1 Ivie 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iwevwi efa ri Solomọn bọnre

¹ Ikpe ihwerha ọye Solomọn bọn uwevwi re obọrọye, Ọ da bọn uwevwi na ejobi re.

² Ọ da bọn Uwevwi rọ hẹ obo Egbo ri Lẹbanọn; ugrogro rọye da dia kubit ujori, ohẹhẹre rọye kubit ujuvẹ gbẹ ihwe, enuẹra rọye kubit ọgban, a da bọn phihọ irhiẹ erha vwẹ enu ichivwo rẹ igedu, vẹ eghẹn rẹ igedu re mu kpahe enu rẹ ichivwo na.

³ A da vwẹ igedu hwa obenu rẹ ibruwevwi re hẹ enu rẹ ichivwo ujuvẹ gbẹ iyori na, ihwiori vwẹ urhiẹ ọvuọvo.

⁴ Edọvi rẹ evakpo da hẹ irhiẹ erha, evakpo hirhe aro ku ohwohwo vwẹ edje erha.

⁵ Anurhoro ejobi vẹ evakpo na de vwo edọvi vẹ igogo ẹne, evakpo de hirhe aro ku evakpo vwẹ edje erha.

⁶ Ichivwo a vwọ bọn ọguan na; ugrogro rọye da dia kubit ujuvẹ gbẹ ihwe, ohẹhẹre rọye kubit ọgban; o de vwo ọmọguan vwẹ obaro rẹ ichivwo na, vẹ urhurho vwẹ obaro rayen.

⁷ Ọ da bọn Ekete phihọ Ọguan na vwẹ asan re de brorhiẹ, kọye ọguan re de guẹdjọ; a da vwẹ igedu hwa utuwevwi rọye re te igo rọyen.

⁸ Uwevwi rẹ obọ rọye rọ cha dia na, vwo ighẹn rivẹ vwẹ obuko rẹ ọguna na, je vwẹ oghẹre ọvo na a bọnrọ. Solomọn da je bọn ẹguan kẹre oghẹre nana vwọ kẹ ọmọtẹ ri Fero rọ vwọ rọvwọ.

⁹ Enana ejobi na eragha eghaghare a vwọ bọn ayen, e she ayen uchuche, a vwẹ isara bru ayen, te obuko te obaro, nẹ obotọ rẹ uchivwo na re te enu rẹ ughere, nẹ igbẹhẹ rọ hẹ uwevwi rẹ Ọrovwohwo na re te igbẹhẹ rode na.

¹⁰ Otọ rẹ uchivwo rẹ uwevwi na eragha eghaghare e vwo ruo, eragha ride, eragha rẹ kubit ẹrenre vẹ ihwe.

¹¹ Obenu na ji vwo eragha eghaghare, re sheri uchuche, kugbe igedu.

¹² Ogba rode na de vwo edje erha rẹ eragha re sheri riariẹ, kugbe edje rẹ ugbere rẹ igẹdu; ọtiọye ji te ogba rọ hẹ obo ẹtan uwevwi rẹ Ọrovwohwo na, kugbe ọmọguan uwevwi na.

Iruo ri Hiram ruru vwẹ uwevwi rẹ ẹga na

¹³ Ovie Solomọn de ji ihwo re mu Hiram nẹ Taya rhe.

¹⁴ Ọmọ rẹ ayeuku rẹ ohwo rẹ orua ri Naftali, ọsẹ rọye kẹ ohwo ri Taya ọwena ro bru ẹrovwo; ọ da vọn vẹ aghware ẹruọ, vẹ ona ro vwo duvwu ẹrovwo. O bru Ovie Solomọn rhe, rhi ru iruo rọye.

¹⁵ O de ku ichivwo rẹ ẹrovwo ivẹ, uchivwo ọvuọvo kubit ihwe gbẹ ẹrenre ọye enu rọye, kugbe kubit ihwivẹ kiriariẹ; evun rọye vwa horhohorho, ọkpan rọye da irhiabọ ẹne; uchivwo rivẹ je vwẹ abavo na.

¹⁶ Ọ da je wran ichivwo ivẹ rẹ ẹrovwo, e mu ayen kpahe enu rẹ ichivwo na; enuẹra uchivwo ọvuọvo da dia kubit iyori, enuẹra rẹ uchivwo ro chekọ je ghwa kubit iyori.

¹⁷ Etiyin o de rhuo ariri ivẹ re kerẹ ipe urhiẹ kerẹ ejọnrọn ra kare phihọ ichivwo vwẹ obenu rẹ ichivwo na; ariri ọvo uchivwo ọvo, ariri ọvo ke uchivwo ro chekọ.

¹⁸ Ọtiọye o ji duvwu pomegranate; vwẹ irhiẹ ivẹ riariẹ enu rẹ ariri ọvo, re rhurhu uchivwo rọ hẹ enu rẹ uchivwo na; de je ru oghẹre ọvo na kẹ uchivwo ro chekọ.

