1 Ivie 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ilaija mraro rẹ uvo rode

¹ Asakiephana Ilaija ohwo ri Tish, vwi Gilead, da ta kẹ Ehab, kirobo rẹ Ọrovwohwo Ọghẹnẹ rẹ Izrẹl herọ na, ri mi mudia vwẹ obaro rọye na, asan mrẹ irho eyẹ osio vwẹ ikpe nana-a, jokpa nẹ ota mẹ.

² Ota rẹ Ọrovwohwo de bro rhe,

³ Vrẹn nẹ etinẹ re wo hirhe oma ku obaro ọnre, re wo re sioma wẹn nu vwẹ uto ri Kẹrit, rọ hẹ obaro ọnre vwi Jọdan.

⁴ Ku wọ da ame rẹ uto na, me vwẹ urhi kẹ ikpemu nẹ e ghẹrẹ owẹ vwẹ etiyin.

⁵ Ọtiọye o de re sioma nu kirobo rẹ ota rẹ Ọrovwohwo epha; ọ da yanran ra dia oma rẹ uto ri Kẹrit kọye obaro ọnre vwi Jọdan.

⁶ Ikpemu na de mu emu vẹ eranvwe rhe vwẹ irhiọke, kugbe emu vẹ eranvwe vwẹ ovwọnvwọn; ọ da da ame rẹ uto na.

⁷ Emerha ame rẹ uto na da rhe kpọ, kidie osio je rhọ vwẹ otọ na-a.

Ilaija vẹ ayeuku ri Zarefat

⁸ Etiyin ota rẹ Ọrovwohwo de bro rhe,

⁹ Vrẹn ru wo kpo Zarefat, ri Sidọn, re wọ dia etiyin. Nighere, me ta kẹ ayeuku vwẹ etiyin nẹ ọ ghẹrẹ owẹ.

¹⁰ ọtiọye o vrẹnri o de kpo Zarefat; ro vwo te ughere rẹ orere na, nighere, ayeuku ọvo hẹ etiyin ro du irhe; o de se, ọ da ta, Vwẹ uko jẹ amame rhe vwe, rere me da.

¹¹ Rọ cha vwọ yanran ra jẹ rhe, o de se o da ta, Bru umusi vwọ ba rhe.

¹² Aye na da ta, Kirobo rẹ Ọrovwohwo Ọghẹnẹ wẹn vwọ herọ na, mi vwo emuọvo ra kakere-e, jokpa rẹ omotọ rẹ usi ro chekọ vwẹ egboro, kugbe emevwri vwẹ ukoko. Asakiephana, mi rhi vwirhi emeghọn rẹ irhe, ri mi re gbe kẹ oma mẹ vẹ ọmọ mẹ, re avwanre da riọ nu, ku me ghwẹ.

¹³ Ilaija da ta kẹ, Wọ djẹ oshọ-ọ; yanran wo re ru kirobo wọ tare na; ẹkẹvuọvo ẹsosuọ kẹ bru ẹkẹn mẹ wo vwo rhe vwe tavwe, kẹsiẹye wo ki bru te oma wẹn vẹ ọmọ wẹn.

¹⁴ Kidie enẹ Ọrovwohwo Ọghẹnẹ rẹ Izrẹl na tare, Egboro rẹ usi na se re-e, ukoko re evwri na se re-e, bẹsiẹ rẹ Ọrovwohwo vwọ rhọ osio phihọ otọ na.

¹⁵ ọ da yanran re ru kirobo rẹ Ilaija tare, te aye na, te ọye, vẹ evwruwevwi rọye da dia rhiri.

¹⁶ Egboro rẹ usi na reri-i, eyẹ ukoko rẹ evwri na reri-i, kirobo rẹ ota rẹ Ọrovwohwo rọ wan unu rẹ Ilaija ta epha.

¹⁷ Rẹ Ọnana rhe vwọ wan nu ọmọ rẹ aye na, ro vwo uwevwi na, de rhi she ọga; ọga na ganre gangan ẹnwẹ gbi rhe-e.

¹⁸ ọ da ta kẹ Ilaija, Die wọ mrẹ kpahe ovwẹ, E ohwo rẹ ọfuanfon na? Wọ rhere re a vwọ karophihọ umwemwu mẹ, re e si ughwu hwe ọmọ mẹ.

¹⁹ ọ da ta kẹ, Mu ọmọ wẹn na kẹ vwẹ. ọ da ban ọmọ na kẹ, o de muo kpo enu rẹ uvun ro wo phihọ na, o de muo shevwerhẹ ehwa robọ rọye.

²⁰ O de kperi se Ọrovwohwo, E Ọrovwohwo Ọghẹnẹ mẹ, ku wo rhi si okpetu hwe ayeuku nana ri mi rhi wo na, rere wo hwe ọmọ rọye?

²¹ Etiyin ọ da riẹn oma rọye nene ọmọ na asiarha, o de kperi se Ọrovwohwo, E Ọrovwohwo Ọghẹnẹ mẹ, vwẹ ẹnwẹ rẹ ọmọ na rhoma rhivwi rhe.

²² Ọrovwohwo de nyo urhuru rẹ Ilaija; ẹnwẹ rẹ ọmọ na da rhoma bro rhe, ọ da rhọvwọ.

²³ Ilaija de mu ọmọ na, o de muo nẹ uvun rọye vwẹ obenu rhe uwevwi, o de muo kẹ oni rọye; Ilaija da ta, No, ọmọ wẹn rhọ nure.

²⁴ Aye na da ta kẹ Ilaija, Asakiephana ke Me riẹn vwobọ nẹ wẹ ohwo rẹ ọfuanfon, nẹ ota rẹ ọfuanfon ro nẹ unu wẹn rhe uyota.