enu rẹ uyovwi wẹn; kidie unu wẹn ọvo se oseri hwe we, wọ vwọ tanẹ mi hwe ohwo rẹ Ọrovwohwo vwo ru ovie.

Devid vwerhe Sọl kugbe Jonatan

¹⁷ Devid da viẹ oviẹ nana vwọ kẹ Sọl vẹ Jonatan rẹ ọmọ rọye,

¹⁸ ọ da ta kẹ ihwo nẹ ayen vwo yono ihwo ri Juda nighere, e siro phihọ obe ri Jashar. Ọ da ta:

¹⁹ Urinrin wẹn, E Izrẹl, ehwere vwẹ asan ro kpenu Mavọ egba ru she!

²⁰ Wọ ta vwi Gat rẹ, we ghwoghwo vwẹ irhuvwu rẹ Ashkẹlọn rẹ; emetẹ ri Filistia da ghọghọ, emetẹ rẹ ihwo rẹ upheruphe na de mu oma kpenu.

²¹ Ovwanvwan igbenu ri Gilboa, e jẹn ọphogho yẹrẹ osio dia enu wẹ-ẹn, eyẹ ogbugbu rẹ ame-e! Kidie etiyin a da tẹn ekpọfia rẹ ọgba fia, ekpọfia ri Sọl, ra vwẹ evwri ghworo-o.

²² Nẹ ọbara rẹ ihwo re hweri, nẹ ivwri rẹ ọgba, umurhabọ ri Jonatan gbaprẹ-ẹ, ọlọkọ ri Sọl fiabọ-ọ.

²³ Sọl vẹ Jonatan, guọnọ ohwohwo gangan! Vwẹ arhọ yẹrẹ ughwu ayen hẹriẹ oma-a; ayen rhan phẹrẹ nọ igo, ayen goma nọ ikpohrokpo.

²⁴ Vwan emetẹ rẹ Izrẹl, wa viẹ kẹ Sọl, rọ vwẹ isene rhuo ovwan, rọ vwẹ oro rhuẹrẹ ovwan oma.

²⁵ Mavọ egba ru she vwẹ uherevie rẹ ofovwi! Jonatan e hwe we vwẹ asan ro kpenu.

²⁶ Mi vwerhi kẹ wẹ, omoni mẹ Jonatan; wọ nabọ je vwe gangan; ivuẹvwerhọ wẹn kpahe ovwẹ igbunu, ọ nọ ivuẹvwerhọ rẹ eya.

²⁷ Mavọ egba ru she, rẹ ekuakua rẹ ofovwi da guọghọ kufia.