1 Kọrẹnt 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Odibo egbe rẹ Iyinkọn na

¹ E nẹ ohwo kohwo se roro avwanre phihọ, kerẹ idibo ri Kristi kugbe imuidi rẹ igbunu rẹ Ọghẹnẹ.

² Ọ rọ marho a guọnọre nẹ imuidi na dia ihwo ra vwẹ ẹro so.

³ Ẹkẹvuọvo vwọ kẹ vwẹ emu otete kẹ vwẹ rẹ ovwan vwẹ ovwẹ guẹdjọ vwẹ ohri rẹ ovwan eyẹ vwẹ ẹguare rẹ ohwo rẹ akpọ. Ekpuyovwi mẹ dede se guẹdjọ rẹ oma mẹ-ẹ.

⁴ Me karohọ emu ọvuọvo ri mi ru kpahe oma mẹ-ẹ, ẹkẹvuọvo ọ dianẹ me vwẹ ọyena rease-e. Ọrovwohwo re sa vwẹ ovwẹ guẹdjọ.

⁵ Eriyin na wo rhe brorhiẹ tavwe rẹ ọke na ki te-e, tavwe rẹ Ọrovwohwo ke rhe, ohwo rọ cha vwẹ obo re sinu asakiephana vwẹ ebri vwọ phia kugbe obo rẹ udu roro ejobi vwọ phia. Etiyin ohwo ọvuọvo ki che vwo ejiro rọye vwẹ obo rẹ Ọghẹnẹ.

⁶ Me ta eta nana ejobi kẹ oma mẹ vẹ Apolọs rọ dia erere kẹ ovwan, imoni mẹ, rere ovwan vwẹ ẹro kere avwanre yeri kirobo rẹ ọbe ọfuanfon na djeri, rere ovwan ohwo ọvuọvo vwo je oma e phuo kpahe ohwohwo.

⁷ Kidie ono re mrẹ ofẹnẹ vwẹ oma rẹ ovwan? Die wo vwori ro jẹ uwe obọ e te? Wo de rhe vwo nu, die wọ rha vwọ yan eyan kerẹsiẹ ra mrẹ nẹ ọphẹ wọ mrẹ rẹ-ẹ?

⁸ Evun vọn ovwan nure! Ovwan fe nure! Avwanre rha herọ-ọ ovwan kẹ ivie! Mane kẹ ovwan a re uvie, rere avwanre vẹ ovwan ghare isuesun na!

⁹ Kidie mi rori nẹ avwanre iyinkọn eyẹ hẹ ihwo rẹ Ọghẹnẹ vwo dje kuko, kerẹ ihwo re brorhiẹ rẹ ughwu hwe; fikiridie avwanre rhi hirhe oma phihọ ihwo rẹ akpọ vwo nẹ ughe, te emakashe kugbe ihwo rẹ akpọ.

¹⁰ Avwanre kẹ ẹkpa fiki ri Kristi, ẹkẹvuọvo ovwan ghwanre vwẹ evun ri Kristi. Avwanre evwiẹrẹ, ẹkẹvuọvo ovwan ganre. E mu ọghọ kẹ ovwan, ẹkẹvuọvo a phọphọ avwanre.

¹¹ Rhi te ọke nana dẹn na owẹvwe vẹ urhuru rẹ ame hwe avwanre, erharhe rẹ emwa avwanre vwo rhuo, a ghwiẹ avwanre ọhwa, uwevwi dede avwanre vwori-i,

¹² yẹ avwanre suoma, re vwẹ abọ rẹ avwanre wian owian. A harha, yẹ avwanre nẹ ẹrhovwo; e de kpokpo avwanre, yẹ avwanre chiro;

¹³ re de gbe odẹ rẹ avwanre kuẹ, yẹ avwanre guọnọ arhuẹrẹ; avwanre rhi hirhe oma phihọ erhurhu kẹ akpọ na vwẹ asakiephana, kọye ma epha vwẹ asakiephana, avwanre kẹ ekuakua re hwerhe kuẹfia.

¹⁴ Ọ dianẹ ki mi si ọnana re oma vwọ vo ovwa-an, ẹkẹvuọvo re vwo bru ovwan uche kerẹ emọ mẹ re ghare.

¹⁵ Dede nẹ ovwan vwo ihwo buebu ri suẹn ovwan vwi Kristi, yẹ ovwan vwo esẹ buebu-u. Kidie mẹvwẹ kẹ ọsẹ rẹ ovwan vwi Kristi Jesu vwẹ oma rẹ iyẹnrẹ esiri na.

¹⁶ Me rẹ ovwan, we biko, wa vwẹ ẹro kere uvwe.

¹⁷ Fiki rẹ ọtiọye na mi vwo ji Timoti, ọmọ mẹ rẹ ọghaghare ro vwo esegbuyota kpahe Ọrovwohwo, bru ovwan rhe rọ rhe karohọ ovwan kpahe idjerhe mẹ vwi Kristi, kirobo ri mi yono ayen vwẹ asan ejobi vwi ishọshi kishọshi.

¹⁸ Evo re phuoma, kerẹsiẹ ra da mrẹ nẹ mi gbi che bru ovwan rhe-e.

¹⁹ Ẹkẹvuọvo mi rhivwi bru ovwan cha nanana, ọ da dianẹ Ọrovwohwo rhọvwere, ke me guọnọ otọ rọye ọ djanẹ kẹ ota rẹ ihwo ri phuoma na ọvo-o ẹkẹvuọvo ji te ogangan rayen.

²⁰ Kidie uvie rẹ Ọghẹnẹ na dia ọ rẹ ota-a ẹkẹvuọvo ọ rẹ ogangan.

²¹ Die ovwan guọnọre? Me ghwa uphiẹphiẹ bru ovwan rhe, gbenẹ ẹguọnọ vwẹ erhi re dẹndẹn?