1 Samuẹl 23 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid vwi Keilah kugbe Aghwa

¹ Asakiephana ayen da vuẹ Devid, Nighe, ihwo ri Filistia ra họnra Keilah, ayen re cho uwevwi re de wuye eka na.

² Devid de re duotọ rọye vwẹ obọ rẹ Ọrovwohwo, Me ra mi re phi ihwo ri Filistia na? Ọrovwohwo da ta kẹ Devid, Yanran re phi ihwo ri Filistia na rere wo sivwi Keilah.

³ Ẹkẹvuọvo ihwo ri Devid da ta kẹ, Nighe, oshọ mu avwanre vwi Juda vwẹ obonẹ; kemavọ ọ dia vwẹ ọke rẹ avwanre de kpo Keilah ra họnre unuofovwi ri Filistia?

⁴ Devid da rhoma duotọ rọye vwẹ obọ rẹ Ọrovwohwo. Ọrovwohwo da kpahe kẹ, Vrẹn, yanran kpo Keilah; kidie mi che phi ihwo ri Filistia na phihọ owẹ obọ.

⁵ Devid vẹ ihwo rọye de kpo Keilah, ra họnre ihwo ri Filistia, ayen de mu uchuru rayen reyọ, ayen de hwe ihwo buebu vwẹ ohri rẹ ayen. Etiyin Devid de sivwi ihwo re dia Keilah.

⁶ Ọke rẹ Abiata rẹ ọmọ rẹ Ahimẹlẹk vwọ djẹ bru Devid vwi Keilah, ọ da yọnrọn ibuluku vwẹ obọ rọye.

⁷ Asakiephana a da vuẹ Sọl nẹ Devid kpo obo Keilah. Sọl da ta, Ọghẹnẹ phiro phihọ obọ mẹ nure; kidie ọye ọvo tọn oma rọye gbe rọ vwọ ro orho ro vwo echẹ kugbe eghẹn.

⁸ Sọl de se ihwo na ejobi kpo ofovwi, vwẹ obi Keilah, rere mu Devid vẹ ihwo rọye.

⁹ Devid riẹnre nẹ Sọl ra ruẹro riariẹ ọyẹ phihọ; ọda ta kẹ Abiata rẹ orherẹn na, Vwẹ ibuluku na rhe etinẹ.

¹⁰ Etiyin Devid da ta, E Ọrovwohwo, Ọghẹnẹ rẹ Izrẹl, odibo wẹ ghine nyo gbagba nẹ Sọl guọnọ cha Keilah, rere ọ rhe vwọ guọghọ orere na fiki mẹ.

¹¹ Kẹ ihwo ri Keilah phi vwe phihọ obọ rọye? Sọl ghwa ra tobọ rhe, kirobo rẹ odibo wẹn nyori na? E Ọrovwohwo, Ọghẹnẹ rẹ Izrẹl, me rẹ wẹ, ta kẹ odibo wẹn. Ọrovwohwo da ta, ọ cha dẹn.

¹² Etiyin Devid da ta, Kẹ ihwo ri Keilah phi we vẹ ihwo mẹ phihọ obọ ri Sọl? Ọrovwohwo da ta, ayen phi we phihọ obọ rọye.

¹³ Etiyin Devid vẹ ihwo rọye, re joma bu te ujori esan na, de vrẹn nẹ Keilah, ayen de kpo asan rẹ ayen sa ra ejobi. Ọke ra vwọ vuẹ Sọl nẹ Devid vrẹn nẹ Keilah re, ọ da yan jẹ imu na vwo.

¹⁴ Devid da dia evun rẹ ẹmwa vwẹ evun rẹ aghwa ri Zip. Sọl kọ guọnọ kẹdẹ kẹdẹ, ẹkẹvuọvo Ọghẹnẹ rhe phio phihọ obọ rọye-e.

¹⁵ Oshọ ko mu Devid fikiridie Sọl guọnọ hwe. Yi Devid hẹ evun rẹ aghwa ri Zip vwi Horẹsh.

