1 Samuẹl 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid hwe Golayat

¹ Kọye ihwo ri Filistia da ghwẹ unuofovwi rayen koko; ayen da rhe ghwẹ koko vwi Sọkọ, vwẹ otọ ri Juda, ayen de mu erhọn vwẹ uvwre ri Sọkọ vẹ Azekah, vwẹ Efes-dammim.

² Sọl kugbe ihwo rẹ Izrẹl da ghwẹ koko, ayen de mu erhọn phihọ iyara rẹ Elah, ayen vẹ ihwo ri Filistia de rhi mu ofovwi dje.

³ Ihwo ri Filistia de mudia enu rẹ ugbenu vwẹ ẹbẹre ọvo, ihwo rẹ Izrẹl de rhe mudia enu rẹ ugbenu vwẹ abọ ro chekọ, iyara da hẹ uvwre rẹ ayen.

⁴ Etiyin ọgba ọvo de nẹ erhọn rẹ ihwo ri Filistia rhe re se odẹ rọye Golayat, ri Gat, rẹ ugrogro rọye dia kubit esan gbe esabọ.

⁵ Ọ vwẹ erhu rẹ utehru vwo tughẹ uyovwi rọye, o de ku ewun rẹ utehru phihọ, rọ họhọ te shekẹl uriori iyori rẹ utehru.

⁶ O de ku ighigho rẹ utehru phihọ awọ rọye, kugbe oshuẹ rẹ utehru ro mu gbere igabọ rọye.

⁷ Unegbe rẹ ubiri rọye pha rioriorio, kere aparepa rẹ ọrhuamwa udje rẹ ubiri na họhọ te shekẹl ujori esan rẹ utehru; Ọghwekpo rọye da ka obaro kẹ.

⁸ O mudia ko gbobọ se edje rẹ Izrẹl, Die ovwan rhi vwo mu ofovwi chivwi? Mẹvwẹ dia ohwo ri Filistia, ovwan ke rha hẹ idibo ri Sọl? Wa jẹ ohwo kẹ oma rẹ ovwan, re we jo bru vwe rhe.

⁹ O de se nene uvwe họnre ro de hwe vwe ghwu, avwanre ke dia idibo rẹ ovwan; ẹkẹvuọvo obọ mẹ da tua nọ ri mi de hwe ghwu, ovwan ke dia idibo rẹ avwanre ko wa ga avwanre.

¹⁰ Ohwo ri Filistia na da ta, Mi gbobo se edje rẹ Izrẹl nonẹ na; wa vwẹ ohwo kẹ vwẹ, rere me vẹ ọye họnre.

¹¹ ọke ri Sọl vẹ Izrẹl vwo nyo eta nana rẹ ohwo ri Filistia na, ofu de dje ayen oshọ de mu ayen.

¹² Asakiephana Devid kẹ ọmọ rẹ ohwo rẹ Efrat ri Bẹtlẹhẹm vwi Juda, re se Jesse, ro vwo emeshare ẹrenre. Vwẹ ọke ri Sọl jẹ ohwo na tobọ ghwanre ọmare o ruẹ.

¹³ Emeshare ri Jesse erha re ekpako nene Sọl kpo ofovwi na; edẹ rẹ emeshare rọye erha ri nene Sọl kpo ofovwi na da dia Ehab rẹ ọmọkpako, ọ rọ vwọ kpahọ kẹ Ahinadab, ọ rerha ki Shammah.

¹⁴ Devid kọye omotete ejobi; emeshare ekpako erha na de nene Sọl,

¹⁵ ẹkẹvuọvo Devid de rhivwi ji Sọl vwo ra ghẹrẹ igodẹ rẹ ọsẹ rọye vwi Bẹtlẹhẹm.

¹⁶ Vwẹ ẹdẹ ujuvẹ soso ohwo ri Filistia na mi rhi mudia obaro, te irhiọke te ovwọnvwọn.

