1 Samuẹl 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ihwo ri Filistia mu ekpeti na

¹ Ota ri Samuẹl de bru Izrẹl ejobi rhe. Asakiephana Izrẹl vi Filistia ki phiẹ ofovwi; ayen de mu erhọn phihọ Ebẹnezar ihwo ri Filistia de rhe mu erhọn phihọ Afẹk.

² Ihwo ri Filistia vẹ Izrẹl da rhe karedje rẹ ofovwi, ọke re vwo mu ofovwi na dje ihwo ri Filistia da djẹ Izrẹl, e de hwe ihwo rẹ ayen oma rẹ uriori ẹne vwẹ obo unuofovwi na.

³ Ọke rẹ otuofovwi na rhi vwo te asan erhọn na, ekpakọ rẹ Izrẹl na da ta, Die sorọ rẹ Ọrovwohwo vwọ nẹrhẹ avwanre djẹ kẹ ihwo ri Filistia nonẹ na? E jẹn avwanre re mu ekpeti rẹ ọphọ rẹ Ọrovwohwo na nẹ obo Shiloh rhe etinẹ, rere ọ rhe ohri rẹ avwanre ro sivwi avwanre nẹ obọ rẹ ogangan rẹ ivwighrẹ.

⁴ Etiyin ihwo na de ji ikọn kpo Shiloh, ayen de re mu ekpeti rẹ ọphọ rẹ Ọrovwohwo rẹ ofuofovwi na rhe, ro tidia ekete vwẹ enu ri chẹrobim; emeshare rẹ Eli ivẹ na, Hofni vẹ Finihas, vẹ ekpeti rẹ ive rẹ Ọghẹnẹ na vwẹ etiyin.

⁵ Ọke rẹ ekpeti rẹ ọphọ rẹ Ọrovwohwo na rhi vwo te evun rẹ erhọn na, Izrẹl ejobi de mu kperi gangan, ọtiọye na otọ na de kpogho.

⁶ Ọke ri Filistia vwo nyo edo rẹ ekperẹ na, ayen da ta, ọna didi ekpere rhe nẹ erhọn rẹ ihwo ri Hibru na cha? Ọke rẹ ayen vwo nyo nẹ ekpeti rẹ Ọrovwohwo na rhi te erhọn na re,

⁷ oshọ de mu ihwo ri Filistia kidie ayen tare nẹ, eghẹnẹ na rhe obo erhọn na re. Ayen da ta, Ekan kẹ avwanre! Kidie emu ọtiọna je phia dẹvo-o.

⁸ Ekan kẹ avwanre! Ono se sivwi avwanre nẹ ogangan rẹ edjọ ride nana? Enana edjọ re vwẹ oghẹre rẹ emiavwe buebu ghwọrọ ihwo rẹ Ijipt vwẹ evun rẹ aton na.

⁹ We yivwaro, we ru oma kerẹ eshare E Filistia, ovwan da rhe dia eviẹn rẹ ihwo ri Hibru kirobo rẹ ayen epha kẹ ovwan; we dje oma kerẹ eshare rere wa họnre.

¹⁰ Ọtiọye ihwo ri Filistia na da họnre, ayen da kparobọ, Izrẹl da djẹ, dohwo duwevwi rọye da ra; e de hwe ihwo buebu, ihwo ri ghwuru vwẹ Izrẹl ẹdẹ yena da dia uriori ọgban rẹ ihwo re vwẹ owọ yan.

¹¹ E de mu ekpeti rẹ Ọghẹnẹ na; emeshare rẹ Eli ivẹ, Hofni kugbe Finihas, de ghwu.

¹² Ohwo rẹ orua ri Bẹnjamin da djẹ nẹ unuofovwi na rhe, o de rhi te Shiloh vwẹ ẹdẹ yena ọvuọvo na, vẹ emwa rọye re bẹre vẹ ekpẹn rọ ghwẹ ku uyovwi.

¹³ Rọ vwọ rhe, Eli tidia aga rọye vwẹ oma rẹ idjerhe rọ rhẹrẹ, kidie udu re bro fiki rẹ ekpeti rẹ Ọghẹnẹ na. Ọke rẹ ohwo na vwo te orere na rhe nẹ iyẹnrẹn, orere ejobi de mu kperi.

¹⁴ Ọke rẹ Eli vwo nyo edo rẹ unuebo na, ọ da ta, ọna didi unuebo? Etiyin ohwo na de bru okpakpa rhe vuẹ Eli.

¹⁵ Asakiephana Eli ghwu te ikpe ujọne gbẹ ihwe gbẹ ẹrenre yẹ ẹro rọye ji djere, ọtiọye na ọ gbe sa mrorẹ-ẹ.

¹⁶ Ohwo na da ta kẹ Eli, Mẹvwẹ ohwo ro nẹ obo unuofovwi na rhe; obo ofovwi na me djẹ nurhe nonẹ na. ọ da ta, Komavọ ọ wanre, ọmọ mẹ.

¹⁷ Ohwo rọ ghwa iyẹnrẹn nana rhe da ta, Izrẹl mrẹ Filistia djẹ, Ihwo buebu ọye ehweri vwẹ ohri rẹ ihwo na; emọ wẹn ivẹ na rhe, Hofni kugbe Finihas, ighwuru, ekpeti rẹ Ọghẹnẹ na e muro reyọ.

¹⁸ Ro ghwe vwo se odẹ rẹ ekpeti rẹ Ọghẹnẹ na, Eli de ghwe she kpo obuko nẹ aga ro tidia na rọ hẹ oma rọ anurhoro na; o de vwirhi ohọre o de ghwu, kidie ọmare o ruẹ, yọ vẹ ọnyẹ. O guẹdjọ rẹ Izrẹl ikpe ujuvẹ.

¹⁹ Asakiephana aye rẹ ọmọ rọye aye ri Finihas, yọ mrevun, kọ chuẹ uvwiẹ. Ro vwo nyo ikun nẹ e mu ekpeti rẹ Ọghẹnẹ na, nẹ ọsorọvwe rọye vẹ ọshare rọye ghwuru, o ghwe, gbe uyovwi hẹ otọ o de vwiẹ; kidie evun rẹ uvwiẹ muro.

²⁰ Ọke ro che vwo ghwu re aye ro vwiẹ na da ta kẹ, Wo djẹ oshọ-ọ, kidie wo vwiẹ ọmọshare nure. Ẹkẹvuọvo ọ gbe kpahe-e, eyẹ ọ kerhọ-ọ.

²¹ O de se odẹ rẹ ọmọ na Ikabọd; tanẹ, Urinrin na vrẹn nẹ Izrẹl nure! fikiridie e mu ekpeti rẹ Ọghẹnẹ na reyọ nure ji kugbe ọsorọvwe rọye vẹ ọshare rọye ri ghwuru.

²² Ọ da ta, Urinrin na vrẹn nẹ Izrẹl nure, kidie e mu ekpeti rẹ Ọghẹnẹ reyọ.