1 Ivie 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uchebro ri Devid bru Solomọn

¹ Ọke rẹ ughwu ri Devid vwo si kẹre otọ, ọ da vuẹ Solomọn ọmọ rọye, tanẹ,

² Mi che kpo idjerhe rẹ akpọ ejobi rare. Gba gan oma, re wo dje oma wẹn phia kerẹ ọshare,

³ rere wọ yọnre uchebro rẹ Ọrovwohwo Ọghẹnẹ wẹn, yan phihọ idjerhe rọye kugbe iji rọye, irhi rọye, ẹgha rọye kugbe iseri rọye, kirobo re siro phihọ urhi ri Mosis, rere o vwo yovwi kẹ wẹ vwi kemu kemu wo ru ejobi kugbe kasan kasan wo fovwi oma phihọ ejobi;

⁴ rere Ọrovwohwo vwo ru ota rọye rọ ta kpahe ovwẹ gba, tanẹ, emọ wẹn da jomaotọ vwẹ idjerhe rayen, re ayen da yan nene uvwe vwẹ uyota vwẹ udu rayen ejobi kugbe ẹwẹn rayen ejobi, ohwo gbe sa kanre owẹ-ẹ ro tidia vwẹ ekete rẹ Izrẹl.

⁵ Ọ rọmarho wọ je riẹn obo ri Joab ọmọ ri Zẹruya ru vwe, obo ro ru kẹ inotu rẹ ofovwi rẹ Izrẹl ivẹ, Abna rẹ ọmọ ri Nar, kugbe Amasa rẹ ọmọ ri Jẹtẹr, ro hweri, obo rọ reihri vwẹ ọke rẹ ufuoma ọbara rẹ ihwo re hweri vwẹ ofovwi, ọ da vwe ọbara rẹ eku te umuehu mẹ, kugbe lsabato ri mi ku phihọ awọ.

⁶ Vwẹ ọtiọye na gbe ru kirobo rẹ aghwanre wẹn dje kẹ wẹ, ẹkẹvuọvo wo jẹ ọ vẹ esha uyovwi rọye kpo erivwin rere o ghwu ughwu rẹ ufuoma-a.

⁷ Ẹkẹvuọvo vwẹ obọ dẹndẹn yọnre emọ ri Barzillai rẹ ihwo ri Gilead, gbe jẹn ayen dia usun rẹ ihwo re ria emu vwẹ imẹjẹ wẹn; kidie je vwẹ obọ dẹndẹn na ayen ji vwo yọnrọn ovwẹ vwẹ ọke me vwọ djẹ nẹ obọ rẹ Absalọm ọmọsẹ wẹn.

⁸ Shemei ọmọ ri Gera, ohwo ri Bẹnjamin ro nẹ Bahurim rhe, vẹ owẹ je hẹ etiyin rhe, ọ harhe ovwẹ brabra ri mi vwo kpo Mahanaim; ẹkẹvuọvo rọ rhe vwọ vwa vwẹ vwi Jọdan, me da vwẹ odẹ rẹ Ọrovwohwo duvwu iyori kẹ nẹ, Me cha vwẹ ọlọkọ nyavwe owẹ hwe-e.

⁹ Asakiephana o jẹ abe ẹriọ-ọ, kidie wẹ ohwo ọghwanghwanre; ku wọ riẹn obo ru wo ru kẹ ku wo hwe ọbara rọye kuo uyovwi re te ushi.

Ughwu ri Devid

¹⁰ Etiyin Devid da vwerhẹ kirobo rẹ esẹ rọye vwerhere, e de sho phihọ orere ri Devid.

¹¹ Ọke ri Devid vwọ re ovie vwẹ Izrẹl da dia ẹgbukpe ujuvẹ; orere ikpe ighwrẹn vwi Hebrọn, ikpe ọgban gbe erha vwi Jerusalẹm.

¹² Ọtiọye Solomọn de tidia ekete rẹ ọsẹ rọye Devid; uvie rọye da nabọ ghwaotọ kokoroko.

Solomọn vwẹ Uvie rọye mu

¹³ Etiyin Adonija ọmọ ri Haggit de bru Batsheha rẹ oni ri Solomọn rhe, ọ da ta, Ufuoma wọ vwọ rhe? ọ da kpahe, Ufuoma.

¹⁴ Etiyin ọ da ta, Mi vwo ota re me ta kẹ wẹ; ọ da ta kẹ, Gba ta.

¹⁵ ọ da ta, Wọ riẹnre nẹ uvie na ọmẹ jovwo, Izrẹl ejobi de phi ẹro phihọ nẹ mẹvwẹ re cha riọ; ẹkẹvuọvo uvie na rhe rhoma kpo ọ rẹ ọmọsẹ mẹ, kidie ọtiọye o nẹ obọ rẹ Ọrovwohwo rhe.