¹⁹ Asakiephana ichivwo re mu kpahe enu ichivwo na vwẹ obo evun rẹ uvun na esada e vwo ruo, kubit ẹne.

²⁰ Ichivwo da hẹ enu rẹ ichivwo na ọ da je ka enu asan ọvo rọ riẹn owọ kpo obaro ki riariẹ na vwẹ akakọ rẹ ariri na; pomegranate ujori ivẹ re hẹ etiyin, vwo irhiẹ ivẹ ki riariẹ; ọtiọye je epha kẹ uchivwo ro chekọ.

²¹ O de mu ichivwo re hẹ obo ọmọguan na vi; ọ de vwẹ uchivwo na vi vwẹ obọrhe ọnre o de se odẹ rọye Jakin; o de rhe mu uchivwo na vi abọ rẹ obọhwẹrẹ ọnre ọ de se odẹ rọye Boaz.

²² A da vwẹ esada rhuo obenu rẹ ichivwo na. Kọye iruo rẹ ichivwo na vwo re.

²³ Etiyin o de duvwu abadi ọwram na; o de ki riariẹ, kubit ihwe nẹ eghẹn rẹ ẹgbẹn, enuẹra rọye kubit iyori, okiriariẹ rọye kẹ kubit ọgban ọye a ma .

²⁴ A da biẹn ekpan phihọ obotọ rẹ ẹgbẹn rọye na, kerẹ kubit ọgban, riariẹ abadi na phihọ; ekpan na da hẹ urhurhiẹ ivẹ, e kuro kugbe vwẹ ọke re vwo kuo.

²⁵ O de mudia vwẹ enu rẹ irhuẹn eshare ihwivẹ, erha hirhe aro ku obọhwẹre ọnre, erha hirhe aro ku obuko ọnre, erha hirhe aro ku obọrhe ọnre, erha hirhe aro ku obaro ọnre; e de mu abadi na kpahe enu rayen, ekuakua rẹ hẹ obuko jovwo e de hirhi ayen phihọ evun.

²⁶ Ọkpan rọye te ọkpan rẹ ẹkuobọ; a da ma ẹgbẹn rọye kerẹ ẹgbẹn rẹ uko, kerẹ ododo ri lili; ọ sa gba oze ra vwọ họ uriori ivẹ.

²⁷ Ọ da ma igburhukpe ihwe rẹ ẹrovwo; ugrogro rẹ ogburhukpẹ ọvo kubit ẹne, ohẹhẹre rọye kubit ẹne enuẹra rọye kubit ẹne.

²⁸ E nẹ kọye a ma igburhukpẹ na: ayen de vwo ephapha, a da vwẹ ephapha na kpahe enu rẹ edọvi na.

²⁹ Vwẹ ephapha re mu kpahe edọvi na ikpohrokpo da herọ, irhuẹn eshare, kugbe shẹrobim. Vwẹ obenu rẹ edọvi na, ji te obenu vẹ obotọ rẹ ikpohrokpo na vẹ irhuẹn eshare na, ọnvwe re meri hẹhẹre da herọ.

³⁰ ọ rọ marho ogburhukpẹ ọvuọvo da vwo idjugẹ rẹ ẹrovwo ẹne kugbe ugbogho rọ hẹ uherevie rọye; vwẹ igogo rọye ẹne na aghọn de herọ re muẹ oze rẹ ẹhọ kpahe. Eghọn na e ku ayen, vẹ ọnvwe vwẹ akakọ rẹ ọvuọvo.

³¹ Asan ro de rhie phihọ na de yoro phia kubit ọvo kpuke vwẹ obenu; asan ro de rhie phihọ na de ki riariẹ, kerẹ obo ri djuẹ riariẹ, ukokodo rọye kubit ọvo gbẹ ubro. Asan ro de rhie phihọ na a kare ekuakua phihọ; ephapha rọye kẹ igogo ẹne abavo, ọ dianẹ o ki riariẹ-ẹ.

³² Idjugẹ na ẹne na da hẹ otọ rẹ ephapha na; ugbogbo rẹ idjugẹ na vẹ igburhukpẹ na e ruro kugbe; enuẹra rẹ idjugẹ ọvo da dia kubit ọvo gbẹ ubro.

³³ Idjugẹ na e de ru ayen kerẹ idjugẹ rẹ ekpẹrẹ rẹ ofovwi; ugbogho rayen, egbẹn rayen, ibigẹn rayen, kugbe imisikẹ na, e ku ayen.

³⁴ Ighere ẹne vwẹ igogo ẹne rẹ ogburhukpẹ ọvuọvo; ighere na vẹ igburhukpẹ ẹbẹre ọvuọvo.

