1 Samuẹl 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ẹdẹ ọvo Jonatan rẹ ọmọ ri Sọl da ta kẹ emeghele rọ ghwa ekuakua rẹ ofovwi rọye, Yanrhe, jẹn avwanre kpo obo unuofovwi rẹ ihwo ri Filistia rọ hẹ abọ oboyi na. Ẹkẹvuọvo ọ ta kẹ ọsẹ rọye-e.

² Yi Sọl ra dia ughere ri Gibeah vwẹ otọ rẹ urhe ri pomegranate rọ hẹ Migrọn; ihwo re vẹ ọye gba hẹ Etiyin da dia kerẹ ujori esan,

³ Ahijah rẹ ọmọ rẹ Ahitub, oniọvo rẹ Ikabod, rẹ ọmọ ri Finihas, rẹ ọmọ rẹ Eli, orherẹn rẹ Ọrovwohwo vwi Shiloh, o de ku ibuluku phihọ. Ihwo na rha riẹn nẹ Jonatan yanra-an.

⁴ Vwẹ asan ohwahwa na, ri Jonatan guọnọ wan kpo obo unuofovwi rẹ ihwo ri Filistia na, eragha chohri chohri da hẹ ẹbẹre nana vẹ ẹbẹre yena; odẹ rẹ ọvo Bozez, odẹ rẹ ọ ro chekọ ki Seneh.

⁵ Abọ ri chohri chohri ọvo de mu kpenu vwẹ obọhwẹre vwẹ obaro ri Mikmash, Ọrivẹ de rhe mu kpenu vwẹ obọrhe ọnre vwẹ obaro ri Geba.

⁶ Jonatan da ta kẹ emeghele rọ ghwa ekuakua rẹ ofovwi rọye na, Yanrhe, jẹn a wanvrẹn kpo obo unuofovwi rẹ ihwo rẹ upheruphe na; ọkeọvo Ọrovwohwo che ru iruo kẹ avwanre; kidie emuọvo sa da Ọrovwohwo obọ ji ro vwo sivwi-i owenẹ oburu eyẹ ọhavweree.

⁷ Ọ rọ ghwa ekuakua rẹ ofovwi rọye na da ta kẹ, Ru emu ejobi rẹ udu wẹn ta kẹ wẹ ni wo ru; nighe, me vẹ owẹ herọ, obo rẹ udu wẹn epha eriyin ọmẹ je epha.

⁸ Eriyin Jonatan da ta kẹ, Nighe, avwanre che kpo oboyi bru ihwo na ra, kẹ avwanre vwẹ oma nẹ ayen.

⁹ Ọ da dianẹ ayen ta kẹ avwanre, Hẹrhẹ bẹsiẹ rẹ avwanre vwo bru ovwan rhe, kẹ avwanre mudia gbiẹi vwẹ asan ọvo, avwanre gbi bru aye ra-a.

¹⁰ Ẹkẹvuọvo ọ da dianẹ ayen tare nẹ, Yan bru avwanre rhe, kẹ avwanre bru ayen ra kidie yẹ Ọrovwohwo phi ayen phihọ obọ rẹ avwanre nure. Ọnana kọ dia oka vwọ kẹ avwanre.

¹¹ Eriyin ayen ivẹ da vwẹ oma rẹ ayen nẹ unuofovwi rẹ ihwo ri Filistia na; ihwo ri Filistia na da ta, Nighe, ihwo ri Hibru na yoro nẹ evun rẹ unu rẹ ayen de sioma nu cha.

¹² Ihwo rẹ unuofovwi na de kuvwie ki Jonatan vẹ ọ rọ ghwa ekuakua rẹ ofovwi rọye, tanẹ. Yan bru avwanre rhe, rere avwanre dje emuọvo kẹ ovwan. Etiyin Jonatan da ta kẹ o ro ghwa ekuakua rẹ ofovwi royẹ, Nene uvwe; kidie Ọrovwohwo phi ayen phihọ obọ rẹ Izrẹl nure.