¹⁶ Asakiephana mi vwo emuọvo re me cha yare mie we; wo sian kẹ vwẹ-ẹ, ọ da ta kẹ, Gba ta.

¹⁷ ọ da ta, Me rẹ wẹ ta kẹ ovie Solomọn, ọ cha sen kẹ wẹ-ẹ–-rọ vwẹ Abishag rẹ ohwo ri Shunẹm na kẹ vwẹ vwọ rọvwọ.

¹⁸ Batsheba da ta, Oyoma gangan; Me cha vwẹ ifiki wẹ ta kẹ ovie.

¹⁹ Ọtiọye Batsheha de bru Ovie Solomọn, ra ta kẹ fiki rẹ Adonija. Ovie na de vrẹn ra vwa, ọ da nuẹ uyovwi kpotọ kẹ; etiyin o de tidia vwẹ enu rẹ ekete rọye, e de mu aga kẹ oni rẹ ovie, o de tidia vwẹ obọrhe rọye.

²⁰ Etiyin ọ da ta, Mi vwo ememu ọvo re me cha yare mie we; wọ sian kẹ vwẹ-ẹ. Ovie na da ta kẹ nẹ, gba yare onimẹ; kidie me cha sen kẹ wẹ-ẹ.

²¹ Ọ da ta, Jẹn a vwẹ Abishag rẹ ohwo ri Shunẹm na vwọ kẹ Adonija rẹ ọmọsẹ wẹn vwọ rọvwọ.

²² Ovie Solomọn da kpahe kẹ oni rọye, Die wọ vwọ nọ ekpẹn rẹ Abishag ohwo ri Shunẹm na vwọ kẹ Adonija? Gba je nọ ekpẹn rẹ uvie na vwọ kẹ; kidie ọye ọmọsẹ mẹ rẹ okpako Abiata rẹ orherẹn na vẹ ọye hẹ obọ kugbe Joab rẹ ọmọ ri Zẹruya.

²³ Etiyin Ovie Solomọn da vwẹ Ọrovwohwo duvwu iyori, tanẹ, Ọghẹnẹ ru vwe emu ọgangan, ọ da dianẹ Adonija rha vwẹ arhọ rọye hwa osa rẹ ota nana-a!

²⁴ Asakiephana kirobo rẹ Ọrovwohwo herọ na, rọ nẹrhẹ owọ mẹ ghwaotọ na, rọ da vwẹ ovwẹ tidia enu rẹ ekete ri Devid ọsẹ mẹ na, rọ je bọn uwevwi kẹ vwẹ na, kirobo ro veri na, ka teyọ Adonija hwe nonẹ na.

²⁵ Ọtiọye Ovie Solomọn de je Bẹnaya ọmọ ri Jehoyada; ọ da ghwiẹ she, o de ghwu.

²⁶ Ovie na da ta kẹ Abiata rẹ orherẹn na, Yanran kpo Anatọt, asan re eyere wẹn epha; kidie wo fo ughwu. Ẹkẹvuọvo me sa vwẹ ọke nana hwe we-e, fikiridie wẹ ọyen mu ekpeti rẹ Ọrovwohwo Ọghẹnẹ ka obaro kẹ Devid ọsẹ mẹ, fikiridie e kpokpo uwe vẹ ọsẹ mẹ kugbe.

²⁷ Ọtiọye Solomọn da djẹ Abiata nẹ orherẹn rẹ Ọrovwohwo, kọye ota rẹ Ọrovwohwo vwọ gba rọ tare kpahe uwevwi rẹ Eli vwi Shilo.

²⁸ Ọke ri Joab rhi vwo nyo ikun na, kidie Joab vẹ Adonija obọ yẹ ọ vẹ Absalọm dia obọ-ọ–-Joab da djẹ kpo uwevwi rẹ Ọrovwohwo ọ da yọnrọn ighoro rẹ abgada na.

²⁹ Ọke ra vwọ vuẹ Solomọn, Joab djẹ kpo uwevwi rẹ Ọrovwohwo, gbe nighe, ọ hẹ oma rẹ agbada na, Solomọn de ji Bẹnaya ọmọ ri Jehoyada, tanẹ, Yanran ra ghwiẹ she.

³⁰ Bẹnaya da rhe uwevwi rẹ Ọrovwohwo na, ọ da ta kẹ, Ovie tare nẹ, Yan phia. Ẹkẹvuọvo ọ da ta, Ẹjo, mi ghwu phihọ etinẹ. Etiyin Bẹnaya da rhoma vuẹ ohwo rhe ovie, tanẹ, Enẹ Joab tare, ke rha enẹ ọ kpahe kẹ vwẹ.

