1 Samuẹl 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jẹ Ọghọ emuo ri Sọl kugbe Ẹsiọn rọye

¹ Samuẹl da ta kẹ Sọl, Ọrovwohwo ji vwe rhe nẹ me vwẹ evwri ghworo uwe ru wọ dia ovie vwẹ enu rẹ ihwo rọye Izrẹl; Asakiephana gba kerhọ rẹ eta rẹ Ọrovwohwo na.

² Enẹ Ọrovwohwo rẹ otuofovwi na tare, Mi che hwe ihwo rẹ Amalẹk re dia ukọn kẹ ihwo rẹ Izrẹl vwẹ idjerhe, rẹ ayen vwo nẹ otọ rẹ Ijipt cha.

³ Asakiephana gba ra ghwọrọ Amalẹk, re wọ guọghọ obo rẹ ayen vwori ejobi; wo jẹ ayen vwo-o, ẹkẹvuọvo hwe ọshare te aye, emeboba ri vievie kugbe imitete, erhuẹn ọshare vẹ igodẹ, kamẹl kugbe ekẹtẹkẹtẹ.

⁴ Etiyin Sọl de se ihwo na o de kere ayen vwi Telaim, uriori uri rẹ ihwo re vwẹ owọ yan, kugbe ihwo uriori ihwe ri Juda.

⁵ Sọl de rhi te orere rẹ ihwo rẹ Amalẹk, ayen da rhe hwa phihọ vwẹ iyara na.

⁶ Sọl da ta kẹ ihwo ri Ken, Yanran, we bioma, nẹ ohri rẹ ihwo rẹ Amalẹk, eyẹ me da rha guọghọ ovwan kugbe ayen; kidie we nẹ arodọvwẹ kẹ ihwo rẹ Izrẹl ejobi rẹ ayen vwo nẹ otọ rẹ Ijipt cha. Etiyin ihwo ri Ken de bioma nẹ ihwo rẹ Amalẹk na.

⁷ Sọl de phi ihwo rẹ Amalẹk kua, nẹ Havila re te Shur rọ hẹ obaro ọnre rẹ Ijipt.

⁸ Ọ de mu Agag ovie rẹ Amalẹk ọkpokpọ, ọ da vwẹ ọlọkọ nyavwe ihwo na ejobi hwe.

⁹ Ẹkẹvuọvo Sọl vẹ ihwo na de ji Agag vwo, kugbe igodẹ ri me yovwi kugbe irhuẹn eshare kugbe eranvwe vẹ ivwri, kugbe emọ rẹ igegede kugbe obo ri me yovwi ejobi, o rhe hwe ayen ejobi tototo-o; obo ri tuoma ri fi emuọvo-o ejobi ayen de hwe eyena.

¹⁰ Ota rẹ Ọrovwohwo de bru Samuẹl rhe:

¹¹ Ọ davwẹ gangan nẹ mi vwi Sọl mu ovie; kidie ọ chuko ku vwe nure o gbi nene uvwe-e, o ru obo ri mi ji urhi rọye kẹ-ẹ. Ivun de miovwi Samuel; ọda viẹ se Ọrovwohwo vwẹ ason yena ejobi.

¹² Samuẹl de vrẹn vwẹ irhiọke ride ra vwa Sọl; a da vuẹ Samuẹl nẹ Sọl kpo Kamẹl, nighere, ọ ra vwẹ osusu vi kẹ oma rọye o de rhivwi, ọ da wan yanran, re te Gilgal.

¹³ Samuẹl da rhe vwa Sọl, Sọl da ta kẹ, Ebruphihọ kẹ wẹ vwẹ oma rẹ Ọrovwohwo; mi ruru kirobo rẹ Ọrovwohwo ji urhi rọye kẹ vwẹ nure.

¹⁴ Samuẹl da ta, ọna ki didi ekpere rẹ igodẹ mi nyo na, kugbe imu-u rẹ erhuẹn mi nyo na?

¹⁵ Sọl da ta, E mu ayen mie ihwo rẹ Amalẹk rhe; kidie ihwo na yan jẹ i ri me yovwi vwẹ igodẹ na kugbe irhuẹn na vwọ, re a vwẹ ayen ze izobo kẹ Ọrovwohwo Ọghẹnẹ wẹn i ri chekọ avwanre da guọghọ ayen tototo.

¹⁶ Etiyin Samuẹl da ta kẹ Sọl, Mudia! Me vuẹ wẹ obo rẹ Ọrovwohwo ta kẹ vwẹ vwẹ ason nana. ọ da ta kẹ, Gba ta.

¹⁷ Samuẹl da ta, Dede na wọ havwere vwẹ ẹro wẹn, o dia owẹ olori rẹ Izrẹl na-a? Ọrovwobwo vwẹ evwri ghworo uwe nẹ wọ dia ovie vwẹ Izrẹl.