¹⁶ Jonatan, ọmọ ri Sọl, vrẹnri, o de bru Devid rhe vwi Horẹsh, O de phi udu phihọ awọ vwẹ odẹ rẹ Ọghẹnẹ.

¹⁷ Ọ da ta kẹ, Wọ djẹ oshọ-ọ; kidie obọ ri Sọl ọsẹ mẹ che se te we e; wọ cha dia ovie vwẹ Izrẹl, ke me vwọ kpahe owẹ, Sọl rẹ ọsẹ mẹ je riẹn ọnana dede.

¹⁸ Ayen ivẹ na de re ọphọ vwẹ obaro rẹ Ọrovwohwo; Devid da daji Horẹsh, Jonatan de rhivwi kpo.

¹⁹ Etiyin ihwo ri Zip da yanran bru Sọl vwi Gibeah, tanẹ, ọ dia Devid ri sioma nu vwẹ ohri rẹ avwanre vwẹ evun rẹ ẹmwa vwi Horẹsh, vwẹ enu rẹ ugbenu ri Hakilah, rọ hẹ obọrhe ọnre vwi Jẹshimọn?

²⁰ Asakiephana, E Ovie, kirobo rẹ udu wẹn guọnọre yanrhe; kẹ avwanre muo phihọ obọ rẹ ovie kọye ẹkẹ ro te avwanre vwọ.

²¹ Sọl da ta, E jẹn Ọrovwohwo bru phihọ kẹ ovwan; kidiẹ ovwan re ehrọre mẹ.

²² Wa yanran, wa nabọ ra vwẹ ẹro te; re wa riẹn asan rẹ urhuẹ rọye epha, kugbe ohwo ro rhie ẹro mrẹ vwẹ etiyin; kidie a ta kẹ vwẹ nẹ ọghwanre gangan.

²³ Gba nabọ fuẹrẹ wa vwẹ ẹro te asan rọ vwẹ oma hwa ejobi ro de sioma nẹ ejobi, we rhivwi rhe vẹ omamọ rẹ iyẹnrẹ. Etiyin ki mi nene ovwan ra; ọda hẹ otọ na, ke me guọnọ phia vwẹ asan rẹ ihwo uriori ri Juda epha.

²⁴ Ayen de vrẹn, ayen da ka obaro kẹ Sọl kpo Zip. Asakiephana Devid vẹ ihwo rọye hẹ evun aghwa ri Maon, vwẹ obo Araba rọ hẹ obọrhe ọnre vwi Jẹshimọn.

²⁵ Sọl vẹ ihwo rọye da ra guọnọ. A da vuẹ Devid; fiki rẹ ọtiọye na ọ da yanran kpo obo oragha rọ hẹ evun rẹ aghwa ri Maon. Ọke ri Sọl vwo nyo ọyena, ọ da vwọ tua Devid vwẹ evun rẹ aghwa ri Maọn

²⁶ Sọl da yanran kpo abọvo rẹ ugbenu na, Devid vẹ ihwo rọye de rhe kpo abọ rivẹ rẹ ugbẹnu na; Devid ko bru okpakpa rere ọ vwọ mrasan djẹ va Sọl abọ, yi Sọl vẹ ihwo rọye ghwa vwọ kpahe Devid vẹ ihwo rọye chachacha rẹ ayen muo vẹ ihwo rọye,

²⁷ Ọke rẹ ikọn vwo bru Sọl rhe, tanẹ, Jọphẹrẹ wọ rhe; kidie ihwo ri Filistia kpare imu rhe otọ na.

²⁸ Kọye Sọl de rhivwi ọ gbe vwọ tua Devid ọfa-a, o de hirharo ku ihwo ri Filistia; vwẹ ọtiọye na e de se asan na oragha re Eruovabọ.

²⁹ Devid de vrẹn nẹ etiyin, ọ da ra dia asan ogangan rẹ Engedi.