¹⁷ Jesse da ta kẹ Devid rẹ ọmọ rọye, Reyọ iputusẹ rẹ ọka ọyaya nana, kugbe ikara ihwe, mu ayen phẹrẹphẹre vwo rhe iniọvo wẹn vwẹ obo erhọn na.

¹⁸ Reyọ ikori rẹ ọnyọn ihwe vwo rhe olori ro suẹn uriori. Nighe ra nọ obo rẹ oma rẹ iniọvo wẹn epha, re wọ vwẹ iyẹnrẹn rhe vwe.

¹⁹ Asakiephana Sọl, vẹ ayen, kugbe ihwo rẹ Izrẹl ejobi, hẹ iyara rẹ Elah, họnra ihwo ri Filistia na.

²⁰ Devid de vrẹn vwẹ irhiọke ride, o da yan jẹ igodẹ rọye vwo kẹ osun, ọ da reyọ ọko na, ọ da yanran, kirobo ri Jesse ji urhi kẹ, o de rhi te asan erhọn na vwẹ ọke rẹ ayen ra vwọ karedje rẹ ofovwi, ayen ra va iraghwo.

²¹ Ihwo rẹ Izrẹl vẹ ihwo ri Filistia de rhi mu ofovwi dje, unuofovwi so unuofovwi.

²² Devid da yan jẹ ọko na vwo kẹ ohwo rọ vwẹ ẹro te eghwa, ọ da djẹ kpo obo edje rẹ ofovwi na, ọ de re yere iniọvo rọye.

²³ Rọ vẹ ayen vwọ ta ota na, nighe, Ọgba na, ohwo ri Filistia ri Gat, re se Golayat, o de yoro nẹ edje rẹ ihwo ri Filistia rhe, ọ da je ta eghẹre rẹ ota rọ ta jovwo na. Devid de nyo.

²⁴ Ihwo rẹ Izrẹl ejobi, ọke rẹ ayen vwọ mrẹ ọshare na, ke djẹ, oshọ de mu ayen gangan.

²⁵ Ihwo rẹ Izrẹl da ta, Wọ mrẹ ohwo nana ro bru avwanre rhe na? Uyota ọ rhere rhi gbobọ se Izrẹl; ohwo ro hwere, ovie kọ ghwẹ ẹfe buebu kẹ, kọ vwẹ ọmọtẹ rọye vwọ kẹ rọvwọ, kọ ru uwevwi rẹ ọsẹ rọye dia ọmuvwiẹ vwẹ Izrẹl na.

²⁶ Devid da ta kẹ ihwo ri mudia kẹrẹ, kidie e ru kẹ ohwo ro hwe ohwo re Filistia nana, ro de si ehwẹjẹ nẹ Izrẹl oma? Kono upheruphe nana ohwo ri Filistia nana, ro gbobọ se unuofovwi rẹ Ọghẹnẹ ri bẹdẹ na?

²⁷ Ihwo na da kpahe kẹ unuovo tanẹ, ọtiọye e ru kẹ ohwo ro se hwe.

²⁸ Asakiephana Ehab rẹ oniọvo rọye rẹ ọkpako de nyo vwẹ ọke rọ vwọ ta kẹ ihwo na: ophu de mu Ehab kpahe Devid, ọ da ta, Die wọ vwọ rhe obonẹ? Kono wọ yan jẹ imigodẹ yena vwo kẹ vwẹ obo evun rẹ aghwa? Me riẹn anama wẹn, kugbe omaephuo wẹn; kidie wọ de rhe rhi ni ughe rẹ ofovwi na.

²⁹ Devid da ta, Kidie mi ruru? ọ dia ota ghevweghe me tare?

³⁰ O de vrẹn nẹ asan rọ epha bru ohwo ọfa, ọ da je ta ota ọvuọvo na kẹ; ihwo na da je kpahe ota ọvuọvo na kẹ.

³¹ Ọke re vwo nyo eta ri Devid tare na, a da vwẹ ayen gbe ikun kẹ Sọl; o de ji ohwo re se.

