1 Ivie 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ehab kugbe Ogba ri Nabọt

¹ Asakiephana Nabọt ohwo ri Jezril de vwo ogba ri vain vwi Jezril, rọ kẹrẹ ekete rẹ Ehab ovie ri Sameria.

² Rẹ Ọnana vwọ wan nu Ehab da ta kẹ Nabọt, Kẹ vwẹ ogba ri vain wẹn na, rere mi vwo ru ogba rẹ ifọ, fikiridie ọ kẹrẹ uwevwi mẹ; ke me vwẹ ogba ri vain ro yovwi nọ owẹ na wene kẹ wẹ; eyẹ, o de je we, me vwẹ igho ghwa osa rọye kẹ wẹ.

³ Ẹkẹvuọvo Nabọt da ta kẹ Ehab, Ọghẹnẹ gha rere mi vwo siobọ nẹ ẹkẹn uku rẹ esẹ mẹ kẹ wẹ.

⁴ Ehab da yanran kpo uwevwi rọye vẹ ophu kugbe opharo ro muphihọ fiki rẹ obo ri Nabọt ohwo ri Jezril ta kẹ; kidie ọ tare nẹ, me sa vwẹ ẹkẹn uku rẹ esẹ mẹ kẹ wẹ-ẹ. O de shevwerhẹ ehwa rọye, ọ da bọvwọn opharo rhuotọ, ọ gbe rhọvwe re emu-u.

⁵ Ẹkẹvuọvo Jezibẹl rẹ aye rọye de bro rhe, ọ da ta kẹ, Die ophu vwo mu we ru wọ gbe ria emu-u?

⁶ ọ da ta kẹ, Fikiridie me ta kẹ Nabọt ohwo ri Jezril, me da ta kẹ nẹ, Shẹ otọ wẹn na kẹ vwẹ, eyẹ o de je we, me vwẹ ogba ri vain ọfa vwo wene kẹ wẹ; ọda kpahe nẹ, Me sa vwẹ ogba ri vain mẹ kẹ wẹ-ẹ.

⁷ Jezibẹl rẹ aye rọye da ta kẹ, ọ dia owẹ ri suẹn Izrẹl? Vrẹn, rere wọ re emu, rere udu wẹn sasa; me cha vwẹ ogba ri vain ri Nabọt ohwo ri Jezril na kẹ wẹ.

⁸ Ọtiọye ọ da vwẹ odẹ rẹ Ehab si ẹbe ọ da vwẹ oka rọye tamuo, ọ da vwẹ ọbe na vwo rhe ekpako vẹ ehọnvwọre ri Nabọt vẹ ayen gba dia orere.

⁹ Ọ de si phihọ evun rẹ ọbe na, Ghwoghwo urhi, re we mu Nabọt kpenu vwẹ ohri re ihwo na;

¹⁰ wa vwẹ erharhe rẹ ihwo ivẹ hirhe aro kuo, re ayen vwẹ urhi muo, tanẹ, Wọ harhe Ọghẹnẹ kugbe ovie. Etiyin ku we sio rhe otafe, re phio hwe.

¹¹ Ihwo rẹ orere nana, ekpako na vẹ ehọnvwọre re dia orere rọye, de ru kirobo ri Jezibẹl vuẹ rhe ayen na. Kirobo re siro phihọ ẹbe re vwo rhe ayen,

¹² ayen de ghwoghwo urhi ayen de mu Nabọt phihọ enu vwẹ ohri rẹ ihwo na.

¹³ Erharhe rẹ ihwo ivẹ na da rhe rhi hirhe aro kuo; erharhe rẹ ihwo ivẹ na da vwẹ urhi mu Nabọt, vwẹ irharo rẹ ihwo na, tanẹ, Nabọt harhe Ọghẹnẹ kugbe ovie. Ọtiọye na ayen de sionẹ orere na, ayen da vwẹ ibieragba phio hwe.

