1 Samuẹl 27 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid vẹ ihwo ri Filistia rhe dia kugbe

¹ Devid da ta vwẹ udu rọye, Sọl, che hwe vwe kufia ẹdẹ ọvo vwẹ obo; o rhe vwo emu ọfa mi ru-u jokpa nẹ me djẹ kpo otọ ri Filistia; ofu ko dje Sọl ọ gbe guọnọ ovwẹ vwẹ otọ rẹ Izrẹl na-a, ke me djẹ vabọ

² Etiyin Devid de vrẹn ọ da shariẹ ughwru vrẹn rẹ ọye te ihwo ujori esan re vẹ ọye gba herọ, bru Akish rẹ ọmọ ri Maok, ovie ri Gat.

³ Devid vẹ Akish da dia vwi Gat, te ọye vẹ ihwo rọye, dohwo devwruwevwi rọye, Devid vẹ eya rọye ivẹ, Ahinoam ri Jezreel, kugbe Abigail ri Kamẹl, ayeuku ri Nabal.

⁴ Ọke ra vwọ vuẹ Sọl nẹ Devid djẹ kpo Gat, ọ gbe guọnọ ọfa-a.

⁵ Etiyin Devid da ta kẹ Akish, ọ da dianẹ ivun mẹ vwerhe owẹ, gba kẹ vwẹ asan ọvo vwẹ evun rẹ orho wẹn na, rere me dia etiyin; die sorọ me vẹ owẹ vwọ dia otorere rẹ uvie wẹ vwẹ etinẹ?

⁶ Kọye vwẹ ẹdẹ yena Akish da vwi Ziklag kẹ; fiki rẹ ọtiọye na Ziklag vwo dia ọ rẹ ivie ri Juda rhi te nonẹ na.

⁷ Uche ọke ri Devid dia orho rẹ ihwo ri Filistia da dia ẹgbukpe gbẹ emeranvwe ẹne.

⁸ Kọye Devid vẹ ihwo rọye de vrẹn, ayen de kpo imu vwi Geshur, kugbe Girz, kugbe Amalẹk; kidie ena ihwo re dia otọ na rhabaye rhe, rhiri re te Shur, vẹ otọ rẹ Ijipt.

⁹ Devid da guọghọ otọ na, o jẹ ọshare eyẹ aye vwo-o, ẹkẹvuọvo o de mu igodẹ, irhuẹn, ekẹtẹkẹtẹ, kamẹl, iwun, o de rhivwi bru Akish ra.

¹⁰ ọke rẹ Akish vwo nọ nẹ, Tivọ wọ de kpo ugborho nonẹ? Devid de genu tanẹ, obo Nẹgẹb ri Juda, eyẹ obo Nẹgẹb ri Jẹrahmeel, eyẹ Nẹgẹb ri Ken.

¹¹ Devid yan jẹ ọshare eyẹ aye vwọ-o, re cha ghwẹ ikun rhe Gati-i, ko roro nẹ, Ayen de rhe gbeje avwanre tanẹ, enẹ Devid ruru. uchọke rọ dia otọ ri Filistia krite na otiọtiọye o ruru.

¹² Akish da vwẹ ẹroso Devid, o de roro nẹ, ọ gbe oma rọye ku tughu tughu kẹ ihwo rọye Izrẹl; fiki rẹ ọtiọye na kọ cha dia odibo mẹ bẹdẹ.