2 Pita 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ive rẹ Echa rẹ Ọrovwohwo na

¹ Imoni mẹ, asakiephana ọnana hẹ ọbe rivẹ ri mi si rhe ovwan na, vwẹ ẹbe ivẹ na ke mẹ vwerọ rhariẹ udu rẹ ovwan re wa vwọ karohọ;

² rere wa vwọ karophihọ emramrẹ rẹ emraro efuanfon na kugbe urhi rẹ Ọrovwavwanre kugbe Osivwi na vwẹ oma rẹ ọyinkọn rẹ ovwan.

³ Esosuọ ejobi e gbe jẹ ọnana ro ovwan nẹ, okuko rẹ ẹdẹ na otu re vwẹ ohwo jehwẹ cha rhe vẹ ehwẹjẹ, nene ọmeme robọ rayen

⁴ tanẹ, Kẹ iveve rẹ ẹcha rọye na rhọ? Kidie rhawẹ ọke rẹ esẹ ride na vwo ghwu rhe na, emu na ejobi je epha kirobo rọ epha nẹ ẹtuọhọ rẹ ema na rhe.

⁵ Ayen vwẹ ẹro koko siẹn uyota nana, nẹ vwẹ ota rẹ Ọghẹnẹ ọye odjuvwu na vwọ herọ nẹ awanre rhe, ọye otọ na vwọ va nẹ evun rẹ ame rhe vwẹ oma rẹ ame,

⁶ oghwe de rhi ku akpọ rọ herọ vwẹ ọke yena ọ da ghwọrọ.

⁷ Vwẹ oma rẹ ota na ọvnọvo ọye a vwọ vwẹ odjuvwu vẹ akpọ rọ herọ vwẹ asakiephana vwọ kpahe enu kẹ erhanre, ra vwọ sẹro rọye hẹrhẹ ẹdẹ ẹdjọ kugbe ẹghwọrọ rẹ ihwo umwemwu.

⁸ Ẹkẹvuọvo ovwan sian uyota nana ọvuọvo-o, imoni, nẹ ẹdẹ ọvo vwẹ obọ rẹ Ọrovwohwo ọ họhọ ikpe uriori, ikpe uriori ọ họhọ ẹdẹ ọvo.

⁹ Ọrovwohwo sa phiẹn ohwo vwẹ oma rẹ ive ro veri kirobo rẹ otu evo ta na-a, ẹkẹvuọvo o chirako rẹ ovwan, ọ guọnọre nẹ ohwo ọvuọvo ghwu-u, ẹkẹvuọvo nẹ ihwo ejobi kurhẹriẹ.

¹⁰ Ẹkẹvuọvo ẹdẹ rẹ Ọrovwohwo na cha kerẹ oji, etiyin idjuvwu na ke cha wanvrẹn vẹ edo rode, ekuakua re herọ, ke cha wran vwẹ evun rẹ erhanre, te akpọ na kugbe iruo re herọ ke cha torhẹ kufia.

¹¹ Rẹ ekuakua na ejobi na cha vwọ wran kufia na, ki didi oghẹre rẹ ihwo ovwan cha dia vwẹ eyenre rẹ ẹfuọn kugbe uyoyovwi,

¹² re hẹrhẹ re kpakpa ẹcha rẹ ẹdẹ rẹ Ọghẹnẹ na, ra cha vwi fiki rọye torhẹ idjuvwu na re da wran kufia, rẹ erhanre da wran ekuakua re herọ kufia?

¹³ Ẹkẹvuọvo kirobo rẹ ive rọye epha avwanre hẹrhẹ idjuvwu ekpokpọ kugbe akpọ rẹ ọvwata cha dia.

¹⁴ Vwẹ ọtiọye na, imoni, rẹ ovwan vwọ hẹrhẹ onana na, gbe jẹ oruru yena dia ovwan oma rere upe eyẹ ekan vwo jẹ ovwan oma ẹdia, re ovwan dia vwẹ ufuoma.

¹⁵ Gbe kere odiri rẹ Ọrovwavwanre vwọ hẹ esivwo. Ọtiọye rhe oniọvo rẹ avwanre ọghaghare ji si rhe ovwan kirobo rẹ aghwanre ra vwọ kẹ epha,

¹⁶ rọ vwọ ta ota rẹ nana kirobo ro ruẹ vwẹ evun rẹ ẹbe rọye ejobi. Emu evo hẹ evun rẹ ayen re epha bẹnbẹn re sa ro ohwo-o, re ihwo ughẹghẹ rẹ owọ rayen gan vwẹ otọ-ọ kuẹrhẹriẹ kẹ ẹghwọrọ robọ rayen, kirobo rẹ ayen ruẹ kẹ ẹbe efuanfon ri chekọ na.

¹⁷ Fiki rẹ ọtiọye na, imoni, rẹ ovwan vwọ riẹn ọnana nure na, gba kẹnoma rere oruchọ rẹ ihwo ri jẹ urhi ẹriẹn na vwo jẹ ovwan esio ghwro, rẹ obo rẹ ovwan mudia phihọ na vwo je ghwro kuẹfia.

¹⁸ Ẹkẹvuọvo gba rho vwẹ evun rẹ ẹserọphẹ kugbe erianriẹn rẹ Ọrovwavwanre kugbe Osivwi rẹ avwanre Jesu Kristi. Ọye a vwẹ urinrin kẹ vwẹ asakiephana rhiri re te ẹdẹ ri bẹdẹ na. Isẹ.