¹⁴ Etiyin ayen da vuẹ rhe Jezibẹl, tanẹ, E phi Nabọt nure: o ghwu nure.

¹⁵ Ri Jezibẹl ghwe vwo nyo nẹ e phi Nabọt hwe nure, Jezibẹl da ta kẹ Ehab, Vrẹu, ra reyọ ọgba ri vain ri Nabọt ohwo ri Jezril, rọ rhọvwe shẹ kẹ wẹ na-a; kidie Nabọt gbe hẹ akpọ-ọ ẹkẹvuọvo o ghwure.

¹⁶ Rẹ Ehab ghwe vwo nyo nẹ Nabọt ghwuru, Ehab vrẹnri kọ yanran kpo ogba ri vain ri Nabọt ohwo ri Jezril re ọ ra reyọ.

¹⁷ Etiyin ota rẹ Ọrovwohwo de bru Ilaija ohwo ri Tish rhe, tanẹ,

¹⁸ Vrẹn, yanran ra vwa Ehab oviẹ rẹ Izrẹl, rọ hẹ Sameria; Nighe, ọ hẹ evun rẹ ogba ri vain ri Nabọt, ọ yanran kpo etiyin ra reyọ.

¹⁹ Ku wọ ta kẹ, E nẹ Ọrovwohwo tare, Wo hwe nure, ku wọ ra reuku? Ku wọ ta kẹ, E nẹ Ọrovwohwo tare Vwẹ asan re eranko da rare ọbara ri Nabọt etiyin ọ da je rare ọbara wẹn.

²⁰ Ehab da ta kẹ Ilaija, Wo rhe bru vwe vwa re E ọvweghrẹ mẹ? ọ da kpahe, Mi bru we vwa, kidie wọ shẹ oma wẹn kẹ umiovwo vwẹ obaro rẹ Ọrovwohwo.

²¹ Nighe, me cha vwẹ umiovwo rhe we; mi che hwerhe uwe kufia kakare, ki mi hwe ọshare kọshare mie Ehab, Ọviẹn eyẹ ọmuvwiẹ, vwẹ Izrẹl;

²² ki mi ru uwevwi wẹn kerẹ uwevwi rẹ Jeroboam ọmọ ri Nebat, kerẹ uwevwi rẹ Baasha ọmọ rẹ Ahija, kidie wọ kpare ophu mẹ, fikiridie wọ nẹrhẹ Izrẹl ru umwemwu

²³ E nẹ Ọrovwohwo ta kpahe Jẹzibel, Eranko cha re Jezibẹl vwẹ ughwru ri Jezril,

²⁴ Ohwo rẹ Ehab ro ghwuru vwẹ evun orere eranko cha riọ; ohwo rọ rhe ghwu vwẹ evun rẹ aghwa emephran rẹ obenu cha riọ.

²⁵ O vwo ohwo ọvuọvo rọ shẹ oma rọye kẹ umiovwo vwẹ obaro rẹ Ọrovwohwo Ehabu-u, rẹ aye rọye Jezibẹl mu vwo ruo.

²⁶ O de gbe ẹgua ro vwo nenesi rẹ ẹdjọ kirobo rẹ ihwo rẹ Amọr ruru, rẹ Ọrovwohwo djẹ nẹ obaro rẹ Izrẹl.

²⁷ Ọke rẹ Ehab vwo nyo eta nana ọ da bẹrẹ emwa rọye, ọ da vwẹ erharhimi rhuo chiri ewẹvwe ọ da vwẹ erharhimi phopho, kọ yan bubu.

²⁸ Ota rẹ Ọrovwohwo de bru Ilaija ohwo ri Tish,

²⁹ Wọ mrẹ obo rẹ Ehab rhe vwẹ oma kẹ vwẹ? Fikiridie ọ vwẹ oma kpotọ kẹ vwẹ me gbe vwẹ umiovwo na rhe vwẹ ọke rọye-e ẹkẹvuọvo ọke rẹ ọmọ rọye ọye me vwọ umiovwo na rhe uwevwi rọye.