1 Ivie 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Solomọn bọn uwevwi Kẹ Ọrovwohwo na

¹ Vwẹ ukpe rẹ ujori ẹne gbe ujọne rẹ vi ihwo rẹ Izrẹl vwo nẹ otọ rẹ Ijipt rhe, vwe ukpe rẹne rẹ uvie ẹriọ ri Solomọn vwẹ Izrẹl, vwẹ emeranvwe ri Ziv, kọye emeranvwe rivẹ, ọye o vwo mu uwevwi rẹ Ọrovwohwo na phihọ ẹbọn.

² Uwevwi rẹ Ovie Solomọn bọn kẹ Ọrovwohwo da dia kubit ujorha vwẹ ugrogro, kubit uje vwẹ ohẹhẹre, kubit ọgban kpenu.

³ Ọguan rẹ utuwevwi na rọ hẹ obaro rẹ uwevwi na da dia kubit uje vwẹ ugrogro, ọ vẹ ohẹhẹre re uwevwi na abavo, ke rha kubit ihwe o vwo kodo vwẹ obaro rẹ uwevwi na.

⁴ Ọ da kare evakpo vẹ edovi vẹ iphrophro phihọ uwevwi na.

⁵ ọ da gba ogba vwọ so uwevwi na riariẹ phihọ, nẹ abọ nana rẹ igbẹhẹ na rhiri re te abọ rivẹ rẹ uwevwi na, te evun rẹ utuwevwi na ra ro obo evun rẹ ẹshẹ; ọ da so erheri riariẹ phihọ.

⁶ Ubruwevwi rọ ka otọ da dia kubit iyori vwẹ ohẹhẹre, ọ rẹ uherevie da dia kubit esan vwẹ ohẹhẹre, Ọ rerha da dia kubit ighwrẹ vwẹ ohẹhẹre; vwẹ obo uphephẹ rẹ uwevwi na e de chivwi eda phihọ rere irhe re vwo vio na vwo jẹ igbẹhẹ na ekporo ruọ.

⁷ Eragha re sheri ra nabọ kare vwẹ obo ọgọdọ, eye a vwọ bọn; vwẹ ọtiọye na e gbi nyo umri re umomo eyẹ ushurhe eyẹ ekuakua rẹ utehru vwẹ evun rẹ uwevwi na, vwẹ ọke ra vwọ bọ-ọn.

⁸ Anurhoro rẹ ubruwevwi rọ ka obotọ na da hẹ obo ọnre rẹ uwevwi na, ichichiyi kọye e vwo yere ra ro uhriẹ uwevwi rẹ uherevie na, nẹ ubruwevwi re uherevie ra ro ọ rerha.

⁹ Kẹ ọtiọye ọ bọn uwevwi na, ọ da bọn rẹ, ọ da vwẹ igbere kugbe ephapha rẹ igedu vwọ hwa obenu re uwevwi na.

¹⁰ Ọ da gba ogba vwọ so uwevwi na ejobi riariẹ, kuẹ ubruwevwi kubit iyori o kpenu te, a da vwẹ ephapha rẹ igẹdu vwọ tan vẹ uwevwi na kugbe.

¹¹ Asakiephana ota rẹ Ọrovwohwo de bru Solomọn rhe,

¹² Vwọ kpahe uwevwi nana ru wọ bọn na, wo de se nene iji mẹ ru wo de mu ọghọ ke ẹgha mẹ ru wo da yọnrọn irhi mẹ ejobi ru wọ da yan vwẹ evun rẹ ayen, ota re Me vẹ owẹ tare ki mi ruo, eta re Me ta kẹ Devid ọsẹ wẹn.

¹³ Ke Me dia uherevie rẹ emọ rẹ Izrẹl, Me gbe sẹn Izrẹl rẹ ihwo mẹ-ẹ.

¹⁴ Solomọn da bọn uwevwi na, ọ da bọn re.

¹⁵ Ọ da vwẹ ephapha rẹ igedu vwọ phare igbẹhẹ rẹ uwevwi na; nẹ otuwevwi re te igo, ọ da rha vwẹ irhe phare obo evun rọye; ọda rha vwẹ ephapha rẹ owangha vwọ hwa otuwevwi rọye.

¹⁶ Ọ da vwẹ ephapha rẹ igedu bọn obuko rẹ uwevwi na rọ rho te kubit uje nẹ otọ re te igo rọye, ọ da bọn phihọ obo etan rẹ ẹshẹ rọ vwọ dia asan rọ ma fon.

¹⁷ Uwevwi na, kọye, uphẹphẹ rọ hẹ obaro rẹ ẹshẹ na, da dia kubit ujuvẹ vwẹ ugrogro.

¹⁸ Igedu rọ hẹ evun rẹ uwevwi na a da karọ kerẹ oghwara vẹ idodo ri rhie phihọ; ejobi na igedu, a mrẹ oragha vwọ-ọ.