³² Devid da ta kẹ Sọl, E jẹn udu bru ohwo ọvuọvo fiki roye-en; odibo wẹn cha ra họnrọ ohwo ri Filistia nana.

³³ Sọl da ta kẹ Devid, Wọ sa ra ra họnre ohwo ri Filistia nana-a; kidie omotete wo ruẹ, yẹ ekpuyovwi rọye ohwo rẹ ofovwi nẹ emọ rhe.

³⁴ Ẹkẹvuọvo Devid da ta kẹ Sọl, Odibo wẹn je churu igodẹ kẹ ọsẹ rọye, ọke rẹ okpohrokpo vwo bro rhe, eyẹ okorhi, rhi mu ogodẹ vwẹ usun rẹ uchuru na,

³⁵ Me vwọ tua me da ghwiẹ mi de sivwo nẹ unu rọye; ọke rọ vwọ họrhọ nene uvwe, me da yọnrọn ẹtuegba rọye me da vwọ fa otọ hwe.

³⁶ Odibo wẹn hwe ikpohrokpo kugbe ikorhi; upheruphe nana ohwo ri Filistia kọ họhọ ọvo vwẹ usun rẹ ayen, kidie o gbobo se unuofovwi rẹ Ọghẹnẹ ri bẹdẹ na.

³⁷ Devid da ta, Ọrovwohwo ro sivwi vwe nẹ ẹkuobọ rẹ okpohrokpo kugbe ẹkuobọ rẹ okorhi na, ko ji sivwi vwe nẹ obọ ri Filistia nana. Sọl da ta kẹ Devid, Yanran, Ọrovwohwo nene uwe dia.

³⁸ Etiyin Sọl de ku ewun rẹ ofovwi rọye phihọ Devid oma; ọda vwẹ erhu rẹ utehru vwo tughẹ uyovwi; o de ku ewun rẹ utehru phihọ oma.

³⁹ Devid da vwẹ ọlọkọ rọye yan oma rọye, ọ tanẹ yan ki gbigbirigbi, kidie o ji ku ayen phihọ dẹvo-o. Etiyin Devid da ta kẹ Sọl, Me sa vwe enana ya-an kidie me je ghwa ayen dẹvo-o, Devid de ku ayen nu.

⁴⁰ Etiyin ọ da reyọ ọkpọ rọye, o da sanọ ibieragha rioriorio iyori nẹ evun rẹ umuto na rhe, o de phi ayen phihọ ekpu rẹ ibefi rọye; ọda yọnrọn udorokun vwẹ ọbọ rọye, ọ de si kẹrẹ ohwo ri Filistia na.

⁴¹ Ohwo ri Filistia na da rhe rhi sikẹrẹ Devid, vẹ ohwo rọ ghwa ekpọfia rọye vwẹ obaro rọye.

⁴² Ọke rẹ ohwo ri Filistia vwo ni, rọ vwọ mrẹ Devid, ọ da jẹfia; kidie omotete o ruẹ, tubie tubie yoyovwi.

⁴³ Ohwo ri Filistia na da ta kẹ Devid, Mẹvwẹ eranko, ru wọ vwọ kua ikpokpo bru vwe cha? Ohwo ri Filistia na da vwẹ ẹdjọ rọye duvwu Devid iyori.

⁴⁴ Ohwo ri Filistia na da ta kẹ Devid, Yan bru vwe rhe, ke me vwẹ uvwo rẹ oma wẹn kẹ emephran rẹ obenu na kugbe eranvwe re hẹ obo aghwa na.

⁴⁵ Etiyin Devid da ta kẹ ohwo ri Filistia na, Wọ vwẹ ọlọkọ kugbe oshuẹ kugbe ubiri bru vwe cha; ẹkẹvuọvo me vwẹ odẹ rẹ Ọrovwohwo rẹ otu ofovwi na, kugbe Ọghẹnẹ rẹ unuofovwi rẹ Izrẹl bru we cha, ohwo ru wo gbobọ se na.

