1 Samuẹl 28 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Vwẹ ọke yena ihwo ri Filistia da ghwẹ otuofovwi rayen koko, re ayen ra họnre Izrẹl. Akish da ta kẹ Devid, Wọ riẹn nẹ te owẹ vẹ ihwo wẹn che nene uvwe kpo ofovwi na.

² Devid da ta kẹ Akish, Gangan vwo, wọ cha riẹn obo rẹ odibo wẹn se ru. Akish da ta kẹ Devid, oshehọ, ke me vwẹ owẹ ru ohwo rọ rhẹrẹ ekpuyovwi mẹ bẹdẹ.

Sọl kugbe ọrieda rẹ Endọ

³ Ọke yena yi Samuẹl ghwu nure, Izrẹl ejobi de muomaphihọ kẹ ayen de sho phihọ Ramah, orere rẹ obọ rọye. Yi Sọl djẹ ebọerivwi kugbe erieda rẹ otọ na ejobi no nure.

⁴ Ihwo ri Filistia na da ghwẹ koko, ayen de muerhọn phihọ Shunem; Sọl da ghwẹ Izrẹl ejobi koko, ayen de muerhọn phihọ Gilboa.

⁵ Ọke ri Sọl vwọ mrẹ unuofovwi ri Filistia, oshọ de muo, udu rọye de kpogho gangan.

⁶ Ọke ri Sọl vwo duotọ rọye vwẹ ọbọ rẹ Ọrovwohwo, Ọrovwohwo kpahe kẹẹ, vwẹ ẹvwerhẹ, eyẹ Utẹ, eyẹ emraro-o.

⁷ Etiyin Sọl da ta kẹ idibo rọye, Wa guọnọ aye rọ dia ọboerivwi kẹ vwẹ, re mi bro ra re duotọ rọye vwẹ obọ rọye. Idibo rọye da ta kẹ, Nighe, Ọboerivwi ọ hẹ obo Ẹndọr.

⁸ Etiyin Sọl da ghwiẹ emwa rọye nu o de ku iwun gheghe phihọ, ọ da yanran, te ọye kugbe ihwo ivẹ efa re vwọ ba; ayen de rhi te asan rẹ aye na vwẹ ason. ọ da ra, Duotọ rẹ emu ọvo kẹ vwẹ, re wo so ohwo kohwo ri mi se odẹ rọye kẹ wẹ ejobi kẹ vwẹ.

⁹ Aye na da ta, kẹ, Uyota wọ riẹn obo ri Sọl ruru, obo ro hwe eboerivwi vẹ erieda nẹ otọ na. Kidie sorọ wọ vwọ kpahe ufi kẹ vwẹ re vwo hwe vwe?

¹⁰ Ẹkẹvuọvo Sọl da vwẹ odẹ rẹ Ọrovwohwo duvwu iyori kẹ nẹ, Kirobo rẹ Ọrovwohwo herọ na, emu ọvuọvo che ru we fiki rẹ emu nana-a.

¹¹ Etiyin aye na da ta, Kono mi se kẹ wẹ? ọ da ta se Samuẹl kẹ vwẹ.

¹² Ọ ke rẹ aye na vwọ mrẹ Samuel, o de bunu; aye na da ta kẹ Sọl, Kidie sorọ wọ vwọ phiẹ vwẹ? Wẹ Sọl.

¹³ Ovie na da ta kẹ, Wọ djẹ oshọ-ọ; die wọ mrẹre? Aye na da ta kẹ Sọl, Me mrẹ ẹdjọ ro yoro nẹ otọ cha.

¹⁴ Ọ da ta kẹ, Kono ọ họhọre? ọ da ta, ọmọmare re cha na; ovwẹ ukpoyibo phopho. Sọl da ghwa riẹn nẹ Samuel, o de gbe opharo phihọ otọ, ọ da vwarọ.

¹⁵ Etiyin Samuẹl da ta kẹ Sọl, Die wo rhi vwo kpokpo uvwe ru wo vwo se vwe rhe? Sọl da kpahe, Me hẹ djarhe rode na; kidie ihwo ri Filistia kpare ofovwi rhe vwọ so vwẹ, yẹ Ọghẹnẹ chuko kẹ vwẹ ọ gbe kpahe kẹ vwẹ ọfa-a, vwẹ oma rẹ emraro eyẹ ẹvwerhẹ-ẹ; fiki rẹ ọtiọye na mi vwo se we rhe re wọ ta kẹ vwẹ obo ri mi ru.

¹⁶ Samuẹl da ta, Kidie wọ rha rhe vwọ nọ vwẹ, yu wọ mrẹ nẹ Ọrovwohwo chuko kẹ wẹ yẹ owẹ kẹ ọvweghrẹ rọye?

¹⁷ Ọrovwohwo ru kẹ wẹ kirobo rọ wan unu mẹ ta; kidie Ọrovwohwo bẹrẹ uvie na nẹ uwe obọ; ọda vwọ kẹ ọrivẹ wẹn, Devid.

¹⁸ Fikiridie wo mu ọghọ kẹ Ọrovwohwo-o, ophu ro muro kpahe Amalẹk wọ rhọvwe vwo ru iruo-o, kọye Ọrovwohwo vwo ru ọnana kẹ wẹ ẹdẹ ri nonẹ na.

¹⁹ Ọ rọ marho Ọrovwohwo ji che phi Izrẹl vẹ ekpuyovwi wẹn phihọ obọ rẹ ihwo ri Filistia; odẹ rọ cha na te owẹ te emọ wẹn ke cha rhe asan re me epha na; Ọrovwohwo che phi unuofovwi rẹ Izrẹl phihọ obọ rẹ ihwo ri Filistia rhe.

²⁰ Sọl da riẹn gbagbaragba phihọ otọ, ọ vọnre vẹ oshọ fiki rẹ eta ri Samuẹl ta kẹ; ogangan ọvuọvo gbi rhe-e, kidie vwẹ ọsoso rẹ ẹdẹ yena ọ re emu ọvuọvo-o.

²¹ Aye na de bru Sọl rhe, ọke rọ mrẹ nẹ oshọ muro, ọ da ta kẹ, Nighe, ọmọtẹ wẹn nyo ota wẹn; vwẹ aro arhọ vẹ aro ughwu, mi vwo ru obo wọ ta kẹ vwẹ na.

²² Asakiephana, gbe ji nyo urhuru rẹ ọmọtẹ wẹn; ju vwe mu ememu kẹ wẹ; re wọ re, re wo vwo ogangan vwọ yan kpo

²³ Ọ da sen, ọ da ta, me sa re-e. Ẹkẹvuọvo idibo rọye, vẹ aye na, da rẹ, o de nyo eta rayen. Etiyin o de vrẹn nẹ otọ ro sherhẹ na, o de tidia ehwa.

²⁴ Ọke yena aye na vwo upene rẹ erhuẹn sọkọ sọkọ vwẹ evun rẹ uwevwi, kpata kpata o de hwe, ọ da reyọ iwurhie rẹ ọka, o de gbe ọ da kake ikara ro jephuo,

²⁵ o de muo kẹ Sọl vẹ idibo rọye; ayen da re. Etiyin ayen de vrẹn ayen de kpo ason yena ọvuọvo na.