1 Timoti 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eyono kpahe Egago

¹ Mi bru we uche nẹ, emu rẹsosuo ejobi ri wo ru kẹ ọna, wọ me yare, nẹ ẹrhovwo, vwerhi, kpẹvwẹ kẹ ihwo ejobi,

² vwọ kẹ Ivie kugbe ihwo ride, rere avwanre vwo yere akpọ dẹndẹn vẹ ufuoma, yoyovwi vẹ ọghọ vwẹ idjerhe kidjerhe.

³ Ọnana hẹ obo ri yovwiri, ro fo ẹreyọ vwẹ obaro rẹ Ọghẹnẹ Ọsivwi rẹ avwanre,

⁴ rọ guọnọre nẹ ihwo na ejobi rhọre rere ayen rhi vwo erianriẹn rẹ uyota na.

⁵ Kidie Ọghẹnẹ ọvnọvo re herọ, ovwrohọnre ọvuọvo re hẹ uvwre rẹ Ọghẹnẹ vẹ ihwo rẹ akpọ, ohwo na hẹ Kristi Jesu,

⁶ rọ vwẹ ekpuyovwi rẹ oma rọye tan avwanre ejobi hirhe, iseri rọye kọye e se vwẹ ọke ro she phihọ na.

⁷ Fiki rẹ ọnana a vwọ vwẹ ovwe ru aghwọghwọ kugbe ọyinkọn (uyota me ta na, ọ dia ofian me vwọrọ-ọn) kugbe oyono rẹ ihwo ri Keferi vwẹ esegbuyota kugbe uyota na.

⁸ Me guọnọre nẹ kohwo kohwo vwi kasan kasan ejobi kpare abọ efuanfon rẹ ayen kpenu rere ayen nẹ ẹrhovwo, ọ dia ọ rẹ ẹghwọ vẹ ophu-u;

⁹ ọtiọye rhe eya na je sẹ osẹvwe rẹ oma evwokpotọ vẹ iroro o dia ọ rẹ amwa-a, ọ dia ọ rẹ ẹton re meri-i eyẹ oro eyẹ evwarha eghaghare ra gba phihọ-ọ

¹⁰ ẹkẹvnọvo ọ rẹ uruemu esiri, kirobo ri fori kẹ eya ri segbuyota.

¹¹ E jẹn eya na hwe oma mu rẹ ayen yono vẹ oma evwokpotọ.

¹² Me vwẹ ogangan kẹ aye ọvuọvo nẹ o yono-o eyẹ ro vwo ogangan vwẹ enu rẹ eshare; e jo rhurhu unu.

¹³ Kidie Adam a ka ma, tavwe ra ke ma Ivi;

¹⁴ ọ je dia Adam a phiẹre-e, ẹkẹvuọvo aye na a phiẹre o de rhi hirhe phihọ ọchurhi.

¹⁵ Vẹ oma rẹ emo evwiẹ a wan sivwi aye, ọ da diane o vwo esegbuyota kugbe ẹguọnọ kugbe ẹfuọn, kugbe dẹndẹn.