⁴⁶ Nonẹ na Ọrovwohwo ko phi we phihọ obọ mẹ, ke me ghwiẹ wẹ she, ke me fian uyovwi nẹ uwe; ke me vwẹ irivwi rẹ urogho rẹ ihwo ri Filistia na vwọ kẹ emephran rẹ obenu na kugbe eranvwe rẹ aghwa na nonẹ; re akpọ na ejobi riẹn nẹ Ọghẹnẹ ghine hẹ Izrẹl na,

⁴⁷ Ọghwẹgbe nana kọ riẹn nẹ Ọrovwohwo vwẹ ọlọkọ vẹ oshue vwọ sivwẹ-ẹ; kidie ofovwi na ọ rẹ Ọrovwohwo ko phi we phihọ obọ mẹ.

⁴⁸ Ọke rẹ ohwo ri Filistia na vwo vrẹn rhi sikẹrẹ Devid, Devid da djẹ kpata kpata kpo obo edje re ofovwi ra vwa ohwo ri Filistia na.

⁴⁹ Devid de dje obọ phihọ ekpu rọye ọ da tọrọ ubioragha, o de djuo, o de shemu arhare rẹ ohwo ri Filistia na; ubioragha na de kporo ruọ arhare, o de she bọvwọ opharo rhuotọ.

⁵⁰ Etiyin Devid da vwẹ udọrọkun vẹ ubioragha hwe ohwo ri Filistia na o de phi ohwo ri Filistia na kua, o de hwe ghwu; Ọlọkọ rhe Devid vwẹ obọ-ọ.

⁵¹ Etiyin Devid da djẹ ra bẹrẹ agada sa ohwo ri Filistia na, ọ da yọnrọn ọlọkọ rọye o de yoro nẹ ako rọye rhe, o de hwe, ọ da vwọ nyavwe uyovwi roye no. Ọke rẹ ihwo ri Filistia vwọ mrẹ nẹ ọgba rayen ghwu nure, ayen da djẹ.

⁵² Ihwo rẹ Izrẹl kugbe Juda de vrẹn va iroghwo ayen da vwọ tua ihwo ri Filistia na rhiri re te Gat vẹ ughere rẹ Ekrọn, ọtiọye na ihwo ra woma vwẹ usun rẹ ihwo ri Filistia na de she teye idjerhe nẹ Shaaraim rhiri re te Gat vẹ Ekrọn.

⁵³ Ihwo rẹ Izrẹl de rhivwi nẹ ẹvwọtua ri ihwo ri Filistia na, ayen de re gborho erhọn rayen.

⁵⁴ Devid de mu uyovwi rẹ ohwo ri Filistia na, ọ da vwọ rhe Jerusalẹm; ẹkẹvuọvo ọ da ghwẹ ekuakua rẹ ofovwi rọye phihọ uwevwi rọye.

⁵⁵ Ọke ri Sọl vwọ mrẹ Devid ro bru ohwo ri Filistia na ra, ọ da ra kẹ Abner, onotu rẹ unuofovwi rọye, Abner, ono vwo emeghele nana? Abner da ta, Obo rẹ ẹnwẹn wẹn herọ na, E ovie, Me sa ta-a.

⁵⁶ Ovie na da ta, Ra guọnọ otọ rẹ ohwo ro vwo emeghele nana.

⁵⁷ Ri Devid vwo rhivwi nẹ ofovwi rẹ ohwo ri Filistia na cha, Abner da reyọ, o de vwo rhe Sọl vẹ uyovwi rẹ ohwo ri Filistia na vwẹ obọ rọye.

⁵⁸ Sọl da ta kẹ, Wẹ ọmọ rẹ ono, emeghele na? Dẹvid da kpahe, Mẹvwẹ ọmọ rẹ odibo wẹn Jesse ohwo ri Bẹtlẹhẹm.