¹³ Etiyin Jonatan da gadiẹ rhe otọ, ọ rọ ghwa ekuakua rẹ ofovwi rọye na da vwọ kpahọ; Ayen de she kẹ Jonatan, yọ rọ ghwa ekuakua rẹ ofovwi rọye na re hwe ayen nene;

¹⁴ ihwehwe rẹ ẹsosuọ na, ri Jonatan vẹ ọ rọ ghwa ekuakua rẹ ofovwi rọye hweri na, da dia oma rẹ ihwo uje vwẹ asan rẹ ẹrhọnẹ ivẹ vwẹ evun rẹ ẹbẹrotọ.

¹⁵ Uguegue da rhe ro evun rẹ ẹrhọn na, vwẹ evun rẹ udju, kugbe ohri rẹ ihwo na; unuofovwi na kugbe ihwo re rhe imu na ke phariẹ; otọ na de kpogho; o de rhi fi uguegue rode na.

¹⁶ Erhẹrotọ ri Sọl vwi Gibeah ri Bẹnjamin ki no; nighe urogho na ke ghwiẹ kpo enẹ ghwiẹ kpo enẹ.

¹⁷ Etiyin Sọl da ta kẹ ihwo re vẹ ọye gba herọ, Kere ihwo na ra mrẹ ohwo ro nẹ usun na. Ọke rẹ ayen vwo keri, nighe, Jonatan vẹ ọ rọ ghwa ekuakua rẹ ofovwi rọye rha hẹ etiyin-in.

¹⁸ Sọl da ta kẹ Ahijah, Mu ekpeti rẹ Ọghẹnẹ na rhe. Kidie ekpeti rẹ Ọghẹnẹ na nene ihwo rẹ Izrẹl ra vwẹ ọke yena.

¹⁹ Ọke ri Sọl vwọ ta ota kẹ orherẹn na, edo rọ hẹ obo erhọn rẹ ihwo ri Filistia na da rhoma gan phihọ; Etiyin Sọl da ta kẹ orherẹn na, Siobọ wẹn reyọ.

²⁰ Etiyin Sọl vẹ ihwo re vẹ ọye gba herọ da ghwẹ koko kpo ofovwi na; nighe, ayen ohwohwo ke nyavwe ohwo, asan ejobi de rhi tighi ku.

²¹ Kọye rẹ ihwo ri Hibru evo re djẹ bru ihwo ri Filistia ra jovwo re vẹ ayen gbe mu erhọn jovwo, da rhoma kuoma gbe ihwo rẹ Izrẹl ri vi Sọl kugbe Jonatan gba herọ.

²² Ọtiọye rhe, ọke rẹ ihwo rẹ Izrẹl ri sioma nu vwẹ obo orho rẹ ugbenu rẹ Ifrem vwo nyo nẹ ihwo ri Filistia ra djẹ, ayen ejobi da vwọ tua ayen.

²³ Etiyin Ọrovwohwo de sivwi Izrẹl vwẹ ẹdẹ yena; ofovwi na da ghworiẹ kpo abọ oboyi ri Bẹtavẹn.

²⁴ Oma da ghwọrọ ihwo rẹ Izrẹl vwẹ ẹdẹ yena; kidie Sọl duvwu iyori kẹ ihwo na tanẹ, Ekan kẹ ohwo rọ re emu bẹsiẹ rẹ ovwọnvwọn vwo te re me vwọ re ihri vwẹ obọ rẹ ivwighrẹ mẹ nu. Ọtiọye na ayen ọvuọvo gbe davwe emu-u.

²⁵ Ihwo na ejobi de rhi te evun rẹ egbo na; ọnyọn da ro phihọ otọ.

²⁶ Rẹ ihwo na vwo te evun rẹ egbo na, nighe, ọnyọn na re suẹn prapra, ẹkẹvuọvo ohwo ọvuọvo yivwi vwẹ obọ te unu-u, kidie oshọ rẹ iyori na mu ayen.

