1 Samuẹl 24 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid gbobọnyẹ Sọl vwẹ Engedi

¹ Ọke ri Sọl vwo rhivwi nẹ imu rẹ ihwo ri Filistia rhe, ka vuẹrẹ nẹ, Nighe, Devid hẹ evun rẹ Engedi.

² Etiyin Sọl da sanọ ihwo uriori erha vwẹ ohri rẹ Izrẹl ejobi, ọ da yanran ra guọnọ Devid vẹ ihwo rọye vwẹ obaro rẹ Eragha rẹ Ẹvwe-raghwa.

³ Ọ de rhi te asan ogba rẹ igegede vwẹ idjerhe, asan rẹ emwa epha; Sọl da vwẹriẹ etiyin re rovwoma. Asakiephana Devid vẹ ihwo rọye tidia vwẹ obo ẹtan rẹ ẹmwa na.

⁴ Ihwo ri Devid da ta kẹ, Nonẹ na ẹdẹ rẹ Ọrovwohwo ta kẹ wẹ nẹ, Nighe, Mi che phi ọvweghrẹ wẹn phihọ owẹ obọ, ku wo ruo obo je we ejobi. Etiyin Devid de vrẹn ọ da bẹbẹ re bru orhọn rẹ adagba ri Sọl.

⁵ Ọ vwo runu udu ri Devid ọvo da rhoma bru hwe, fikiridie o bru orhọn rẹ adagba ri Sol.

⁶ Ọ da ta kẹ ihwo rọye, Ọrovwohwo gba ri mi vwo ru emu nana kẹ ọrovwovwe ohwo rẹ Ọrovwohwo vwẹ evwri ghworo, re me vwẹ obọ te, yẹ me riẹnre nẹ Ọrovwohwo vwẹ evwri te nure.

⁷ Kẹ ọtiọna Devid bru ihwo rọye uche, o gbi jẹ ayen vwẹ obọ te Sọl-l. Sọl vrẹnri o de nẹ evun rẹ ẹmwa na, ọ da yan kpo obo rọ ra.

⁸ Ukuko rọye Devid de vrẹn rhe, o de nẹ evun rẹ ẹmwa na rhe, ọ da kpare unu se Sọl, ọrovwovwe ovie! Ri Sọl vwo ni obuko, Devid de she bọvwọ opharo rhuotọ, ọ da vwarọ.

⁹ Devid da ta kẹ Sọl, Die wọ vwọ kerhọ rẹ ihwo re tanẹ, Nighe, Devid guọnọ owẹ hwe?

¹⁰ Nighe, nonẹ na ẹro wẹn mrẹre obo rẹ Ọrovwohwo phi we phihọ obọ mẹ vwẹ evun rẹ emwa na; evo da ta kẹ vwẹ nẹ mi hwe we, ẹkẹvuọvo me vwẹ obọ te we-e. Me da ta, Me sa vwẹ obọ te ọrovwovwe-e, kidie Ọrovwohwo vwẹ evwri ghworo nure.

¹¹ Wọ mrẹrẹ ọsẹ mẹ, ni orhọn rẹ adagba wẹn vwẹ obọ mẹ; ri mi se vwo bru orhọn rẹ adagba wẹn, yi mi hwe we na-a, ku wọ riẹn nẹ iroro umwemwu eyẹ ozighi hẹ evun mẹ-ẹ. Mi ji ru umwemwu kpahe owẹ-ẹ, dede yu wọ bẹrẹ ibefi rere wo hwe vwe.

¹² E jẹn Ọrovwohwo guẹdjọ mẹ vẹ owẹ, e jẹn Ọrovwohwo vwẹ owẹ reihri kẹ vwẹ; yẹ obọ mẹ che hwe we-e.

¹³ Kirobo rẹ awanre bru isẹ, Umwemwu ri nẹ evun rẹ oruimwemwu cha; ẹkẹvuọvo me cha ghwẹ obọ kpahe owẹ-ẹ.

¹⁴ Kono ovie rẹ Izrẹl fiki rọye nẹ uwevwi? Kono wọ vwọ tua na? Eranko oghweghwu! ushu wọ vwọ tua!

¹⁵ Gbe jẹn Ọrovwohwo dia oguẹdjọ, ro brorhiẹ mẹ vẹ owẹ, rọ mrẹ, ro mie vwe unu vwo gu, rere o sivwi uvwe nẹ obọ wẹn.

¹⁶ Ri Devid vwọ ta ota kẹ Sọl nu ejobi, Sọl da ta, Ọnana urhuru wẹn, ọmọ mẹ Devid? Sọl da teyọ ugo rẹ oviẹ.

¹⁷ ọ da ta kẹ Devid, Wẹ re ma dia ọvwata nọ vwẹ; kidie wọ vwẹ uyoyovwi hwa osa kẹ vwẹ, yẹ me vwẹ umwemwu hwa osa kẹ wẹ.

¹⁸ Wọ ta kẹ vwẹ nonẹ obo wọ vẹ ovwẹ yenri te, ru wo vwo ju vwe ehwe yẹ Ọrovwohwo phi vwe phihọ ovwẹ obọ.

¹⁹ Kidie ohwo da mrẹ ọvweghrẹ rọye, ko siobọ no kpo phrẹrẹ? Ọtiọye na Ọrovwohwo kọ hwa osa oyoyovwi kẹ wẹ fiki rẹ obo wo ru kẹ vwẹ nonẹ na.

²⁰ Asakiephana, nighe, o mu vwe ẹro nẹ wọ cha dia ovie, uvie rẹ Izrẹl na kẹ obọ wẹ ọ da cha ghwotọ.

²¹ Gba vwẹ odẹ rẹ Ọrovwohwo duvwu iyori nẹ wo rhe hwe uvwiẹ mẹ re kakare-e, wọ rha ghwọrọ odẹ mẹ nẹ uwevwi rẹ ọsẹ mẹ tototo-o.

²² Devid de duvwu iyori nana kẹ Sọl. Etiyin Sọl da yanran kpo ẹkẹvuọvo Devid vẹ ihwo rọye de rhivwi kpo asan ọgangan na.