³¹ Ovie da kpahe kẹ, Ru kirobo rọ tare, Ghwiẹ she rere wo sho; rere wo si abe rẹ ọbara na nẹ uvwe oma kugbe uwevwi rẹ ọsẹ mẹ ọbara rẹ ekun re Joab sun te otọ na.

³² Ọrovwohwo che krun oghwa rẹ uruemu rẹ ọbara ro ruru na nyẹ uyovwi, fikiridie, ọ vuẹ ọsẹ mẹ Devid tavwe rọ ke de vwẹ ọlọkọ hwe eshare ivẹ re dia ọvwata nọ ekpuyovwi rọye, Abna ọmọ ri Nẹr, onotu rẹ ofovwi rẹ Izrẹl, kugbe Amasa ọmọ ri Jẹtẹr, onotu rẹ ofovwi ri Juda.

³³ ọtiọye ọbara rayen cha dia uyovwi ri Joab kugbe uyovwi rẹ uvwiẹ rọye bẹdẹ; ẹkẹvuọvo ufuoma ro nẹ obọ rẹ Ọrovwohwo rhe kọ dia kẹ Devid, vẹ uvwiẹ rọye kugbe uwevwi rọye, kugbe ekete rọye bẹdẹ.

³⁴ Etiyin Benaya rẹ ọmọ ri Jehoyada da yanran, ọ da ra ghwiẹ she o de ghwu; e de sho phihọ uwevwi rẹ obọrọye vwẹ obo evun rẹ aghwa.

³⁵ Ovie de phi Bẹnaya ọmọ rẹ Jehohada phihọ otuofovwi na vwẹ asan ri Joab nuru, ovie de rhe phi Zadọk rẹ orherẹn na phihọ asan rẹ Abiata nuru.

³⁶ Etiyin ovie de ji ikọn re se Shimẹi, ọ da ta kẹ, Tọn uwevwi kẹ oma wẹn vwi Jerusalẹm, rẹ wọ dia etiyin, wo vrẹn nẹ etiyin kpo asan ọfa kakaka-a.

³⁷ Kidie ẹdẹ ru wo vrẹn no, ru wọ da shariẹ uto ri Kidrọn vrẹn, gba riẹn dẹn nẹ ju wo ghwuru; Ọbara wẹn kọ dia uyovwi wẹn.

³⁸ Shimẹi da ta kẹ ovie, Obo wọ tare yovwiri; kirobo rẹ ọrovwovwe ovie tare na, ọtiọye odibo wẹn che ru. Ọtiọye Shimẹi da dia Jerusalẹm ẹdẹ buebu.

³⁹ Ko rhi ru oba rẹ ikpe erha re eviẹn ivẹ ri Shimẹi da rhe djẹ bru Akish, ọmọ ri Maaka, ovie ri Gat. Ọke ra vwọ vuẹ Shimẹi nẹ, Nighe, eviẹn wẹn obi Gat,

⁴⁰ Shimẹi vrẹnri ọ de churu ufi mu iyesi rọye, ọ da yanran kpo Gat bru Akish, ra guọnọ eviẹn rọye; Shimẹi da yanran kpo Gat ra reyọ eviẹn rọye rhe.

⁴¹ Ra vwọ vuẹ Solomọn nẹ Shimẹi vrẹn nẹ Jerusalẹm kpo Gat ro de rhivwi rhe,

⁴² Ovie de ji ikọn re se Shimẹi, ọ da ta kẹ, ọ dianẹ me ta nẹ vwẹ Ọrovwohwo duvwu iyori, mi de rhe bru we uche, nẹ, Riẹn dẹn nẹ ẹdẹ ru wo vrẹn ne etinẹ kpo asan kasan, ku wo ghwu? wọ da ta kẹ vwẹ nẹ mi ruo?

⁴³ Kidie sorọ re wọ gbe kẹnoma kẹ iyroi ru wo duvwu kẹ Ọrovwohwo kugbe urhi ri mi ji kẹ wẹ-ẹ?

⁴⁴ Ovie da je ta kẹ Shimẹi, Wọ riẹn vwẹ udu wẹn emu umwemwu ru wo ru kpahe ọsẹ mẹ Devid; ọtiọye na Ọrovwohwo ko kru oghwa rẹ umwemwu wẹn nyẹ wẹ uyovwi.

⁴⁵ Ẹkẹvuọvo ke bruba kẹ Ovie Solomọn, ektre ri Devid kọ ghwaotọ kokoroko vwẹ obaro rẹ Ọrovwohwo bẹdẹ.

⁴⁶ Etiyin ovie de ji urhi kẹ Bẹnaya ọmọ ri Jehoyada; ọda yanran ra ghwiẹ she, o de ghwu. Ọtiọye na uvie na kọ rhe ghwaotọ vwẹ obọ ri Sọlomọn.