²⁷ Ẹkẹvuọvo Jonatan nyori vwẹ ọke rẹ ọsẹ rọye vwo duvwu iyori kẹ ihwo na-a; etiyin ọ da reyọ ẹroro rẹ ọkpọ ro rhere vwẹ obọ na, o de duvwo phihọ ẹho rẹ ọnyọn na, ọ da vwẹ obọ rọye te unu; opharo rọye da rhe sasa.

²⁸ Etiyin ọvo vwẹ ihwo na da ta, ọsẹ wẹn duvwu iyori kẹ ihwo na, tanẹ, Ekan kẹ ohwo rọ re emu nonẹ na. Oma ko ro ihwo na.

²⁹ Etiyin Jonatan da ta, ọsẹ mẹ kpokpo otọ na; ni obo rẹ ẹro mẹ rhe sasa, fikiridie me rare ọmọnyọn nana.

³⁰ Mavọ e yovwi te ọ da dianẹ ihwo na re emu tuetue nonẹ na vwẹ usun rẹ emu re gborho mie ivwighrẹ rayen na. kidie Asakiephana ihwehwe re hwe ihwo ri Filistia na gbe rho te-e.

³¹ Ayen da nyavwe ihwo ri Filistia kuotọ vwẹ ẹdẹ yena nẹ Mikmash re te Aijalọn. Oma de ro ihwo na gangan;

³² Ihwo na da kua emu, ayen de mu igodẹ vẹ irhuẹn eshare vẹ emọ rẹ irhuẹn, ayen de hwe ayen vọn otọ; ihwo na da re ayen ekpokpọ vẹ ọbara.

³³ Etiyin ayen da vuẹ Sọl, Nighere, ihwo na re ruẹ umwemwu kpahe Ọrovwohwo, rẹ ayen vwo ria ọbara na. ọ da ta, We ru ogbigbiru; ghorie oragha rode kẹ vwẹ vwẹ etinẹ.

³⁴ Sọl da ta, Hrabọ ro ohri rẹ ihwo na, re wa ta kẹ ayen, E jẹn ohwo ọvuọvo mu erhuẹn ọshare eyẹ ogodẹ rẹye rhe, re hwe ayen vwẹ etinẹ, re wa re; we rhe ruẹ umwemwu kpahe Ọrovwohwo ro wa vwọ ria eranvwe vẹ ọbara-a. Etiyin ayen ohwo ọvuọvo de mu erhuẹn ọshare rọye rhe vwẹ ason yena, e de hwe ayen vwẹ etiyin.

³⁵ Sọl da so agbada kẹ Ọrovwohwo; ọye agbada rẹ ẹsosuọ rọ so kẹ Ọrovwohwo na.

³⁶ Etiyin Sọl da ta, Jẹn avwanre yanran bru ihwo ri Filistia vwẹ ason rere a ra ghwọrọ ayen bẹsiẹ rẹ ọke vwo rhie; e jẹn avwanre jẹ ohwo ọvuọvo rẹ ayen vwo-o. Ayen da ta, Ru obo ri je we. Ẹkẹvuọvo orherẹn na da ta, Ẹ jẹn avwanre si kẹrẹ Ọghẹnẹ tavwe.

³⁷ Sọl de duotọ rọye vwẹ obọ rẹ Ọghẹnẹ, Mi bru ihwo ri Filistia na? ku wo phi ayen phihọ obọ rẹ ihwo rẹ Izrẹl? Ẹkẹvuọvo ọ kpahe kẹ vwẹ ẹdẹ yena-a.

³⁸ Sọl da ta, Yanrhe obonẹ, ovwan isun rẹ ihwo na; we ni re wa riẹn obo rẹ umwemwu nana ru wan rhe nonẹ na.

³⁹ Kidie obo rẹ Ọrovwohwo herọ ro sivwẹ Izrẹl na, owenẹ ọ dia oma ri Jonatan rẹ ọmọ me na, ko ghwu phihọ. Ẹkẹvuọvo o vwo ohwo ọvuọvo vwẹ ohri re ihwo na rọ kpahe kẹ-ẹ.

