1 Ivie 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iruiruo ri Solomọn kugbe ilori rọye

¹ Ovie Solomọn da re vwẹ enu rẹ Izrẹl ejobi,

² enana keye iruiruo rọye ri kpenu; Azaraya ọmọ ri Zadọk kọyẹ orherẹn;

³ Elihọrẹf kugbe Ahija emọ ri Shisha kẹ isiẹbe; Jehoshafat ọmọ rẹ Ahilud kọye ọtota;

⁴ Bẹnaya ọmọ ri Jehoyada kọye ri suẹn otuofovwi na; Zadọk kugbe Abiata kẹ irherẹn.

⁵ Azaraya ọmọ ri Natan kọye hẹ enu rẹ iruiruo; Zabud ọmọ ri Natan kẹ orherẹn kugbe ugbeyan rẹ ovie;

⁶ Ahisha kọye olori rẹ ighẹn na; kugbe Adoniram ọmọ rẹ Abda kọye onotu rọ gba ihwo vwo ru iruo.

⁷ Solomọn de vwo iruiruo ihwivẹ vwẹ Izrẹl ejobi, re kọn okọn rẹ emuọre kẹ ovie vẹ evwruwevwi rọye ejobi; ohwo ọvuọvo kọye re guọnọ obo ra re emeranvwe ọvuọvo vwẹ ẹgbukpe na.

⁸ Enana keye odẹ rayen: Bẹnhọ, vwẹ obo orho rẹ ugbenu rẹ Ifrem;

⁹ Bẹndaka, vwi Makaz, Shaalbim, Bẹtshe-mẹsh, kugbe Elonbẹt-hanan;

¹⁰ Bẹnhẹsẹd vwi Arubbọt (ọye a vwẹ Sukọt vwọ kẹ kugbe otọ ri Hefa ejobi);

¹¹ Bẹnabinadab, vwi Nafatdọ (ọye re vwẹ Tafat ọmọtẹ ri Solomọn vwọ rọvwọ);

¹² Baana ọmọ rẹ Ahilud, vwi Taanak, Megiddọ, kugbe Bẹtshean ejobi rọ kẹrẹ Zaretan vwẹ obotọ ri Jẹzreel, ji nẹ Bẹtshean re te Abẹl-mẹhola, rhiri re te abọ rivẹ ri Jokmeam;

¹³ Bẹngeba, vwi Ramot-giliad (kọye ri vwo ẹko ri Jair ọmọ ri Manasse, ri Gilead, ubrakpọ rẹ Argob na ọ rọye, rọ hẹ Bashan irere ujorha rhuarho ra vwẹ ekpẹn gba ogba riariẹ phihọ kugbe igbere re ẹrovwo).

¹⁴ Ahinadab ọmọ rẹ Iddo, vwi Mahanaim;

¹⁵ Ahimaaz, vwi Nafah (ọ reyọ Basemat ọmọtẹ ri Solomọn vwọ rọvwọ);

¹⁶ Baana ọmọ ri Hushai, vwi Asha kugbe Bealọt;

¹⁷ Jehọshafat ọmọ ri Paruah, vwẹ Issaka;

¹⁸ Shimẹi ọmọ rẹ Ela, vwi Bẹnjamin;

¹⁹ Gebar ọmọ rẹ Uri, vwẹ otọ ri Giliad, orho ri Sihọn ovie rẹ Amọr kugbe Ọg ovie ri Bashan. Oruiruo ọvo je hẹ otọ ri Juda.

Aghwanre kugbe Efe ri Solomọn

²⁰ Juda vẹ Izrẹl epha buebu kerẹ ibiekpẹn re hẹ oma rẹ urhie; ayen ria ayen, ayen je da, oma ghwa vwerhe ayen.

²¹ Solomọn de sun uvie na nẹ Yufretis re te otọ ri Finistia rhiri re te ughwru rẹ Ijipt; ayen da ghwẹ ẹga rhe ayen da ga Solomọn vwẹ ẹdẹ rẹ akpọ rọye ejobi.

²² Emuọre ra ria vwẹ egodo ri Solomọn ẹdọke da dia ovwanvwọn rẹ ọka re duvwuru ọgban, kugbe udemu ujorha,

²³ erhuẹn eshare ihwe ri vwo ivwri kugbe irhuẹn uje ra nabọ vwẹ egbri ghẹrẹ, igodẹ ujori, kugbe izo, vẹ erhua, vẹ iguzuma, kugbe ehọ vẹ ivwri.

²⁴ Kidie ọye vwo ogangan rẹ isuesun vwẹ enu rẹ ubrakpọ ri Yufretis nẹ Tifsah re te Gaza, vwẹ enu rẹ ivie rẹ obuko ọnre vwi Yufretis; oma de fuo vwi kabọ kabọ.

²⁵ Te Juda kugbe Izrẹl da dia vwẹ ufuoma, nẹ Dan re te Beersbeba, dohwo dotọ ri vain rọye kugbe otọ ri fig rọye vwẹ ẹdẹ ri Solomọn ejobi.

²⁶ Solomọn de vwo urhuẹn uriori ujuvẹ kẹ iyesi rọye vẹ ekpẹrẹ re ofovwi rọye, kugbe ihwo uriori ihwivẹ re gua iyesi na.

²⁷ Iruiruo rọye keye re ghwa emuọre na rhe Ovie Solomọn, kugbe ihwo ejobi re rhe re emu vwẹ imẹjẹ rẹ Ovie Solomọn, kuohwo kuemeranvwe rọye; ayen je emuọvo karọ-ọ.

²⁸ Eka gbe ẹbe ra vwọ kẹ iyesi kugbe esi re djẹ ghwraghwraghwra re mu phihọ asan ra guọnọ ayen phihọ, Ọvuọvo vẹ iruo rọye.

²⁹ Ọghẹnẹ da vwẹ aghwanre vẹ ẹruọ vwọ kẹ Solomọn vrẹn ẹka, ọ vẹ udu rọ hẹre ro bu nọ lbiekpẹn rẹ urhie,

³⁰ ọtiọye na aghwanre ri Solomọn da nọ aghwanre rẹ ihwo ejobi re dia obaro-ọnre na, kugbe aghwanre rẹ Ijipt ejobi.

³¹ Kidie ọ ghwanre nọ ihwo ejobi, ọ ghwanre nọ Etan ohwo rẹ Ẹzra, kugbe Heman, Kalkol, kugbe Darda, emọ ri Mahol; usi rọye de kperi ro ẹgborho re riariẹ rẹ phihọ na.

³² O de ji bru isẹ uriori erha; ine ro rori ke rha uriori gbe iyori.

³³ Ọ ta ota kpahe irhe, nẹ igẹdu rọ hẹ Lẹbanọn rẹ te ahworhẹ-orisẹ ro si nene igbẹhẹ; o gbe ikun rẹ eranvwe, vẹ ephran, kugbe eranvwe vẹ esẹn, vẹ iyeri.

³⁴ Ihwo de nẹ asan ejobi rhe rhi nyo aghwanre ri Solomọn, ji nẹ ivie rẹ akpọ na ejobi rhe, ri nyo usi rẹ aghwanre rọye.