1 Samuẹl 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ugbeyan ri Devid vẹ ọ ri Jonatan

¹ Etiyin Devid da djẹ nẹ Naiot vwi Remah, ọ da rhe rhe ta kẹ Jonatan, Die mi ruru? Didi abe me rere? Didi umwemwu mi ru ọsẹ wẹn, rọ vwọ guọnọ ovwẹ hwe?

² Ọ da ta kẹ, kpare iroro vrẹn. Wo che ghwuu. Nighe, ọsẹ mẹ ruẹ emu ọvuọvo otete eyẹ ọrode ro de ju vwe ẹvuẹ-ẹ; kidie nẹrhẹ ọsẹ mẹ si emu nana nu kẹ vwẹ? ọ dia ọtiọye-e.

³ Ẹkẹvuọvo Devid da kpahe, ọsẹ wẹn riẹnre nẹ ivun mẹ vwerhe owẹ; o de roro nẹ, e jẹn Jonatan riẹn ọnana-a, ivun de rhe miovwo. Ẹkẹvuọvo uyota, kirobo rẹ Ọrovwohwo herọ na ji kugbe obo rẹ erhi wẹn herọ na, me da je owọ ọko vwẹ ẹtinẹ na ye me ro ughwu.

⁴ Etiyin Jonatan da ta kẹ Devid, Kemu kemu wọ tare, mi ruo kẹ wẹ.

⁵ Devid da ta kẹ Jonatan, Nighe, odẹ rọ cha na ọye ọtuphro rẹ emeranvwe, me vẹ ọsẹ wẹn ovie ki tidia udemu emuọvo sa da vwẹ ji-i; ẹkẹvuọvo ju vwe yanran, re sioma mẹ nu vwẹ obo aghwa re te ovwọnvwọn rẹ ẹdẹ rerha.

⁶ Ọ da dianẹ ọsẹ wẹn nọ ekpẹn mẹ, gba tanẹ, Devid vuẹ vwẹ nẹ ọye djẹ kpo obo orere rọye Bẹtlẹhẹm; kidie uvwiẹ rẹ ayen ejobi re ze izobo rẹ ẹgbukpe.

⁷ Ọ da dianẹ ọ tare, ọyoma! yo yovwi kẹ odibo wẹn; ẹkẹvuọvo ivun de miovwo, gba riẹn nẹ ọ jẹ iroro umwemwu kpahe ovwẹ.

⁸ Vwẹ ọtiọye na gba rẹ ehrọre rẹ odibo wẹn, kidie wọ riẹnre nẹ me vẹ owẹ re ọphọ. Ẹkẹvuọvo wọ da mrẹ abe vwẹ obọ mẹ, wẹ ọvo hwe vwe; kidie wọ rha vwẹ ovwẹ rhe ọsẹ wẹn ru?

⁹ Jonatan da ta, Kpare iroro wẹn vrẹn ọyena! me da riẹn nẹ ọsẹ mẹ jẹ iroro umwemwu kpahe owẹ, me gbe sa ta kẹ wẹ?

¹⁰ Etiyin Devid da ta kẹ Jonatan, Kono re rha vuẹ vwẹ ọ da dianẹ ọsẹ wẹn kpahe ota gbaegbae kẹ vwẹ?

¹¹ Jonatan da ta kẹ Devid, Yanrhe, re kpo obo aghwa. Etiyin ayen ivẹ na de kpo obo aghwa na.

¹² Jonatan da ta kẹ Devid, Ọrovwohwo na, Ọghẹnẹ rẹ Izrẹl na, jọ dia oseri. Ọke me da mrẹ ọ rẹ unu rẹ ọsẹ mẹ, vwẹ ọtiọke ọtiọna vwẹ odẹ rọ cha na, eyẹ ẹdẹ rerha, nighe, ọ da dianẹ ivun ri Dẹvid vwerherọ, Mi gbi rhe ji ohwo rhe vuẹ wẹ-ẹ?

