1 Jọn 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ota rẹ Arhọ na

¹ Ọ rọ herọ notọrhe, rẹ avwanre nyori na, rẹ avwanre vwẹ ẹro mrẹ na, rẹ avwanre vugheri rẹ obọ rẹ avwanre mu yọnre na, vwọ kpahe ota rẹ arhọ na–

² arhọ ra vwọ phia na, avwanre mrẹrẹ, avwanre dia oseri kẹ, arhọ yena ri bẹdẹ na rọ hẹ obọ rẹ Ọsẹ na ra vwọ phia kẹ avwanre na kọye e ghwoghwo kẹ ovwan na–

³ rẹ avwanre mrẹre rẹ avwanre nyori kọye avwanre ghwoghwo kẹ ovwan na, rere avwanre vẹ ovwan vẹ ovwan vwo okugbe ọvo; okugbe rẹ avwanre ọ hẹ obọ rẹ Ọsẹ na kugbe Ọmọ rọye Jesu Kristi.

⁴ Avwanre ki siẹ ọnana rere aghọghọ rẹ avwanre vwọ gba.

Ọghẹnẹ hẹ Urhukpẹ

⁵ Ovuẹ nana rọ vuẹ avwanre na kọye avwanre ghwoghwo kẹ ovwan na, nẹ Ọghẹnẹ hẹ urhukpẹ kaka emebri ọvuọvo rhere-e.

⁶ Avwanre da ta nẹ avwanre vẹ ọye vwo okugbe yẹ avwanre rhoma yan vwẹ evun rẹ ebri, yẹ ofian avwanre vwọrọn yẹ avwanre gbe rha ta uyota-a;

⁷ ẹkẹvuọvo avwanre da yan vwẹ evun rẹ urhukpẹ, kirobo rẹ ekpuyovwi rọye hẹ evun rẹ urhukpẹ na, avwanre ohwohwo ki vwo okugbe kẹ ohwohwo, ọbara ri Jesu Ọmọ rọye kọ hworhẹ avwanre nẹ umwemwu ejobi.

⁸ Avwanre da ta nẹ avwanre ru umwemwu-u, yẹ avwanre phiẹn oma rẹ avwanre, yẹ uyota na gbe hẹ oma rẹ avwanre-e.

⁹ Ẹkẹvuọvo avwanre da fan imwemwu rẹ avwanre, ọye hẹ ohwo rẹ uyota vẹ ọsoso, rọ sa vwẹ umwemwu ghovwo ohwo ọ Me rha hworhẹ avwanre nẹ orukuruku rẹ avwanre ejobi.

¹⁰ Avwanre da ta nẹ avwanre ji ru umwemwu dẹvo-o, yẹ avwanre phiro phihọ ọvwọrọn ofian, ota rọye gbe hẹ evun rẹ avwanre-e.