1 Jọn 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Erhi rẹ Ọghẹnẹ kugbe Erhi rẹ Kristi rẹ Ofian na

¹ Imoni re ghare, ovwan se erhi kerhi gbuyota-a, ẹkẹvuọvo wa davwe ayen ni tavwe sẹ ghine erhi rẹ Ọghẹnẹ ayen ruẹ; kidie emraro rẹ ofian buebu ro evun rẹ akpọ na re.

² Vwẹ oma rẹ ọnana ovwan vwọ riẹn Erhi rẹ Ọghẹnẹ; erhi kerhi rọ rhọvwere nẹ Jesu Kristi ghine rhe vwẹ ugboma yọ rẹ Ọghẹnẹ,

³ erhi kerhi rọ gbe rhọvwe Jesu-u yọ dia ọ rẹ Ọghẹnẹ-ẹ. Ọnana hẹ erhi ri Kristi rẹ ofian na, rẹ ovwan nyori nẹ ọcha na, asakiephana e hẹ evun rẹ akpọ na nure.

⁴ Emọ na, ovwan kẹ emọ rẹ Ọghẹnẹ, ovwan ji phi ayen kua nure; kidie ohwo rọ hẹ evun rẹ ovwan na rhonọ ohwo rọ hẹ evun rẹ akpọ na.

⁵ Ayen ihwo rẹ akpọ na, fiki rẹ eriyin na obo rẹ ayen ta kẹ ota rẹ ihwo rẹ akpọ na, akpọ na kọ kerhọn rẹ ayen.

⁶ Avwanre ihwo rẹ Ọghẹnẹ. Ohwo rọ riẹn Ọghẹnẹ kerhọn rẹ avwanre, ohwo rọ rha dia ọ rẹ Ọghẹnẹ-ẹ rha kerhọn rẹ avwanre-e. Vwẹ oma rẹ Ọnana kọye avwanre vwọ riẹn erhi rẹ uyota vẹ erhi rẹ ọchọre.

Ọghẹnẹ hẹ Ẹguọnọ

⁷ Imoni re ghare, e jẹn avwanre guọnọ ohwohwo; kidie ẹguọnọ hẹ ọ rẹ Ọghẹnẹ, ohwo ro vwo ẹguọnọ yẹ Ọghẹnẹ ri vwiẹrẹ kọ riẹn Ọghẹnẹ.

⁸ Ohwo ro vwo ẹgnọnọ-ọ yọ riẹn Ọghẹnẹ-ẹ; kidie Ọghẹnẹ hẹ ẹguọnọ.

⁹ Vwẹ Ọnana kọye ẹguọnọ rẹ Ọghẹnẹ vwọ phia vwẹ o hri rẹ avwanre, nẹ Ọghẹnẹ ji Ọmọ rọye Ọvuọvo na rhe akpọ na, rere avwanre vwọ wan oma rọye rhọ.

¹⁰ Ọnana hẹ ẹguọnọ, ọ dianẹ kẹ avwanre re guọnọ Ọghẹnẹ-ẹ ẹkẹvuọvo ọye re guọnọ avwanre o de ji Ọmọ rọye rhe rhe rhuẹrẹ arhuẹrẹ fiki rẹ imwemwu rẹ avwanre.

¹¹ Imoni re ghare, ọ da dianẹ Ọghẹnẹ guọnọ avwanre te ọtiọye, avwanre ke je guọnọ ohwohwo rhe.

¹² Ohwo ọvuọvo ji rhie ẹro mrẹ Ọghẹnẹ dẹvo-o; avwanre da guọnọ ohwohwo, yẹ Ọghẹnẹ hẹ evun rẹ avwanre, yẹ ẹguọnọ rọye je gba vwẹ evun rẹ avwanre.

¹³ Oma rẹ Ọnana kọye avwanre vwọ riẹn nẹ avwanre hẹ evun rọye yẹ okpuyovwi rọye je hẹ evun rẹ avwanre, fikiridie ọ vwẹ Erhi rọye na vwọ kẹ avwanre.

¹⁴ Avwanre mrẹrẹ avwanre je hẹ iseri nẹ Ọsẹ na ji Ọmọ na rhe nẹ ọ rhe dia Osivwi rẹ akpọ na.

¹⁵ Kohwo kohwo rọ rhọvwere nẹ Jesu hẹ Ọmọ rẹ Ọghẹnẹ, Ọghẹnẹ ke dia evun rọye, kọ je dia evun rẹ Ọghẹnẹ.

¹⁶ Ọtiọye na avwanre ke riẹn ji segbuyota oghẹre rẹ ẹguọnọ rẹ Ọghẹnẹ vwo kẹ avwanre. Ọghẹnẹ hẹ ẹguọnọ, ohwo rọ herọ vwẹ evun rẹ ẹguọnọ yọ herọ vwẹ evun rẹ Ọghẹnẹ, yẹ Ọghẹnẹ herọ vwẹ evun rọye.

¹⁷ Vwẹ evun rẹ Ọnana ẹguọnọ vwọ gba vwẹ oma rẹ avwanre, rere avwanre sa vwẹ ẹro suọ vwẹ ẹdẹ rẹ ẹdjọegno na, fikiridie obo rọ epha na ọtiọye avwanre je epha vwẹ akpọ na.

¹⁸ Ẹguọnọ vwo oshọ-ọ, ẹkẹvuọvo omamọ rẹ ẹguọnọ rọ ghare djẹ oshọ kuẹfia; kidie oshọ vẹ ehwe re gba yan, yẹ ohwo rọ djẹ oshọ ẹguọnọ rọye gbare-e.

¹⁹ Avwanre guọnerọ, fikiridie ọye re ka guọnọ avwanre.

²⁰ Ohwo da tanẹ, Me guọnọ Ọghẹnẹ, yo tuoma re oniọvo rọye, yẹ ọvwọrọn ofian o ruẹ; kidiẹ ohwo rọ sa guọnọ oniọvo rọye ro rhie ẹro mrẹ-ẹ, komavọ o ru sa guọnọ Ọghẹnẹ re jẹ sa mrẹ.

²¹ Urhi nana kọye avwanre reyọ mie, nẹ ohwo rọ guọnọ Ọghẹnẹ ọ je guọnọ oniọvo rọye rhe.