¹³ Ẹkẹvuọvo ọ da dianẹ ọsẹ mẹ guọnọ owẹ ruẹ emu ọgangan, Ọrovwohwo ru ọtiọye kẹ Jonatan, ọ rọ rhonọ ọtiọye rhe, ọ da dianẹ me vwẹ rọ phia kẹ wẹ-ẹ, ri mi de sun we kpo, rere wọ vwọ yanran egbẹrhẹnẹdẹ, Gbe jẹ Ọrovwohwo nene uwe dia, kirobo rọ vẹ ọsẹ mẹ gba herọ.

¹⁴ Ọ da dianẹ me je hẹ akpọ, gbe dje omamọ rẹ ẹguọnọ rẹ Ọrovwohwo kẹ vwẹ, rere mi vwo je ghwo;

¹⁵ wo siẹ ọghọ wẹn nẹ uwevwi mẹ bẹdẹ-ẹ. Ọke rẹ Ọrovwohwo da nyavwe ivwighrẹ ri Devid kufia nẹ otọ rẹ akpọ na,

¹⁶ e jẹn a nyavwe odẹ ri Jonatan kufia nẹ uwevwi ri Devidi-i. E jẹn Ọrovwohwo reihri vwẹ obọ rẹ ivwighrẹ ri Devid.

¹⁷ Jonatan da tanẹ Devid rhoma vwẹ ẹguọnọ rọye duvwu iyori, kidie ọ guọnerọ kirobo rọ guọnọ omaobọ rọye.

¹⁸ Jonatan da ta kẹ, Odẹ rọ cha ọye ọtuphro rẹ emeranvwe na; a cha nọ ekpẹn wẹ fikiridie asan wo tidia che phẹfia.

¹⁹ Vwẹ ẹdẹ rerha a cha nọ ekpẹn wẹ gangan; gba yan kpo asan wo de sioma nu jovwo na rẹ ota na vwọ hẹ otọ na, re wọ vwẹ oma da ẹko rẹ ibieragha rọ hẹ abọ oboyi na.

²⁰ Ke me sa edada erha kpo akakọ rọye, kẹrẹsiẹ ra sa orọvwọ.

²¹ Nighe, mi che ji ọmọ, tanẹ, Yanran ra guọnọ edada na. Me da ta kẹ ọmọ na, No, edada na e hẹ abọ obonẹ wẹ, reyọ ayen, etiyin ku wọ rhe, kidie, kirobo rẹ Ọrovwohwo herọ na, yo fu we oma yẹ ukpokpogho herọ-ọ.

²² Ẹkẹvuọvo Me da ta kẹ ọmọ na, No, edada na hẹ abọ oboyi wẹ, gba yanran; kidie yẹ Ọrovwohwo siobọ nẹ uwe kpo.

²³ Vwọ kpahe ota rẹ avwanre mrẹ oma ta jovwo na, nighe, Ọrovwohwo ọ hẹ uvwre mẹ vẹ owẹ bẹdẹ.

²⁴ Etiyin Devid de sioma nu vwẹ evun rẹ aghwa na; ẹdẹ rẹ ọtuphro rẹ emeranvwe na vwo te, ovie na ko tidia rọ ria emu.

²⁵ Ovie na de tidia agbara rọye, ro tidia jovwo, agbara rọ hẹ oma rẹ igbẹhẹ na; Jonatan de tidia hirharo kuo, Abna de tidia akakọ ri Sọl, ẹkẹvuọvo asan ri Devid kẹ ofefe.

²⁶ Yi Sọl ta ota ọvuọvo vwẹ ẹdẹ yena-a; kidie o rori nẹ emu phia kẹ; ọ fonro-on, omuẹro ọ fonro-on.

²⁷ Ẹkẹvuọvo vwẹ ẹdẹ rivẹ, rọ dia ẹdẹ rọ kpahe otuphro rẹ emeranvwe na, asan ri Devid je hẹ ofefe. Sọl da ta kẹ Jonatan rẹ ọmọ rọye, Die sorọ rẹ ọmọ ri Jesse na rha rhe rhew re emu vwẹ odẹ ro kpori na eyẹ nonẹ-ẹ?

