1 Samuẹl 31 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ughwu ri Sọl vẹ ọ rẹ emọ rọye

¹ Ọke yena ihwo ri Filistia da vwẹ ofovwi so Izrẹl; ihwo rẹ Izrẹl da mrẹ ihwo ri Filistia djẹ, ayen de she ghwu vwẹ ugbenu ri Gilboa.

² Ihwo ri Filistia da djẹ vwa Sọl vẹ emọ rọye ihwo ri Filistia de hwe Jonatan vẹ Abinadab kugbe Maikishua, emeshare ri Sọl.

³ Ọfovwi na de keke Sọl oma, esedada na da rhe mrẹ; ayen da woma brabra.

⁴ Etiyin Sọl da ta kẹ ohwo rọ ghwa ekuakua rẹ ofovwi rọye, Yoro ọlọkọ wẹn ru wo duvwu uvwe fi, ọ rha dia eriyi-in otu rẹ upheruphe ki che duvwu uvwe fi, kẹ ayen cha vwẹ ovwẹ jodẹ. Ẹkẹvuọvo ọ rọ ghwa ekuakua rẹ ofovwi rọye na gbi yivwi ruo-o; kidie oshọ muro gangan. Ọtiọye na Sọl reyọ oda rẹ obọ rọye o de vwo duvwu oma rọye hwe.

⁵ Ọke rẹ ohwo ro ghwa ekuakua rẹ ofovwi rọye vwọ mrẹ nẹ Sọl ghwuru, o da je vwẹ oda rọye duvwu oma rọye hwe ọ vẹ ọye de ghwu.

⁶ Kẹnẹ Sọl ghwuru, ọ vẹ emeshare rọye erha; ọvẹ ohwo rọ ghwa ekuakua rẹ ofovwi rọye, vẹ ihwo rọye ejobi, vwẹ ukpẹdẹ ọvuọvo na.

⁷ Ọke rẹ ihwo rẹ Izrẹl rẹ hẹ abọ oboyi rẹ iyara na kugbe e re hẹ abọ oboyi ri Jọdan vwọ mrẹ nẹ ihwo rẹ Izrẹl djẹrẹ nẹ Sọl vẹ emeshare rọye ghwuru, ayen da vẹn jẹ irere rayen vwo ayen da djẹ; ihwo ri Filistia da kua rhe re dia ayen.

⁸ Vwẹ irhiọke, rẹ ihwo ri Filistia rhe vwọ ban irivwi na phihọ, ayen da mrẹ Sọl vẹ emeshare rọye erha ri ghwuru vwẹ ugbenu ri Gilboa.

⁹ Ayen da nyavwe uyovwi rọye no, ayen da ghwẹ ekuakua rẹ ofovwi rọye reyọ ayen de ji ikọn nene otọ ri Filistia ejobi, nẹ a ghwa ikun esiri na rhe edjọ rayen kugbe ihwo ejobi.

¹⁰ Ayen da ghwa ekuakua rẹ ofovwi rọye phihọ uwevwi rẹ Ashra; ayen de churu orivwi rọye si igbẹhẹ ri Bẹtshan.

¹¹ Ẹkẹvuọvo ọke re ihwo ri Jabẹsh Gilead vwo nyo obo re ru Sọl,

¹² ihwo ri yivwaro vwọ ejobi de vrẹn, vwẹ evun rẹ ason, ra reyọ orivwi ri Sọl kugbe ọ rẹ emọ rọye nẹ lgbẹhẹ ri Bẹtshan rhe; ayen rhi vwo te Jabẹsh ayen da torhẹ ayen vwe etiyin.

¹³ Ayen da reyọ esuanso rayen ayen de sho ayen phihọ otọ rẹ oghriki vwi Jabẹsh, ayen de chiri ewẹvwe ẹdẹ ighwrẹn.