1 Samuẹl 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Evwiẹ ri Samuẹl

¹ Ọshare ọvo herọ vwi Ramataim-zophim vwẹ obo orho rẹ ugbenu rẹ Ifrem, re se odẹ rọye Elkanah, ọmọ rẹ Elihu, rẹ ọmọ ri Tohu, rẹ ọmọ ri Zuf, ohwo rẹ Ifrem.

² O vwo eya ivẹ; odẹ rẹ ọvo Hanah, odẹ rẹ ọrivẹ Peninah. Peninah de vwiẹ emọ, ẹkẹvuọvo Hanah vwiẹri-i.

³ Asakiephana ọshare na kukpe kukpe kọye o vwo nẹ orere rọye ra gẹga o mi ji ze izobo kẹ Ọrovwohwo rẹ otuofovwi na vwi Shiloh, asan rẹ emọ rẹ Eli ivẹ, Hofni kugbe Finihas, da hẹ irherẹn rẹ Ọrovwohwo.

⁴ Vwẹ ẹdẹ rẹ Elkanah de ze izobo, ọ me ghare ẹkẹ vwọ kẹ Peninah rẹ aye rọye kugbe emeshare rọye vẹ emetẹ rọye;

⁵ dede ivun rẹ Hanah vwerhọ na, yẹ ẹkẹ ọvuọvo sogono ọye ọ kẹ, fikiridie Ọrovwohwo kanre asun uvwiẹ rọye.

⁶ Yẹ ophrophro rọye kparọ ophu gangan, kọ nẹrhẹ phihọ ota, fikiridie Ọrovwohwo kanre asun uvwiẹ rọye.

⁷ Ọtiọye kọye o ruẹ kukpe kukpe; kọke kokẹ ro kpo uwevwi rẹ Ọrovwohwo na kẹ ọtiọye ọ kparọ ophu. Ọtiọye na Hanah kọ viẹ ọ gbe rhọvwa rie emu-u.

⁸ Elkanah, rẹ ọshare rọye, da ta kẹ, Hanah, die wọ vwọ viẹ? Die wo vwo jẹ emu ẹriọ? Die nẹrhẹ udu wẹn muoma phihọ? Me rho nọ emọ ihwe kẹ wẹ-ẹ?

⁹ Rẹ ayen vwọ re nu da nu vwi Shiloh, Hanah de vrẹn. Asakiephana Eli rẹ orherẹn na tidia vwẹ agbara rọ hẹ oma rẹ uchivwo rẹ anurhoro rẹ uwevwi rẹ Ọrovwohwo na.

¹⁰ Ivun miovwiro hwe kọ nẹ ẹrhovwo kẹ Ọrovwohwo, jọ viẹ pata pata.

¹¹ Etiyin o de ve ive ọ da ta, E Ọrovwohwo rẹ otuofovwi, wo de ghine ni oma ẹlaghọ rẹ odibo wẹn rẹ wọ da karohọ ovwẹ odibo wẹn rẹ ọmọtẹ rha chọrọ owẹ ẹro-o, ẹkẹvuọvo wọ da kẹ odibo wẹn rẹ ọmọtẹ ọmọ, ke me vwọ kẹ Ọrovwohwo vwẹ ẹdẹ rẹ akpọ rọye ejobi, anre rhe te uyovwi rọye-e.

¹² Rọ vwọ nẹ ẹrhovwo kẹ Ọrovwohwo na, Eli de nẹ unu rọye so.

¹³ Hanah ra ta ota vwẹ udu rọye; ẹbẹrunu rọye ọvo ri kpogho, ye nyo urhuru rọye-e; fiki rẹ ọtiọye na Eli de vwo roro aye rẹ udi muẹ.

¹⁴ Eli da ta kẹ, Mavọ udi mu we krite? Si idi ri mu we na nẹ oma wẹ

¹⁵ Ẹkẹvuọvo Hanah da kpahe, Ẹjo, ọrovwovwe, Mẹvwẹ aye rẹ ivun dia djọghọ djọghọ; Me da wain siẹvo kẹ udi ọganga-an, ẹkẹvuọvo ọdavwẹ mẹ ọye me ta kẹ Ọrovwohwo.

¹⁶ Wọ vwẹ odibo rẹ ọmọtẹ wẹn roro aye fanrhiẹ fanrhiẹ-ẹ, kidie ẹnwan kugbe ivuemiovwo rọ hẹ udu mẹ ọye me ta phia na.

¹⁷ Etiyin Eli da ta, Yanran vwẹ ufuoma, Ọghẹnẹ rẹ Izrẹl o ru obo ru wọ yare mie na kẹ wẹ.

¹⁸ ọ da ta, Jẹn odibo wẹn rẹ ọmọtẹ mrẹ aroesiri vwẹ obọ wẹ. Etiyin aye na da yanran ọ da re emu, o gbi mu oma phihọ ọfa-a.

¹⁹ Ayen vrẹnri vwẹ irhiọke ayen da ra ga Ọrovwohwo; ayen de rhivwi kpo uwevwi rayen vwi Ramah. Elkanah vẹ aye rọye da mroma, Ọrovwohwo da karophihọ;

²⁰ vwẹ emerha Hanah da mrevun o de vwiẹ ọmọshare, o de se odẹ rọye Samuẹl, kidie ọ tare, Me nọ ekpẹn rọye mie Ọrovwohwo.

²¹ Ohwo na Elkanah vẹ uwevwi rọye ejobi da yanran re ze izobo rẹ ẹgbukpe kẹ Ọrovwohwo, rere ọ rha hwa osa rẹ ive rọye.

²² Ẹkẹvuọvo Hanah gbe ra-a, kidie ọ ta kẹ ọshare rọye, Ọmọ na de brevie nu, ke me reyọ rhe, rọ ra vwẹ oma phia kẹ Ọrovwohwo, rere ọ dia etiyin bẹdẹ.

²³ Ẹlkanah rẹ ọshare rọye da ta kẹ, Ru obo ri shephihọ kẹ wẹ, hẹrhẹ bẹsiẹ rẹ ọmọ na vwo brevie nu; takpe, jẹn ota rẹ Ọrovwohwo sẹ. Etiyin aye na da daji ọ da ghẹrẹ ọmọ rọye, bẹsiẹ ro rhi vwo brevie nu.

²⁴ Ọke ro vwo brevie nu, o de muo, ọ da reyọ erhuẹn ọshare rẹ ikpe erha, iputusẹ rẹ ọka ra nọre, kugbe ọgọ rẹ udi; ọ da reyọ rhe uwevwi rẹ Ọrovwohwo vwi Shiloh; yẹ ọmọ na je hẹ omotete.

²⁵ Etiyin ayen de hwe erhuẹn ọshare na, ayen da vwẹ ọmọ na vwo rhe Eli.

²⁶ Ọ da ta, E, ọrovwovwe: Kirobo wọ herọ na, ọrovwovwe, mẹvwẹ aye ro mudia vwẹ obaro wẹ vwẹ etinẹ ye, rọ nẹ ẹrhovwo kẹ Ọrovwohwo ye.

²⁷ Fiki rẹ ọmọ nana me vwọ nẹ ẹrhovwo na; Ọrovwohwo da kẹ vwẹ obo re me yare mie.

²⁸ Fiki rẹ ọtiọye na mi siobọ no kẹ Ọrovwohwo; uchọke ro dia akpọ na krite, mi siobọ no kẹ Ọrovwohwo. Ayen da ga Ọrovwohwo vwẹ etiyin.