²⁸ Jonatan da ta kẹ Sọl, Devid yarẹ uphẹ mie vwe nẹ ọye kpo Bẹtlẹhẹm;

²⁹ ọ tare, Ju vwe kpo; kidie orua mẹ re ze izobo vwẹ obo orere, oniọvo mẹ da vuẹ rhe vwe nẹ me rhe. Asakiephana, ivun mẹ da vwerhe owẹ, gbe ju vwe yanran, re me ra mrẹ iniọvo mẹ. Fiki rẹ ọnana na ọ gbe sa rhe imẹjẹ rẹ ovie-e.

³⁰ Etiyin ivun de miovwo Sọl kpahe Jonatan, ọ da ta kẹ, Wẹ ọmọ rẹ aye ọfafarhiẹ zighizighi na me rha riẹn nẹ wọ jẹ ọmọ ri Jesse reyọ kẹ omaẹphọphọ wẹ-ẹn, je vwọ kẹ omaẹvuọ rẹ ẹban rẹ oni wẹn?

³¹ Kidie uche ọke rẹ ọmọ ri Jesse na dia akpọ na krite, te owẹ te uvie wẹn cha sa ghwotọ-ọ. Gbe ji ohwo re muo rhe vwe, kidie o ghwu nure.

³² Etiyin Jonatan da kpahe kẹ Sọl ọsẹ rọye, Die sorọ re vwo hwe? Die oruru?

³³ Ẹkẹvuọvo Sọl da vwẹ ubiri vwo phio, etiyin o de mu Jonatan ẹro nẹ ọsẹ rọye ghinẹ guọnọ Devid hwe.

³⁴ Jonatan de vrẹn nẹ imẹjẹ na vẹ ophu ọ gbe re emu vwẹ ẹdẹ rivẹ rẹ emeranvwe na-a, kidie ivun miovwiro kẹ Devid, kidie ọsẹ rọye phọpherọ.

³⁵ Vwẹ irhiọke Jonatan de kpo obo aghwa re te asan rọ vẹ Devid ta phihọ na, ọ da vwẹ omotete ọvo vwọ ba oma.

³⁶ Ọ da ta kẹ omotete na Djẹ re wọ ra guọnọ edada re me cha sa na. Rẹ ọmọ na vwọ djẹ, ọ da sa odada ọvo ka obaro kẹ.

³⁷ Rẹ ọmọ na rhi vwo te asan rẹ odada ri Jonatan sare na epha, Jonatan de se ọmọ na ọ da ta, odada na ọ hẹ obaro wẹ na?

³⁸ Jonatan de se ọmọ na, Jọphẹrẹ, kpatakpata, wọ hẹrhẹ-ẹ. Etiyin ọmọshare ri Jonatan na da tọrọ edada na, o de bru onini rọye rhe.

³⁹ Ẹkẹvuọvo ọmọ na riẹn emuọvo-o; jokpa ri Jonatan vẹ Devid ọvo riẹnre.

⁴⁰ Jonatan da ghwẹ ekuakua rọye kẹ ọmọ rọye na, ọ da ta kẹ, kpo re wọ ghwa ayen kpo obo orere na.

⁴¹ Rẹ ọmọ na ghwa vwọ yanran nu, Devid de vrẹn nẹ akakọ rẹ ekru rẹ ibieragha na rhe, ọ da bẹrẹ okpevun rhuotọ, o de gbe uyovwi kpotọ asiarha, ayen ohwohwo da fiọnfiọn ohwo unu, ayen da viẹ kẹ ohwohwo bẹsiẹ rẹ ẹro vwọ hiẹ Devid,

⁴² Etiyin Jonatan da ta kẹ Devid, kpo egbẹrhẹnẹdẹ, kidie ọ gua kẹ avwanre duvwu iyori kẹ ohwohwo vwẹ odẹ rẹ Ọrovwohwo nure, tanẹ, Ọrovwohwo dia uvwre mẹ vẹ owẹ, vẹ uvwre rẹ emọ mẹ vẹ ewẹn, bẹdẹ. ọ vrẹnri ọ da yanran; Jonatan de rhivwi kpo obo orere.