1 Samuẹl 26 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid gbobọyẹ Sọl vwẹ Zip

¹ Etiyin ihwo ri Zip de bru Sọl rhe vwi Gibeah, tanẹ, ọ dia Devid ri sioma nu vwẹ ugbenu ri Hakilah rọ hẹ obaro ọnre vwi Jẹshimọn?

² Etiyin Sọl vrẹnri o de kpo aghwa ri Zip, ọ vẹ ihwo rẹ Izrẹl uriori erha rọ sanọre, ra guọnọ Devid vwẹ aghwa ri Zip.

³ Sọl de mu erhọn phihọ ugbenu ri Hakilah, rọ hẹ orhoma rẹ idjerhe vwẹ obaro ọnre ri Jẹshimọn. Ẹkẹvuọvo Devid da daji evun rẹ aghwa na; ọke rọ vwọ mrẹ nẹ Sọl vwọ kpahọ vwẹ evun rẹ aghwa na.

⁴ Devid de ji erhẹrotọ, a da ghene vuẹ nẹ Sọl rhere.

⁵ Etiyin Devid de vrẹn o de rhi te asan ri Sọl muerhọn phihọ na, Devid da mrẹ asan ri Sọl sherhẹ phihọ, vẹ Abner rẹ ọmọ ri Ner, onotu rẹ unuofovwi rọye; Sọl de sherhẹ vwẹ uherevie rẹ erhọn na, yẹ unuofovwi na ejobi muerhọn riariẹ phihọ.

⁶ Etiyin Devid da ta kẹ Ahimẹlẹk rẹ ohwo ri Hẹt, kugbe Abishai rẹ oniọvo ri Joab, ọmọ ri Zeruyah, ono ri nene uvwe kpo obo erhọn ri Sọl na? Abishai da ta, Me vẹ owẹ ra.

⁷ Etiyin Devid vẹ Abishai da yanran kpo obo unuofovwi na vwẹ ason; yi Sọl ra vwerhẹ vwẹ uherevie rẹ erhọn na, yo sa ubiri rọye muotọ vwẹ asan uyovwi rọye; yẹ Abner vẹ unuofovwi na sherhẹ riariẹ phihọ.

⁸ Etiyin Abishai da ta kẹ Devid, Ọghẹnẹ phi ọvweghrẹ wẹn phihọ owẹ obọ nonẹ na; gbe ju vwẹ vwe ubiri mẹ na sa muorọ; me gbe rha vwariẹ ọfa-a.

⁹ Ẹkẹvuọvo Devid da ta kẹ Abishai, Wo hwee; kono sa vwẹ obọ te ohwo rẹ Ọrovwohwo vwẹ evwri ghworo nure, ro de jẹ abe ẹriọ?

¹⁰ Devid da ra, Kirobo rẹ Ọrovwohwo herọ na, Ọrovwohwo ọvo ri che phio hwe; eyẹ ẹdẹ rẹ ughwu rọye cha; eyẹ o che kpo ofovwi ọ me ghwọrọ

¹¹ Ọrovwohwo gha re me vwọ vwẹ obọ mẹ te ohwo rẹ Ọrovwohwo vwẹ evwri ghworo; ẹkẹvuọvo gba reyọ ubiri rọ hẹ asan uyovwi rọye na, kugbe ọtoto rẹ ame na rẹ a yanran.

¹² Etiyin Devid da reyọ ubiri na kugbe ọtoto rẹ ame na rọ hẹ asan uyovwi rọye na; ayen da yanran. Ohwo ọvuọvo mrẹrẹ-ẹ, eyẹ a je riẹ-ẹn, eyẹ ohwo ọvuọvo rhọvwọre-e; kidie ayen ejobi herọ vwerhẹ, kidie ovwerhẹ okokodo ro nẹ obọ rẹ Ọrovwohwo rhe ayen.