³⁵ Vwẹ obenu rẹ ogburhukpẹ na ufi ọvo hrihrihẹ da herọ kubit ọvo gbẹ ubro kpenu; vwẹ obenu rẹ ogburhukpẹ na edaji rọye vẹ ephapha rọye kugbe ephapha rọye ẹbẹre ọvo vẹ ọye.

³⁶ Vwẹ obo uphephẹ rẹ edaji rọye vẹ ephapha rọye na, ọ da kare shẹrobim, ikpohrokpo, kugbe iriẹn phihọ, kirobo rẹ uvwre rẹ ọvuọvo epha, vẹ ẹnwẹ re riarierẹ phihọ.

³⁷ oghẹre ọtiọna na kọye o ru igburhukpẹ ihwe na; e ku ayen ejobi na họhọ ohwohwo, vwẹ ovwavwọn ọvuọvo kugbe oghẹre ọvuọvo.

³⁸ O de duvwu ize ihwe rẹ ẹrovwo; oze ọvuọvo ọ yọnrọn usiobọ ujuvẹ, ovwavwọn rẹ oze ọvuọvo kubit ẹne, oze ọvuọvo kẹ igburhukpẹ ihwe na.

³⁹ ọ de mu igburhukpẹ na vi, iyori vwẹ abọ rẹ obọrhe ọnre vwẹ uwevwi na; ọ da rha vwẹ abadi na vi vwẹ obọrhe rẹ obaro ọnre vwẹ akakọ rẹ uwevwi na.

⁴⁰ Hiram da je ma echẹ na rhe, kugbe isaboro na, kugbe ize na. Ọtiọye na Hiram de ru iruo rẹ uwevwi rẹ Ọrovwohwo rẹ ovie Solomọn vwọ kẹ nẹ o ru re:

⁴¹ Ichivwo ivẹ na, erheghe ivẹ rẹ ichivwo na re hẹ enu rẹ ichivwo na, kugbe edje rẹ ariri ivẹ re vwo rhurhu idjokpo ivẹ rẹ ichivwo na re hẹ obenu rẹ ichivwo na;

⁴² kugbe pomegranate ujori ẹne rẹ rhuo phihọ iriri ivẹ na, re vwo rhurhu edje rẹ irhiẹ ivẹ ri pomegranate vwọ kẹ ariri ọvuọvo, rere e vwo rhurhu ize ivẹ re hẹ enu rẹ ichivwo na;

⁴³ igburhukpẹ ihwe na, kugbe ize ihwe na re hẹ enu rẹ igburhukpẹ na;

⁴⁴ kugbe abadi ọvuọvo na, kugbe irhuẹn eshare ihwivẹ re hẹ otọ rẹ abadi na.

⁴⁵ Asakiephana echẹ na, isaboro na, kugbe ize na, ekuakua nana ejobi na re hẹ evun rẹ uwevwi rẹ Ọrovwohwo na, ri Hiram ru kẹ ovie Solomọn, da dia ẹrovwo ra fare.

⁴⁶ Vwẹ uphephẹ ri Jọdan ọye ovie na ku ayen phihọ, vwẹ otọ rẹ ophiẹn rọ hẹ uvwre ri sukọt vẹ Yaretan.

⁴⁷ Solomọn gbe rha sa ovwanvwe ekuakua na ejobi-i, fikiridie ayen bunọ, a sa riẹn uch obo rẹ ẹrovwo na họhọ te-e.

⁴⁸ Etiyin Solomọn de duvwu ekuakua re hẹ uwevwi rẹ Ọrovwohwo na ejobi: agbada rẹ oro na, imẹjẹ rẹ oro na ra vwẹ ikara rẹ opharo kpaha na,

⁴⁹ igburhukpẹ ra vwẹ omamọ rẹ oro duvwu, iyori hẹ abọ rẹ obọrhe ọnre vwẹ akakọ kugbe iyori re hẹ abọ rẹ obọhwẹre ọnre, ravwe re ki che te ẹshẹ rọ hẹ obo ẹtan na; idodo na, irhukpẹ na, kugbe ehwa na, e rẹ oro.

⁵⁰ Iko na, ehwa na, ize na, imize rẹ insẹns, kugbe evwẹrẹ, ra vwẹ omamọ rẹ ọro duvwu, kugbe abọ rẹ oro, ra sa phihọ ẹchẹ re hẹ obo ẹran rẹ uwevwi na, asan rọ ma fon ejobi, kugbe ẹchẹ rẹ uphephẹ rẹ ẹga na.

⁵¹ Kẹ enẹ iruo rẹ Ovie Solomọn ruru vwẹ uwevwi rẹ Ọrovwohwo na de rhi re, Solomọn da ghwẹ ẹrovwe ejobi ri Devid ọsẹ rọye ru fon nu rhe evun rẹ uwevwi, idọnọ efuanfon, oro, kugbe ekuakua, ọ da ghwẹ ayen phihọ uwevwi rẹ efe rẹ Ọrovwohwo na.