1 Timoti 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ E jẹn ihwo ra dẹre re hẹ eviẹn ejobi mu o ọghọ ro fori kẹ iuini rayen, rere e vwo jẹ odẹ rẹ Ọghẹnẹ kugbe uyono rọye emiovwo.

² Ihwo ri vwo inini ri segbuyota wa jẹ ayen fia-a kidie imoni ovwan ruẹ; ẹkẹvuọvo we rhie evun ga ayen fikiridie ihwo re cha re erere rẹ owian rẹ ovwan na je vwẹ ihwo ri segbuyota imoni re ghare. Vwẹ imu nana yono ayen.

Uyono rẹ Ọfian Vẹ Efe rẹ Uyota

³ Ọ da dianẹ ohwo rhe yono oghẹre rẹ nyono ọfa rọ vẹ omamọ uyono rẹ Ọrovwavwanre Jesu Kristi na shephihọ-ọ kugbe erhnvwu rọ herọ ejobi,

⁴ yọ vọnre vẹ ophiẹnvwe yo phuoma, yọ riẹn emuọvo-o; yo vwo udu gidi gidi rẹ aphro rọ sua ẹghwọ vwẹ oma rẹ eta, re sua omaẹriọ, ohẹriẹ, eta ewanriẹ, ẹroephio,

⁵ kugbe otu ri gbo ugho rẹ eta ri miovwẹ udu rẹ ayen re gba riẹn uyota na-a, re vwẹ ẹro sna erere tavwe ri ki ruẹ emu esiri.

⁶ Uruemu esiri gbine vwo erere ọ je nẹrhẹ udu dia ki;

⁷ Kidie avwanre ghwa emuọvo rhe akpọ na-a, eriyin na avwanre je cha ghwa emuọvo nẹ akpọ na kpo-o;

⁸ ẹkẹvuọvo avwanre de vwo emnọre ra da rha mrẹ emwa vwo rhuo, e gbe jẹ eyena te kẹ avwanre.

⁹ Ẹkẹvuọvo otu ri bru okpakpa rẹ efe she rua ọdavwini, i muẹ ufi, i she rua ughẹghẹ rẹ ọmeme ọbrabra rẹ udu rayen ri suẹn ihwo kpo ughwu vẹ ẹghwọrọ.

¹⁰ Kidie uhinpho rẹ igho ọye ghwa okpetu na ejobi cha; urhuru sivwe nana ọye sorọ rẹ ihwo buebu vwo ghwru nẹ esegbuyota na re da vwẹ edada vẹ obi vwọ sa udu rayen.

Uchebro kẹ omoma rẹ ohwo

¹¹ Ẹkẹvuọvo wẹ, E ohwo rẹ Ọghẹnẹ, sioma nẹ emu nana ejobi; nene ọvwata, uruemu esiri, esegbuyota, ẹguọnọ, erhiori, dẹndẹn.

¹² Họnre omamọ ọhọnre rẹ esegbuyota; gbanọ arhọ ri bẹdẹ na ra vwi fiki rọye se we na homa, ru wọ rhọvwere vwẹ irharo rẹ iseri buebu na.

¹³ Ọbaro rẹ Ọghẹnẹ rọ vwẹ arhọ kẹ emu ejobi na, kugbe ọ ri Kristi Jesu rọ dia obaro ri Pọntiọs Pailet de se iseri rọ da je rhọvwe omamọ rẹ ẹrhọvwọ,

¹⁴ me ta kẹ wẹ nẹ yọnre urhi na gba o vwo upe-e o vwo eka-an bẹsiẹ rẹ Ọrovwavwanre Jesu Kristi vwọ rhe;

¹⁵ ka cha vwẹ ọnana phia vwẹ omamọ ọke rọye Osun ọvuọvo na re bruba kẹ, Ovie ro vwo ivie ejobi kugbe Ọrovwohwo ro vwo ihwo ejobi,

¹⁶ ọvuọvo ro je ghwo na rọ dja vwẹ evun rẹ orẹẹmrẹ re yivwẹ siẹ kẹrẹ-ẹ, rẹ akpọ je mrẹ dẹvo-o eye sa mrẹ-ẹ. Ọye a vwẹ ọghọ kugbe isuesun ri bẹdẹ kẹ. Isẹ.

¹⁷ Nabo yono ayen otu ri feri vwẹ akpọ na nẹ, ayen bru ọrho-o, eyẹ ayen vwẹ ẹro so efe rọ muẹro-o ẹkẹvnọvo ayen vwẹ ẹro so Ọghẹnẹ rọ kẹ avwanre efe ro muẹ avwanre geie na.

¹⁸ Jẹn ayen ru emu esiri jẹn ayen fe efe rẹ uruemu esiri, jẹn ayen ru ẹse,

¹⁹ Ghwẹ koko kẹ oma wẹn re wọ tọn uehivwo kokoroko hẹrhẹ akpọ rọ cha, rere ayen yọnrọn arhọ na rọ dja nvi rẹ arhọ na.

²⁰ E Timoti, sẹro rẹ obo ra vwọ kẹ wẹ yọnre na. Sioma nẹ eta efafanrhiẹ vẹ aphrọ otu re mariẹn na,

²¹ ihwo evo ri mu odẹ rẹ erianriẹn kẹ oma na rhi ghwru nẹ idjerhe rẹ esegbuyota na re. Ẹserọphẹ nene nwe dia.