1 Kọrẹnt 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ihwo ri ru Iruo kẹ Ọghẹnẹ

¹ Vwọ kẹvwẹ , imoni mẹ, sa ta ota kẹ ovwan kerẹ ihwo rẹ erhi-i, ẹkẹvuọvo kerẹ ihwo rẹ ugboma, kerẹ emọboba vwi Kristi.

² Ameivie me vwọ ghẹrẹ ovwan, ọ dia emu ọganga-an; kidie yẹ ovwan je sa riọ-ọ; rhi te ọke nana ovwan je sa riọ-ọ,

³ Kidie yẹ ovwan je hẹ ugboma. Kidie rẹ omaẹriọ vẹ oseghe vwọ hẹ ohri rẹ ovwan na, ovwan rha dia ọ rẹ ugboma, ri yerẹ zighi zighi kerẹ ihwo diodi?

⁴ Kidie ọke rẹ ọvo da tanẹ, Mẹvwẹ ọ ri Pọl ọfa da rha tanẹ, Mẹvwẹ ọ rẹ Apolọs, ovwan rha dia ihwo ghevweghe?

⁵ Kono hẹ Apolọs? Kidie Pọl epha? Idibo rẹ ovwan wan oma rayen segbuyota, kirobo rẹ Ọrovwohwo ghare kẹ ohwo ọvuọvo.

⁶ Me kọnre, Apolọs ku ame ku, ẹkẹvuọvo Ọghẹnẹ kọye nẹrhẹ ayen djẹ.

⁷ Ọtiọye na te ọ rọ kọnre vẹ ọ rọ ku ame ku fi emuọvo-o, ẹkẹvuọvo Ọghẹnẹ ọvo rọ nẹrhẹ ọ djẹ na.

⁸ Ọ rọ kọnre kugbe ọ ro ku ame ku abavo, ọ vẹ osa rọye ri gbe vwo kirobo rẹ iruo rọye teri.

⁹ Kidie avwanre otu rẹ iruiruo rẹ Ọghẹnẹ; ovwan hẹ udju rẹ Ọghẹnẹ, uwevwi rẹ Ọghẹnẹ na.

¹⁰ Kerẹ uwevwi rẹ Ọghẹnẹ ji vwẹ, kerẹ ohwo rọ bọn uwevwi me tọn uchivwo phihọ nure, ohwo ọfa kọye re bọn phihọ enu rọye. E jẹn ohwo ọvuọvo nite obo rọ bọn phihọ enu rọye wan.

¹¹ Kidie o rhe vwo uchivwo ọfa rẹ ohwo tọn phihọ otọ-ọ nọ ọvuọvo ra tọnre na, ọye hẹ Jesu Kristi.

¹² Asakiephana ohwo da vwẹ oro bọn phihọ enu rẹ uchivwo na, idọnọ ọfuanfon, eragha eghaghare, urhe, ehẹbe, erhan,

¹³ a cha vwẹ iruo rẹ ohwo ọvuọvo phia; kidie Ẹdẹ na cha vwọ phia, fikiridie erhanre cha vwọ phia, erhanre na kọ cha davwẹ iruo rẹ ohwo ovuọvo ruru.

¹⁴ Ọ da dianẹ ebabọn rẹ ohwo ọvuọvo bọnre na mudia vwẹ enu rẹ uchivwo na, ko vwo osa.

¹⁵ Ọ da dianẹ iruo rẹ ohwo na tonro, ọ rọye ko ghwru, dede na e sivwi ekpyovwi rọye na, ẹkẹvuọvo yẹ erhanre ọ cha wanvrẹn.

¹⁶ Ovwan rha riẹn nẹ ovwan hẹ uwevwi rẹ Ọghẹnẹ nẹ Erhi rẹ Ọghẹnẹ dia evun rẹ ovwan?

¹⁷ Ọ da dianẹ ohwo guọghọ uwevwi rẹ Ọghẹnẹ na, Ọghẹnẹ kọ guọghọ ohwo yena. Kidie uwevwi rẹ Ọghẹnẹ na ọfuanfon, ovwan hẹ uwevwi na.

¹⁸ E jẹn ohwo ọvuọvo phiẹn oma rọye-e. Ọ da dianẹ ohwo ọvo vwẹ ohri rẹ ovwan na rori nẹ ọye ghwanre vwẹ oge nana, e gbe jẹn ọ rhoma dia ẹkpa rere ọ ke rhoma ghwanre.

¹⁹ Kidie aghwanre rẹ akpọ nana hẹ ẹkpa vwẹ obọ rẹ Ọghẹnẹ. Kidie e siro, O muẹ ọvwaghwanre vwẹ evun rẹ aghwanre rọye,

²⁰ ọfa, Ọrovwohwo riẹnre nẹ iroro rẹ ọvwaghwanre ighevweghe.

²¹ Ọtiọye na e jẹn ohwo ọvuọvo vwẹ ohwo rẹ akpọ yan eya-an. Kidie emu na ejobi ewẹn.

²² Ọ dia Pọl eyẹ Apolọs eyẹ Kẹfas eyẹ akpọ na eyẹ arhọ eyẹ ughwu eyẹ ọke nana eyẹ ọke rọ cha, ayen ejobi na ewẹn.

²³ Ovwan e ri Kristi; Kristi ke rha ọ rẹ Ọghẹnẹ.