¹⁸ Ọrovwohwo de ji we uwevwi, ọ da ta, Yanran, wọ ra guọghọ iruimwemwu na tototo, ihwo rẹ Amalẹk na, ru wọ họnre aye rhiri bẹsiẹ wo vwo hwe ayen re.

¹⁹ Kidie sorọ wo gbi rhe mu ọghọ kẹ urhuru rẹ Ọrovwohwo-o? Die wo di vwo se ofurhu phihọ ekuakua na, ru wo vwo ru obo re brare vwẹ obaro rẹ Ọrovwohwo?

²⁰ Sọl da ra kẹ Samuẹl, Mi mu ọghọ kẹ urhuru rẹ Ọrovwohwo, Me yan uwevwi rẹ Ọrovwohwo ji vwe nure, mi mu Agag ovie rẹ Amalẹk rhe, Me da ghwọrọ ihwo rẹ Amalẹk tototo.

²¹ Ẹkẹvuọvo ihwo na da ghwẹ ekuakua na rhe, igegede kugbe irhuẹn, ekuakua ri me yovwi ra ta nẹ aghworo na, re a vwẹ ayen ze izobo kẹ Ọrovwohwo Ọghẹnẹ wẹn vwi Gilgal.

²² Samuẹl da ta, Wo rori nẹ Ọrovwohwo vwo omavwerhe vwẹ izobo rẹ ẹtorhẹ kugbe izobo re zeri, kirobo rẹ oma vwerhe Ọrovwohwo siẹ re de mu ọghọ kẹ urhuru rọye– Nighe, Ọghọ emuo o yovwi nọ izobo, ra vwọ kerhọ nọ lvwri rẹ egbo.

²³ Kidie urhi ẹchọ epha kerẹ umwemwu rẹ epha, udu ọgangan ọ epha kerẹ orukuruku vẹ ẹdjọ ẹgọ. Fikiridie wọ sen ota rẹ Ọrovwohwo, okpuyovwi rọye je sen we nẹ wo gbe dia ovie-e.

²⁴ Sọl da ta kẹ Samuẹl, Mi ru umwemwu; kidie me cho urhi rẹ Ọrovwohwo kugbe eta wẹn, fikiridie me djẹ oshọ rẹ ihwo na mi de mu ọghọ kẹ urhuru rayen.

²⁵ Asakiephana, me rẹ wẹ, vwẹ imwemwu mẹ ghovwo uvwe, re me vẹ owẹ rhi kpo, rere me ra ga Ọrovwohwo na

²⁶ Samuẹl da ta kẹ Sọl me vẹ owẹ se rhivwi kpo-o, kidie wọ sen ota rẹ Ọrovwohwo, Ọrovwohwo je ghwa sen wẹ nẹ wọ gbe dia ovie vwẹ Izrẹli-i.

²⁷ Ri Samuẹl vwo kuoma rhẹriẹ nẹ ọye cha yanran, Sọl da yọnrọn orhọn rẹ ewun rọye, ọ da ghwa bẹre.

²⁸ Samuẹl da ta kẹ, Ọrovwohwo bẹre uvie rẹ Izrẹl mie we nonẹ na, ọ da vwọ kẹ ọrivẹ wẹn, ro yovwi nọ wẹ.

²⁹ Urinrin rẹ Izrẹl na sa vwọrọ efia-an eyẹ ọ rhẹriẹ-ẹ; kidie ọ dia ohwo rẹ akpọ, ro kuẹrhẹriẹ-ẹ.

³⁰ Etiyin ọ da ta, Mi ru umwemwu; yi dede na bru ọghọ phihọ ovwẹ oma vwẹ irharo rẹ ekpako na kugbe ihwo mẹ Izrẹl, rere wọ vẹ ovwẹ rhivwi kpo, ra ga Ọrovwohwo Ọghẹnẹ wẹn.

³¹ Etiyin Samuẹl vi Sọl de rhivwi; Sọl da ga Ọrovwohwo na.

³² Etiyin Samuẹl da ta, Reyọ Agag ovie rẹ Amalẹk rhe vwe vwẹ etinẹ. Agag de bro rhe vẹ unuehwẹ phiẹphiẹphiẹ. Agag da ta, Uyota odjadja rẹ ughwu na wanre.

³³ Samuẹl da ta, kirobo rẹ ọlọkọ wẹn nẹrhẹ eya dia ẹga na, ọtiọye oni wẹn je dia ẹga vwẹ ohri rẹ eya. Samuẹl de she Agag ibribro vwẹ obaro rẹ Ọrovwohwo vwi Gilgal.

³⁴ Etiyin Samuẹl de rhivwi kpo Ramah; Sọl da yanran kpo uwevwi rọye vwi Gibeah ri Sọl.

³⁵ Samuẹl gbe mrẹ Sọl ọfa-a rhiri re te ẹdẹ ughwu rọye, ẹkẹvuọvo ivun de miovwo Samuẹl fiki ri Sọl. ọ da da Ọrovwohwo nẹ ọye vwi Sọl mu ovie vwẹ enu rẹ Izrẹl.