1 Samuẹl 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A vwẹ ofovwi so ihwo ri Filistia

¹ Sọl da dia ikpe…ọ ghwo te vwẹ ọke rọ vwọ re uvie; ọ da sun ikpe…gbe ivẹ vwẹ Izrẹl.

² Sọl da sanọ ihwo rẹ Izrẹl uriori erha, uriori ivẹ vi Sọl herọ vwẹ obi Mikmash kugbe obo orho rẹ ugbenu ri Bẹtẹl, uriori ọvo vi Jonatan da hẹ Gibeah ri Bẹnjamin; o de siobọ nẹ ihwo ri chekọ kpo, dohwo duwevwi rọye da ra.

³ Jonatan da djẹ unuofovwi rẹ ihwo ri Filistia rọ hẹ Geba; ihwo ri Filistia de nyo Sọl de hworo owanre wan otọ na ejobi, tanẹ, Jẹn ihwo ri Hibru ejobi nyo.

⁴ Izrẹl ejobi de nyo nẹ Sọl djẹ unuofovwi rẹ ihwo ri Filistia. Izrẹl de rhi tu ihwo ri Filistia oma. E de se ihwo na rhe re vwọ ba Sọl vwi Gilgal.

⁵ Ihwo ri Filistia da rhe ghwẹ koko rhe họnre Izrẹl, akpẹrẹ uriori ọgban, ihwo re gua iyesi uriori esan, unuofovwi kerẹ ekpẹn rẹ oma rẹ urhie gbidiki; ayen da rhe rhi mu erhọn vwi Mikmash, vwẹ abọ rọ obaro ọnre vwi Bẹtavẹn.

⁶ Ọke rẹ ihwo rẹ Izrẹl vwọ mrẹ nẹ ayen hẹ ahwarha (kidie ohọnre na ganre gangan), ihwo na de siona nu vwẹ ẹmwa vẹ egbogho vẹ etọ rẹ eragha kugbe ishi vẹ iphrophro rẹ ame,

⁷ evo de shue ame ri Jordan vrẹn kpo otọ ri Gad vi Gilead. Vi Sọl je hẹ Gilgal, ihwo na ejobi ri nenire ke phariẹ.

⁸ Ọ da hẹrhẹ ẹdẹ ighwrẹ, ọke ri Samuẹl bruru; ẹkẹvuọvo Samuẹl je rhe Gilgalu-u, ihwo na da rhe hra vabọ.

⁹ Etiyin Sọl da ta, Reyọ izobo rẹ ẹtorhẹ na rhe vwe, kugbe izobo rẹ ufuoma na. ọ de ze izobo rẹ ẹtorhẹ na.

¹⁰ Ro ghwe vwo ze izobo rẹ ẹtorhẹ na nu, nighe, Samuẹl da ghwa rhe; Sọl da yanran ra vwa o de yere.

¹¹ Samuẹl da ta, Die wo ruru na? Sọl da ta, ọke me vwọ mrẹ nẹ ihwo na djẹ ju vwe vwo, re wọ gbe rhe vwẹ ọke re bruru na-a, ye ihwo ri Filistia na ghwẹ koko gbidi vwi Mikmash,

¹² Me da ta, Asakiephana ihwo ri Filistia na cha họrhọ bru vwe rhe vwi Gilgal, ye me je nọ ekpẹn rẹ ẹroesiri rẹ Ọrovwohwo-o, kọye me da gba oma mẹ, mi de ze izobo rẹ ẹtorhẹ na.

¹³ Samuẹl da ta kẹ Sọl, Wo ru emu rẹ ẹkpa gangan; wọ sa yọnrọn urhi rẹ Ọrovwohwo Ọghẹnẹ wẹ-ẹn; ro ji kẹ wẹ; manẹ Asakiephana yẹ uvie wẹn ka ghwaotọ kokoroko vwẹ Izrẹl bẹdẹ,

¹⁴ Ẹkẹvuọvo Asakiephana uvie wẹn gbe cha tọ-ọn; Ọrovwohwo mrẹ ohwo ọfa ro jere nure; Ọrovwohwo ji vwo mu nẹ ọ dia ovie vwẹ enu rẹ ihwo rọye nure, kidie wọ yọnrọn urhi rẹ Ọrovwohwo ji kẹ wẹ-ẹ.

¹⁵ Etiyin Samuẹl de vrẹn, nẹ Gilgal kpo Gilbeah ri Bẹnjamin. Sọl de keri ihwo re hẹ etiyin, e joma te ujori esan.

¹⁶ Te Sọl, Kugbe Jonatan rẹ ọmọ rọye, kugbe ihwo re vẹ ayen gba hẹ etiyin, da daji Geba ri Bẹnjamin; ẹkẹvuọvo ihwo ri Filistia na de mu erhọn vwi Mikmash.

¹⁷ Ihwo ri muẹ imu de nẹ erhọn rẹ ihwo ri Filistia na rhe vwẹ edje erha; edje ọvo de hirharo ku ọfrah, rọ hẹ otọ ri Shual,

¹⁸ edje ọfa de rhe hirharo ku Bẹthọron, edje ọfa de rhe hirharo ku ughwru ro ni iyara ri Zeboim rọ kẹrẹ obo aghwa.

¹⁹ Vwe ọke nana a rha mrẹ odjogun ọvuọvo vwẹ otọ rẹ Izrẹl na-a; kidie ihwo ri Filistia tare, A da rha mrẹ ohwo ro duvwu ọlọkọ vẹ ubiri vwọ kẹ ihwo ri Hibru;

²⁰ ẹkẹvuọvo kohwo kohwo rẹ Izrẹl de bru ihwo ri Filistia ra ra no eghwro rọye, ubiakpa rọye, ushurhe rọye, eyẹ oda rọye;

²¹ osa ra hwa kẹ omoze rẹ evwri vwẹ eghwro vẹ ubiakpa, ẹkẹ erha ri shekẹl kọye a hwa phihọ ushurhe kugbe ọye e ji vwo bru oghwara.

²² Kọye vwẹ ẹdẹ rẹ ofovwi na a rha mrẹ ọlọkọ eyẹ ubiri vwẹ obọ rẹ ihwo ri vi Sọl kugbe Jonatan gba herọ-ọ; ẹkẹvuọvo Sọl vi Jonatan vwo ayen.

²³ Unuofovwi rẹ ihwo ri Filistia de kpo asan ohwahwa ri Mikmash.