1 Jọn 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emọ rẹ Ọghẹnẹ

¹ Nighe didi ẹguọnọ Ọsẹ na vwo kẹ avwanre, rere e vwo se avwanre emọ rẹ Ọghẹnẹ; kẹ ọtiọye avwanre epha. Fiki rẹ ọtiọye na akpọ na rha riẹn avwanre-e, fikiridie ọ je riẹ-ẹn.

² Imoni re ghare, asakiephana avwanre kẹ emọ rẹ Ọghẹnẹ; yẹ obo rẹ avwanre cha dia vwẹ obọ e ji vughe-e, yẹ ẹkẹvuọvo avwanre riẹnre nẹ ọke rọ da phia, avwanre ke dia kerẹ ọye, kidie avwanre ki rhie ẹro mrẹ obo rọ epha.

³ Kohwo kohwo ro phiẹrohọ ọtiọye ko ru oma rọye fuanfon kirobo rẹ ekpuyovwi rọye fonro.

⁴ Kohwo kohwo ro ru umwemwu yọ reabe rẹ ogbeku; umwemwu ọye hẹ ogbeku rẹ urhi.

⁵ Yẹ ovwan riẹnre nẹ ọ rhere rere ọ rhe ghwẹ imwemwu kufia, ye kaka umwemwu rhere-e.

⁶ Kohwo kohwo rọ hẹ evun rọye se ruẹ umwemwu-u; kohwo kohwo ro ruẹ umwemwu yọ je mrẹ-ẹ yọ je riẹn rhe-e.

⁷ Emọ na, e jẹn ohwo ọvuọvo phiẹn ovwa-an. Ohwo ro ru emu esiri ọye hẹ ọvwata, kirobo rẹ ekpuyovwi rọye hẹ ọvwata na.

⁸ Ohwo ro ru umwemwu hẹ ọmọ rẹ idẹbono; kidie idẹhono hẹ oruimwemwu notọrhe. Fiki rẹ Ọnana ọye Ọmọ rẹ Ọghẹnẹ vwọ rhe rere ọ vwọ mrasan guọghọ iruo rẹ idẹhono.

⁹ Kohwo kohwo rẹ Ọghẹnẹ vwiẹri se ruẹ umwemwu-u; kidie omamọ uruemu rẹ Ọghẹnẹ na hẹ evun rọye, o rhe se ru umwemwu-u fikiridie Ọghẹnẹ ri vwiẹrẹ.

¹⁰ Vwẹ oma rẹ Ọnana kọye e vwo vughe emọ rẹ Ọghẹnẹ, kugbe emọ rẹ idẹbono. kohwo kohwo ro ru umwemwu eyẹ ro tuoma rẹ oniọvo rọye yọ dia ọmọ rẹ Ọghẹnẹ-ẹ.

Guọnọ Ohwowho

¹¹ Kidie Ọnana hẹ ovuẹ ra vuẹ ovwan nọtọrhe nẹ, avwanre guọnọ ohwohwo,

¹² ọ dia ọtiobo ri Ken dia ọmọ rẹ idẹbọno ro de hwe oniọvo rọye na-a. Kidie nẹrhẹ ọtobọ hwe? Fikiridie uruemu rọye pha brabra yẹ oniọvo rọye ọvwata.

¹³ Imoni mẹ, akpọ na de tuoma rẹ ovwan, e jo gbe ovwan unu-u.

¹⁴ Avwanre riẹnre nẹ avwanre nẹ abọ rẹ ughwu kpo arhọ nure, fikiridie avwanre guọnọ imoni na. Ohwo ro vwo ẹguọnọ-ọ yọ hẹ evun rẹ ughwu.

¹⁵ Ohwo kohwo rẹ ivun rẹ omoni rọye miovwiri yẹ ozighẹ o ruẹ, yẹ ovwan riẹnre nẹ ozighẹ vwo arhọ ri bẹdẹ na vwẹ oma rọye-e.

¹⁶ Vwẹ oma rẹ ọtiọna kọye avwanre wan riẹn ẹguọnọ, rọ vwọ vwẹ arhọ rọye kpahe otọ kẹ avwanre; ko ji fo rere avwanre je vwẹ arhọ rẹ avwanre kpahe otọ kẹ imoni rẹ avwanre rhe.

¹⁷ Ẹkẹvuọvo ọ da dianẹ ohwo vwo efe rẹ akpọ na ejobi rọ da mrẹ omoni rọye rẹ akpọ bẹn, ro de chuko kuo, komavọ ẹguọnọ rẹ Ọghẹnẹ vwọ sa dia evun rọye?

¹⁸ Emọ na, we vwo ẹguọnọ rẹ unu ọvo-o eyẹ unu ẹrarọ-ọ ẹkẹvuọvo ọ rẹ uruemu kugbe uyota.

Ẹroẹvwọsuọ vwẹ obaro rẹ Ọghẹnẹ

¹⁹ Vwẹ oma rẹ ọnana kọye avwanre vwọ riẹn otu rẹ uyota na, kọye avwanre vwo se mudia vwẹ obaro rọye,

²⁰ yẹ udu rẹ avwanre ji ghwe brẹhwe avwanre; kidie Ọghẹnẹ rhonọ udu rẹ avwanre, ọ ke rha je riẹn emu ejobi re.

²¹ Imoni re ghare, udu rẹ avwanre rhe bruhwe avwanre-e, avwanre ki se yivwi si kẹre Ọghẹnẹ;

²² obo rẹ avwanre nọrọ ejobi ka mrẹ reyọ, fikiridie avwanre yọnrọn urhi rọye avwanre ki rhe ru obo ri je.

²³ Ọnana kọye hẹ urhi rọye, nẹ avwanre se odẹ rẹ Ọmọ rọye Jesu Kristi gbuyota ra guọnọ ohwohwo, kirobo ro ji urhi kẹ avwanre.

²⁴ Ihwo ejobi re yọnrọn urhi rọye ke dia vwẹ evun rọye, okpuyovwi rọye kọ dia evun rẹ ayen. Vwẹ oma rẹ Ọnana kọye avwanre vwọ riẹn nẹ ọ hẹ evun rẹ avwanre, vwẹ oma rẹ Erhi na rọ vwọ kẹ avwanre.