1 Pita 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oragha Ọkpokpọ na kugbo Ẹgborho Ọfuanfon na

¹ Vwẹ ọtiọye na we siobọ nẹ ọnko kugbe ophiẹvwe kugbe omeru kugbe ophọphọvwe ejobi.

² Kere emọ boba, rẹ urhuru rẹ evie rẹ erhi siẹ, rere ovwan vwọ sa rho te esivwo;

³ kidie ovwan davwe arodọvwẹ rẹ Ọrovwohwo nure.

⁴ Bro rhe, bru oragha ro jeghwo na rhe, rẹ ihwo senre na ẹkẹvuọvo ra jẹreyọ ghaghare vwẹ obaro rẹ Ọghẹnẹ.

⁵ Ekpuyovwi rẹ ovwan ke họhọ eragha ri jeghwo ra vwọ họn uwevwi rẹ erhi, uvwie rẹ irherẹn fuanfon, re gọ iye rẹ erhi rẹ Ọghẹnẹ miere vwẹ oma ri Jesu Kristi.

⁶ Kidie e siro phihọ ọbe ọfuanfon na: Nighe, me ra vwẹ oragha ọvo vi vwi Zayọn, oragha rẹ ubienyẹ ra jẹreyọ rọ ghare, ohwo ro sere gbuyota oma gbe vuọ-ọ.

⁷ Vwẹ kẹ ovwan ri seregbuyota, ọ epha ghaghare, ẹkẹvuọvo vwọ kẹ otu ri seregbuyota-a, Oragha na kpekpe rẹ ebọn ebabọn senre o rhi hirhe phihọ ọ ro vwo uyovwi vwẹ ubienyẹ

⁸ kugbe, Oragha rọ cha kprọ ihwo awọ, oragha rọ cha nẹrhẹ ayen she; ọ cha kprọ ayen awọ fikiridie ayen mu ọghọ kẹ ota na-a, kirobo re rhiẹ ayen phihọ nẹ ayen ru.

⁹ Ẹkẹvuọvo ovwan uvwiẹ ra jẹreyọ, uvwiẹ rẹ irherẹn, ẹgborho ọfuanfon, ihwo robọ rẹ Ọghẹnẹ, rere ovwan vwo se dje iruo rẹ igbunu rẹ ohwo ro se ovwan nẹ ebri rhe vwo kpo urhukpẹ rẹ igbunu rode na.

¹⁰ Devure ovwan dia ihwo jovwo-o ẹkẹvuọvo asakiephana ovwan kẹ ihwo rẹ Ọghẹnẹ; ovwan je mrẹ arodọvwẹ jovwo-o ẹkẹvuọvo asakiephana ovwan mrẹ arodọvwẹ reyọ re.

Yeri kerẹ Idibo rẹ Ọghẹnẹ

¹¹ Imoni re me guọnọre, me rẹ ovwan kerẹ erhorha kugbe otu re hẹ imu re we sioma nẹ urhuru sivwe rẹ ugboma ro nene ẹnwẹn họnra na.

¹² Ru omamọ rẹ uruemu vwẹ ohri ri Keferi na, o da dianẹ ayen mu ọfian rẹ oruchọ bara owẹ jovwo, re ayen sa mrẹ iruo esiri rẹ ovwan ra vwẹ ejiro kẹ Ọghẹnẹ vwẹ ẹdẹ rẹ okpetu na.

¹³ Vwẹ oma kpotọ vwi fiki rẹ Ọrovwohwo vwọ kẹ ukoko rẹ ohwo rẹ akpọ vwo mu, owenẹ ọ dia ovie ro kpenu,

¹⁴ eyẹ osun re jiri nẹ o rhi hwe otu ri ruchọ kugbe rere o rhe jiri otu re riẹn ru.

¹⁵ Kidie ọye ọhọre rẹ Ọghẹnẹ nẹ wo de ru obo ri yovwiri kọ nẹrhẹ ẹkpa ri ghẹghẹ rhuru unu.

¹⁶ Yenre akpọ rẹ ọmuvwiẹ, yẹ wọ rha vwẹ ọmuvwie wẹn ruẹ urhurho rẹ umwemwu-u; yenre kerẹ idibo rẹ Ọghẹnẹ.

¹⁷ Mu ọghọ kẹ ihwo ejobi, Guọnọ imoni. Djẹ oshọ rẹ Ọghẹnẹ. Vwẹ ọghọ kẹ ovie.

Oniru rẹ Ojaẹriọ ri Kristi

¹⁸ Idibo na, vwẹ oma kpotọ kẹ inini rẹ ovwan vẹ ọghọ ejobi, ọ dianẹ kẹ otu ri nẹ arodọvwẹ kugbe otu re dẹnden ọvo-o ẹkẹvuọvo je vwọ kẹ otu ri siaro rhe.

¹⁹ Kidie ka jẹ ohwo na reyọ, ọ da dianẹ ohwo na kerhọn rẹ Ọghẹnẹ, ro de chiri siẹ rọ da reoja ekueku.

²⁰ Die ri te ohwo vwọ, vwẹ ọke rẹ ovwan de ruchọ re de hwe ovwan vwi fiki rọye rẹ ovwan de chiro? Ẹkẹvuọvo ọ da dianẹ ovwan ru obo ri yovwiri rẹ ovwan da reoja fiki rọye re de chirọ, ọye hẹ obo rẹ Ọghẹnẹ guọnọre.

²¹ Kidie ọna e se ovwan rhe, fikiridie Kristi re-oja kẹ ovwan, re ovwan vwo no ru, rere ovwan vwẹ ẹro kere.

²² Ọ ru umwemwu ọvuọvo-o; a mrẹ abe vwẹ unu rọye-e.

²³ Ọke ra vwọ harhọ, ọ rhoma harhe ohwo-o; ẹkẹvuọvo ọ vwẹ ẹro so ohwo ro brorhiẹ ọsosọ.

²⁴ Omaobọ rọye ọ vwọ ghwa oghwa rẹ imwemwu rẹ avwanre vwẹ enu rẹ agbagba, rere avwanre vwo ghwu kẹ umwemwu re a mrasan rhọ kẹ ọvwata. Oma ra wanrọ na ọye e vwo sivwi ovwan.

²⁵ Kidie ovwan ghwrẹ jovwo kerẹ igegede, ẹkẹvuọvo asakiephana ovwan rhivwi bru Osuigegede kugbe Ọrhẹrotọ rẹ ẹnwẹn rẹ ovwan re.