¹⁹ Obo ẹtan rẹ uwevwi na kọye a bọn ẹshẹ na phihọ, rere e mu ekpeti rẹ ọphọ rẹ Ọrovwohwo na phihọ etiyin.

²⁰ Ẹshẹ rọ hẹ obo ẹtan na da dia kubit uje vwẹ ugrogro, kubit uje vwẹ ohẹhẹre, kugbe kubit uje kpenu; ọ da nabọ vwẹ omamọ rẹ oro pharọ. Ọ da je kare agbada rẹ igedu.

²¹ Solomọn da nabọ vwẹ omamọ rẹ oro phare evun rẹ uwevwi na, ọ da vwẹ ojọnrọn rẹ oro vwọ tan vrẹn, vwẹ obaro rẹ ẹshẹ rọ hẹ obo ẹtan na, ọ da vwẹ oro vwọ pharọ.

²² Ọ da vwẹ oro phare uwevwi na ejobi re, bẹsiẹ rẹ uwevwi na vwo re. Ji te agbada rẹ ẹshẹ rọ hẹ obo ẹtan na ọ da vwẹ oro vwọ pharọ.

²³ Ọ da vwẹ urhe rẹ oliv vwọ kanre shẹrobim ivẹ phihọ ẹshẹ rọ hẹ obo ẹtan na, ọvuọvo kubit ihwe kpenu.

²⁴ Kubit iyori ọye ugrogro rẹ ibekpe ri shẹrub ọvuọvo, kubit iyori kọye rha hẹ ugrogro rẹ ibekpe rivẹ ri shẹrub na; nẹ oba rẹ ibekpe ọvo re te ọrivẹ da dia kubit ihwe.

²⁵ Shẹrub rivẹ je vwẹ kubit ihwe a vwanvwerọ; sherub ivẹ na ovwanvwọn ọvuọvo je vwẹ oghẹrẹ ọvuọvo.

²⁶ Ugrogro ri sbẹrub ọvo kubit ihwe, ọtiọye shẹrub ro chekọ je epha.

²⁷ O de phi shẹrobim na phihọ obo ẹtan rẹ uwevwi na; shẹrobim na da bẹrẹ ibekpe na ọtiọye na ẹroro rẹ ibekpe ọvo de re duvwu igbẹhẹ ọvo, ibekpe ri sherub ro chekọ de rhe te igbẹhẹ rẹ ẹbẹre rivẹ; ibekpe rayen ivẹ de rhe te ohwohwo vwẹ uherevie rẹ ubruwevwi na.

²⁸ Ọ da vwẹ orọ phare shẹrobim na.

²⁹ Ọ da kare uhoho ri shẹrobim phihọ igbẹhẹ rẹ uwevwi na ejobi riariẹ kugbe iriẹ vẹ idodo ri rhiephihọ vwẹ ivun re hẹ obo ẹtan kugbe ivun re hẹ obo uphephẹ.

³⁰ Utuwevwi rẹ uwevwi na ọ da vwẹ oro vwọ phare evun rẹ uvun rọ hẹ obo ẹtan kugbe e re hẹ obo uphephẹ.

³¹ Ọ da kare ẹchẹ rẹ urhe rẹ ọliv phihọ anurhoro rẹ ẹshẹ na; te uphrophro rẹ edovi na kugbe edovi na de ki riariẹ.

³² Ọ da kare uhoho ri shẹrobim, iriẹ, kugbe idodo ri rhiephihọ phihọ ẹchẹ ivẹ ra vwẹ urhe rẹ ọliv kanre na. Ọ da vwẹ oro vwọ phare ayen, ọ da vwẹ oro tan enu ri shẹrobim na kugbe iriẹ.

³³ Ọtiọye rhe o ji ru phihọ anurhoro rẹ utuwevwi na edovi ra vwẹ urhe rẹ ọliv ru, ọ da họhọ igogo ẹne,

³⁴ ẹchẹ ivẹ ra vwẹ urhe rẹ owangha kanre; ẹbẹre ivẹ rẹ ẹchẹ ọvo e kpirhi ayen, ẹbẹre ivẹ rẹ ẹchẹ ro chekọ e kpirhi ayen.

³⁵ Ọ da kare shẹrobim vẹ iriẹ kugbe idodo ri rhiephihọ phihọ enu rẹ ayen; ọda nabọ vwẹ oro vwọ phare ayen riẹriẹre.

³⁶ Oka rẹ eragha erha re sheri ọyen a vwọ bọn irhie erha rẹ ọguan rọ hẹ obo ẹtan na kugbe urhiẹ rẹ igedu ọvo.

³⁷ Vwẹ ukpe rẹne e de mu uchivwo rẹ uwevwi rẹ Ọrovwohwo na vi, vwẹ emeranvwe ri Ziv.

³⁸ Vwẹ ukpe rihwọvo, vwẹ emeranvwe ri Bul, kọye emeranvwe rẹ ẹrenre, kasan kasan rẹ uwevwi na ejobi de re, kirobo ra guọnọre nẹ ọ dia. Ikpe ighwrẹ ọye ọ vwọ bọn.