1 Timoti 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uruemu ri Osun vwo

¹ Ọta na ghine muẹro: Ọ da dianẹ ohwo pharhere nẹ ọye dia Ọsun, yọ guọnọ iruo ro vwo ọghọ.

² Osun na rhe vwo ekan vwẹ oma-a, ẹsiẹvo goi ọ rọvwọ, fuefu, ro vwo iroro, ohwo vẹ udidi, ro ru ẹse, rọ goma rẹ uyono,

³ ọ dia ọgba-udi-i, ọ dia ohwo gudu gudu-u ẹkẹvuọvo ohwo dẹndẹn, ọ dia ohwo rẹ ẹghwọ-ọ, o nenesi rẹ igho-o.

⁴ Ohwo rọ nabọ suẹn nwevwi rọye, ro yono emo rọye phihọ ọghọ emuo vẹ omaevwokpotọ vwẹ idjerhe kidjerhe;

⁵ kidie ọ da dianẹ ohwo se sun evwruwevwi rọye-e, komavọ ọ sa vwẹ ẹro te ishọshi rẹ Ọghẹnẹ?

⁶ Ọ dia ohwo ro kurhẹriẹ vwobọ-ọ, eyẹ o de rhi phuoma ro de roro ọ rẹ oma rọye ọvọ o de rhi mu ufi rẹ idẹbono;

⁷ ọ rọ marho e jẹn ihwo rẹ ohada ta omamọ ota kpahọ, ọ rha dia eriyi-in unuakpọ ko muo re she phihọ ufi rẹ idẹbono.

Uruemu ri Dikin vwo

⁸ Otu ri dikin me je dia ihwo rẹ use na nabo we, ọ ta ota ivẹ-ẹ, o siọgba rẹ ndi-i, o vwo urhuru rẹ efe rẹ okpakpa-a;

⁹ ayen me yọnre igbunu rẹ esegbuyota gan vẹ evun ọfuanfon.

¹⁰ A me davwe ayen ni tavwe; ayen rhe she-e kẹsiẹye ayen ki ru iruo ri dikin.

¹¹ Eya na me je dia ihwo rẹ use na nabọ we, e ta avwravwra-a, ẹkẹvuọvo e me dia fuefu, ri vwo esegbuyota vwe emu ejobi.

¹² E jẹn dikin rọvwọ ẹsiẹvo goi, e jẹn ayen sun emọ rayen vẹ evwruwevwi rayen yoyovwi;

¹³ kidie ayen otu ri ru iruo ri dikin na yoyovwi ji ghwe vwo omamọ rẹ owotọ kẹ oma rẹ ayen kẹ ayen ji vwo udu vwẹ esegbuyota na rọ hẹ evun ri Kristi Jesu.

Igbunu rẹ Ega rẹ avwanre na

¹⁴ Mi si eta nana rhe we kidie mi phiẹrohọ nẹ mi bru uwe cha nanana,

¹⁵ o da dianẹ emu da vwẹ ji, re wọ vwọ sa riẹn obo wo ru vwẹ evwruwevwi rẹ Ọghẹnẹ, kọye hẹ ishọshi rẹ Ọghẹnẹ ri bẹdẹ na, osunsun kugbe egbe rẹ uyota na.

¹⁶ Ẹtẹkuẹte, oye hẹ ẹrhọvwọ, rẹ igbunu rẹ egagọ rẹ avwanre na; Ọ rọ phiare vwẹ ughoma, ẹ Erhi Ọfuanfon brorhiẹ kẹ, rẹ emakashe mrẹre, re ghwoghwori vwẹ ohri rẹ ẹgborho na, re segbuyota vwẹ akpọ na, re mu kpenu vwẹ urinrin.