¹³ Etiyin Devid da yanran kpo abọ rivẹ, o de tephe ke ayen vwẹ obenu rẹ ugbenu na, uvwre rode da uherevie rẹ ayen;

¹⁴ Devid da kpare unu se otuofovwi na, ji te Abner rẹ ọmọ ri Ner, tanẹ, Wo rhe nyo-o, Abner? Etiyin Abner da kpahe, Wẹ ono ri se ovie na?

¹⁵ Devid da ta kẹ Abner, Wọ dia ọshare? Ono re họhọ owẹ vwẹ Izrẹl na? Kidie sorọ wọ gbe rha rhẹrẹ ọrovwowe ovie-e? Kidie ohwo ọvo rhere rhi hwe ovie ọrovwowe na.

¹⁶ Emu nana ri wo ruru na yovwiri-i. Kirobo rẹ Ọrovwohwo herọ na, wo fo ohwo ro ghwu, fikiridie wọ rhẹrẹ ọrovwowe-e, ohwo rẹ Ọrovwohwo vwe evwri ghworo. Asakiephana gbe ni asan rẹ ubiri rẹ ovie epha, kugbe ọtoto rẹ ame rọ hẹ asan uyovwi rọye na.

¹⁷ Sọl de vughe urhuru ri Devid, ọ da ta, Ọnana urhuru wẹn, ọmọ mẹ Devid? Devid da ta Urhuru mẹ, ọrovwovwe, E ovie.

¹⁸ Ọ da ta, Die sorọ rẹ ọrọvwovwe vwọ tua odibo rọye? Kidie me tobọ ru? Didi abe me rere?

¹⁹ Asakiephana gbe jẹn ọrovwovwe ovie nyo eta rẹ odibo rọye. ọ da dianẹ Ọrovwohwo kọye kpare owẹ vwọ so vwẹ na, e jọ reyọ okẹ; ẹkẹvuọvo ọ da rha dia ihwo rẹ akpọ, e jẹn ekan dia kẹ ayen vwẹ obaro rẹ Ọrovwohwo, kidie nonẹ na ayen djẹ vwẹ ni mi rhe vwo ẹkẹ vwẹ ughwẹ rẹ Ọrovwohwo-o, tanẹ, Yanran ra gọ edjọ efa.

²⁰ Asakiephana, e jẹn ọbara mẹ suẹn te otọ vwẹ obuko rẹ Ọrovwohwo-o; kidie ovie rẹ Izrẹl rhere rhe guọnọ arhọ mẹ, kerẹ ohwo rọ bẹrẹ ibefi rẹ okorobozo vwẹ obenu rẹ ugbenu.

²¹ Etiyin Sọl da ta, mi ru chọ ; rhivwi, ọmọ mẹ Devid, kidie me gbe wan wẹ oma ọfa-a, kidie arhọ mẹ ghare vwẹ obọ wẹn nonẹ na; nighe, mẹvwẹ ri ru ẹkpa, mi ghwruru gangan.

²² Devid da kpahe Ubiri wẹn ọ hẹ etinẹ, E ovie! Jẹn ọvo vwẹ emeshare wẹn na rhe roro.

²³ Ọrovwohwo hwa osa kẹ kohwo kohwo kirobo rẹ ọvwata vẹ uyota rọye epha; kidie Ọrovwohwo phi we phihọ obọ mẹ nonẹ na, yi mi yivwi vwẹ obọ te ohwo rẹ Ọrovwohwo vwẹ evwri ghworo nure-e.

²⁴ Nighe, kirobo rẹ arhọ wẹn ghare vwẹ obọ mẹ nonẹ na, ọtiọye na gbe jẹn arhọ mẹ ghare vwẹ obaro rẹ Ọrovwohwo, e gbe jo sivwi vwe nẹ ukpokpogho ejobi.

²⁵ Etiyin Sọl da ta kẹ Devid, Ebruba kẹ wẹ; Ọmọ mẹ Devid! Wo che ru emu buebu eriyin wọ je kparobọ vwẹ ayen ejobi re. Etiyin Devid da yanran, Sọl de rhivwi kpo asan rọye.