⁴⁰ Etiyin ọ da kpahe kẹ Izrẹl ejobi ovwan dia abọ ọvọ, mi vi Jonatan rẹ ọmọ mẹ Mm rha dia abọ rivẹ. Ihwo na da ta kẹ Sọl Ru obo ri je we.

⁴¹ Ọtiọye na Sọl da ta, Ẹ Ọrovwohwo Ọghẹnẹ rẹ Izrẹl, die soro wo rha kpahe kẹ odibo wẹn nonẹ-ẹ? Ọ da dianẹ abe na kẹ oma mẹ eyẹ oma rẹ ọmọ mẹ Jonatan kọye ọ epha, Ẹ Ọrovwohwo Ọghẹnẹ rẹ Izrẹl, gba kẹ vwẹ ose; ẹkẹvuọvo ọ da dianẹ abe nana kẹ oma rẹ ihwo rẹ Izrẹl ọ epha, gba kẹ vwẹ Oghori Itẹ de mu Jonatan vi Sọl, ẹkẹvuọvo ọ da rhiẹ ihwo na.

⁴² Etiyin Sọl da ta, Gba rha vwẹ ovwẹ vẹ ọmọ mẹ Jonatan vwo duvwu itẹ. Itẹ de mu Jonatan.

⁴³ Etiyin Sọl da ta kẹ Jonatan, Ta kẹ vwẹ die wo ruru na. Jonatan da ta kẹ, Mi duvwu ọkpọ phihọ ẹho rẹ ọnyọn na me da vwẹ obọ te rarọ; mẹvwẹ na, ki mi ghwu.

⁴⁴ Sọl da ta, Ọghẹnẹ ru ọtiọye kẹ vwẹ ọ rọ tobọ rhonọ ọtiọye rhe; wo je ghwo-o Jonatan.

⁴⁵ Etiyin ihwo na da ta kẹ Sọl, Jonatan ko ghwu, ro ru iruo vẹ obọẹkparo rode vwẹ Izrẹl na? Jọ yena vwo! Obo rẹ Ọrovwohwo herọ na, ogẹto rẹ uyovwi rọye ọvuọvo che she te otọ-ọ; kidie ọ vẹ Ọghẹnẹ ri gbe koko ru iruo nonẹ na. Etiyin ihwo na da tan Jonatan, o gbi rhe ghwu-u.

⁴⁶ Sọl gbe vwọ tua ihwo ri Filistia ọfa-a; ihwo ri Filistia de kpo asan obọ rayen.

⁴⁷ Ọke ri Sọl rhe vwọ re uvie vwẹ Izrẹl nu, ọ da họnre ivwighrẹ rọye vwẹ abọ kabọ ihwo ri Moab, ihwo rẹ Ammọn, ihwo rẹ Edọm, ivie ri Zobah, kugbe ihwo ri Filistia; kasan kasan rọ họnre te o mi phi ayen kua.

⁴⁸ Ọ họnre gangan, o de hwe ihwo rẹ Amalẹk, o de sivwi Izrẹl nu abọ rẹ otu ri gborho ayen.

⁴⁹ Emọ ri Sọl ke ena, Jonatan, Ishivi, kugbe Malkishua; odẹ rẹ emetẹ rọye ivẹ kẹ ena; odẹ rẹ ọ rọ ọkpako ki Merab, ọ rẹ otete ki Mikai.

⁵⁰ Odẹ rẹ aye ri Sọl ke Ahinoam ọmọtẹ rẹ Ahima-az. Odẹ rẹ onotu rẹ ofovwi rọye kẹ Abner ọmọ ri Ner, oniọvo rẹ ọsẹ ri Sọl;

⁵¹ Kish ọye ọsẹ ri Sọl, Ner rẹ ọsẹ rẹ Abner na ke rha hẹ ọmọ rẹ Abiẹl.

⁵² Ofovwi ọgangan ọye Sọl vẹ ihwo ri Filistia phiri vwẹ ẹdẹ rẹ akpọ rọye ejobi; ọke ejobi ri Sọl da mrẹ ọgba, eyẹ ohwo ro yivwaro, o mi ghwe sio te oma.