1 Samuẹl 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ihwo ri Filistia vwẹ ekpeti na rhivwi

¹ Ekpeti rẹ Ọrovwohwo na da dia orho rẹ ihwo ri Filistia na emeranvwe ighwrẹ.

² Ihwo ri Filistia de se irherẹn na kugbe eboepha na tanẹ, Kidie avwanre ru ekpeti rẹ Ọrovwohwo na? Ta kẹ avwanre kidie avwanre vwo suo kpo asan rọye?

³ Ayen da ta, ọ da dianẹ ovwan vwẹ ekpeti rẹ Ọghẹnẹ rẹ Izrẹl na kpo, we vwo kpo ababọ-ọ, ẹkẹvuọvo a vwẹ izobo rẹ abe vwo nene. Ke sivwi ovwan, ovwan ke riẹn obo re sorọ rẹ obọ rọye vwo jẹ ovwan oma eno.

⁴ Ayen da ta, Didi oghẹre rẹ izobo rẹ abe avwanre vwo nene? Ayen da kpahe, Irubẹ rẹ oro iyori kugbe ighresi rẹ oro iyori, kirobo rẹ unu rẹ ehọnvwọre ri Filistia bute; kidie oghẹre rẹ emiavwe ọvuọvo na ri mu ovwan vẹ ehọnvwọre rẹ ovwan.

⁵ Ku wọ ma oma rẹ irubẹ wẹn kugbe oma re ighresi wẹn ri kpokpo otọ na, re wa vwẹ urinrin kẹ Ọghẹnẹ rẹ Izrẹl; ọkeọvo ko siobọ nu ovwan vẹ edjọ rẹ ovwan kugbe otọ rẹ ovwan.

⁶ Die nẹrhẹ udu rẹ ovwan gan kirobo rẹ udu rẹ ihwo rẹ Ijipt kugbe Fero ganre? Ọke rẹ ayen vwọ mrẹ emu ọgangan nu ayen rhe siobọ nẹ ayen kpo, rẹ ayen de ghinẹ kpo?

⁷ Asakiephana, ru re wọ reyọ ẹkpẹrẹ ọkpokpọ kugbe irhuẹn ivẹ vẹ emọ re je churu ọhrọ si dẹvo-o, re wo churu irhuẹn na mu ẹkpẹre na, ẹkẹvuọvo mu emọ rayen kpo, ri tephe kẹ ayen.

⁸ Gbe reyọ ekpeti rẹ Ọrovwohwo na re wo muo kpahe enu rẹ ẹkpẹre na, re wo phi oma rẹ oro ru wo ruru phihọ evun rẹ ekpeti rọ hẹ akakọ rọye, ru wo muẹ rhivwi rhe na rọ dia izobo rẹ abe. Gbe muo yanran, rere o kpo obo rọ ra.

⁹ Gbe rhẹrẹ; ọ da ghene vwọ kpahe idjerhe kpo otọ rẹ obọ rọye, kpo Bẹt-shẹmẹsh, yẹ ọye re so emiavwe rode nana; ẹkẹvuọvo ọ rha dia ọtiọye-e, avwanre ke riẹn nẹ ọ dia ọye re vwẹ obọ fa avwanre-e, irhevwa diodi kọye phia kẹ avwanre na.

¹⁰ Ihwo na de ghine ru ọtiọye, ayen da reyọ, ayen da reyọ irhuẹn vẹ emọ ivẹ a da gba ayen mu ẹkpẹre na, e de huhu ẹchẹ gbe emọ rayen vwẹ uwevwi.

¹¹ Ayen de mu ekpeti rẹ Ọrovwohwo na kpahe ẹkpẹre na, kugbe ekpeti na vẹ igbresi rẹ oro na kugbe oma rẹ irubẹ rayen na.

¹² Irhuẹn na da ghwa yan phiọnphiọn kpo Bẹt-shẹmẹsh nene iro kprokpro ọvo na, ayen re kperẹ jẹ ayen yanran; ayen rhẹrioma kpo obọrhe eyẹ obọhwẹre-e, ehọnvwọre ri Filistia da vwo kpahe ayen rhiri re te ughwru ri Bẹt-shẹmẹsh.

¹³ Ọke yena ihwo ri Bẹt-shẹmẹsh ra kọrọ eka vwẹ evun rẹ iyara na; ọke rẹ ayen vwọ kparo mrẹ ekpeti na, ayen da ghọghọ rẹ ayen vwọ mrẹ.

¹⁴ Ẹkpẹre na de rhi te udju ri Joshua ohwo ri Bẹt-shẹmẹsh, o de mudje vwẹ etiyin. Oragha rode ọvo hẹ etiyin; ayen da bẹre irhe rẹ ẹkpẹre na ayen da vwẹ irhuẹn na ze izobo rẹ ẹtorhẹ kẹ Ọrovwohwo.

¹⁵ Ihwo ri Livae de mu ekpeti rẹ Ọrovwohwo na te otọ kugbe ekpeti ra vwọ cha na, rẹ ema rẹ oro na epha na, ayen de mu ayen kpahe oragha rode na; ihwo ri Bẹt-shẹmẹsh de ze izobo rẹ ẹtorhẹ kugbe izobo efa buebu ayen zeri vwẹ ẹdẹ yena kẹ Ọrovwohwo na.

¹⁶ Ọke rẹ ehọnvwọre iyori rẹ ihwo ri Filistia na vwọ mrẹ, ayen de rhivwi ẹdẹdẹ yena kpo Ekrọn.

¹⁷ Enana eye irubẹ rẹ oro, rẹ ihwo ri Filistia na vwo nene izobo rẹ abe kẹ Ọrovwohwo na: ọvo ọ rẹ Ashdod, ọvo ọ ri Gaza, ọvo ọ rẹ Ashkẹlọn, ọvo ọ ri Gat, ọvo ọ rẹ Ekron;

¹⁸ ji te ighresi rẹ oro na, kirobo rẹ unu rẹ irere rẹ ihwo ri Filistia epha rẹ ehọnvwọre iyori na vwori na, te irere ra gba ogba riariẹ kugbe eko ri jẹ ogba evwo. Oragha rode na, rẹ ayen mu ekpeti rẹ Ọrovwohwo kẹrẹ na, ji iseri rhi te nonẹ na vwẹ evun rẹ udju ri Joshua ohwo ri Bẹt-shẹmẹsh.

¹⁹ O de hwe ihwo ri Bẹt-shẹmẹsh evo, fikiridie ayen ni evun rẹ ekpeti rẹ Ọrovwohwo na; o de hwe ihwo ujorha gbe ihwe vwẹ ohri rẹ ayen, ihwo na de mu oma phihọ fikiridie Ọrovwohwo hwe ihwo buebu vwẹ ohri rẹ ayen.

²⁰ Etiyin ihwo ri Bẹt-shẹmẹsh da ta, ono re sa hẹrhẹ Ọrovwohwo Ọghẹnẹ ọfuanfon nana? Kono avwanre muo rhe ro bi nẹ avwanre oma?

²¹ Etiyin ayen de ji ikọn bru ihwo ri Kiriat-jerarim, tanẹ, Ihwo ri Filistia mu ekpeti rẹ Ọrovwohwo rhivwi rhe. Wa yanrhe rhi muo reyọ.