1 Timoti 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iruo ro ru kẹ Ihwo efa

¹ Wọ ghwọ kuẹ okpako-o ẹkẹvuọvo vwẹ obọ tete kerẹ ọsọmọ; yọnre imighele na kerẹ iniọvo,

² eya re ghworo na ru ayen kerẹ iniemọ, uphophẹ eya na kerẹ iniọvo, vwẹ evun ẹfuọn ejobi.

³ Mu ọgbọ kẹ eyauku re dia eyauku rẹ uyota.

⁴ Ọ da dianẹ ayeuku de vwiẹ emọ eyẹ ivwrọmọ, e jẹn ayen ke yono iruo rẹ egagọ na tavwe re ayen ga esẹ vẹ ini rayen re ayen bwa osa rẹ ẹghẹrẹ rayen kẹ ayen; kidie ona ri fo ẹreyọ vwẹ obaro rẹ Ọghẹnẹ.

⁵ Aye ro gbine dia ayeuku rẹ uyota, rẹ ọye ọvo da herọ, ọ vwẹ ẹro so Ọghẹnẹ ọ me rẹ nẹ ẹrhovwo te ason te uvo;

⁶ yẹ ọ rọ vọnre vẹ unuavwerhe yo ghwu rhẹrhẹ dede na yọ de yan.

⁷ Yọnre urhi nana rere e vwo jẹ ghwọ ku ayen.

⁸ Ohwo rọ rha kọn okọn phihọ otọ kẹ imoni rọye-e, marho kẹ ekru rohọ rọye, yọ yọnrọn esegbuyota na-a yẹ ohwo yena hra nọ ohwo ro ji segbuyota-a.

⁹ Aye ro ji te ikpe ujorha-a e je siẹ odẹ rọye kugbe otu rẹ eyauku-u, eyẹ rọ rọvwọ ọshare vrẹn ọvo;

¹⁰ ọ me rha dia aye re se oseri esiri kpahe, ro vwiẹ emọ rọ da ghẹre ayen, rọ ghọ erhorha, rọ hworhẹ awọ rẹ ihwo efuanfon na, rọ dia oehuko kẹ otu rẹ akpọ hẹn, rọ vwẹ oma rọye ru iruo esiri vwẹ idjerhe kidjerhe.

¹¹ Ẹkẹvuọvo eyauku rẹ itete na e si edẹ rayen phihọ ọhe-e, kidie ọke ri Kristi da ehọrọ ayen ẹro re ke rha guọnọ orọvwe ra,

¹² ke brorhiẹ hwe ayen kidie ayen miovwi ive rayen rẹsosuọ.

¹³ Rha vwọ ha ọyena, ayen ki yono ufeti egbe, ri muẹ yan nẹ nwevwi kpo nwevwi, ọ dia nfeti ọvo ayen gbe-e ayen vwẹ oma ru otidia ohwarha re kare unu phihọ ota, eta ri fori-i kọye ayen mnẹ ta.

¹⁴ Ọtiọye na me guọnọre nẹ eyanku rẹ uphophẹ na rhoma kpo orọvwe, re ayen vwie ẹmọ, re ayen sẹro rẹ uwevwi rayen, rere e vwo je se unwe phihọ ayen.

¹⁵ Kidie ọ guakẹ evo ghwru nene Idẹbono nure.

¹⁶ Aye ro segbuyota de vwo omoni rọ dia ayeuku, e jẹn ọ cha ayen nko; e je kru oghwa yena nyẹ ishọshi-i, rere ishọshi vwo se hirhe aro ku eyauku rẹ uyota.

¹⁷ E jẹn otu rẹ ekpako na re riẹn sun vwo omamọ rẹ ọghọ re mu kẹ ayen, marho kẹ otu re wian owian rẹ eghwoghwo kugbe uyono.

¹⁸ Kidie ọhe ọfuanfon na tare nẹ, Wọ gba unu rẹ erhuẹn vwẹ ọke ro de woro oka-a, kugbe, Ọhwo ro she egho re mrẹ erere rọye.

¹⁹ Wo guẹ ẹdjọ kpahe okpako-o jokpa nẹ ihwo ivẹ eyẹ erha se oseri hwe.

²⁰ Ghwọ kn oruimwemwu vwẹ irharo rẹ ihwo ejobi, rere oshọ vwo mu otu ri ehekọ.

²¹ Me vuẹ wẹ vwẹ irharo rẹ Ọghẹnẹ kugbe Kristi Jesu vẹ emakashe rọ sanọ reyọ nẹ, wo mi rhie evun phẹphẹ ru iruo na, wọ ghwẹ oma hẹ ahọvo jẹ ọvo vwo-o.

²² Wọ vwẹ ohwo guẹ ẹdjọ rẹ okpakpa-a, wo vwo obọ vwẹ imwemwu rẹ ohwo ofa-a, ru oma wẹn fuanfon.

²³ Wọ gbe rha da ame ọvo-o, ẹkẹvuọvo gba da umu udi fiki rẹ evun wẹn kugbe ọga ro kpokpo uwe kọke kọke na.

²⁴ Umwemwu rẹ ihwo evo phiare gbonozẹ, ro tue se ẹdjọeguo, ẹkẹvuọvo umwemwu rẹ ihwo efa ukuko rọye ọ ke vẹn.

²⁵ Ọtiọye rhe uruemu esiri je phia gbonozẹ; e rha tobọ phia dede-e, yẹ e sa djaha-a.