1 Ivie 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmrẹ rẹ Ahija kpahe Jeroboam

¹ Vwẹ ọke yena Abija ọmọ ri Jeroboam kọ mwa ọga.

² Jeroboam da ta kẹ aye rọye, Vrẹn, hirhe oma wẹn phihọ oghẹre rẹ ohwo ọfa, rere e vwo je uwe evughe nẹ wẹ aye ri Jeroboam re wo kpo Shilo, nighe, Ahija rẹ ọmraro hẹ etiyin, rọ ta kẹ vwẹ nẹ Me cha dia ovie vwẹ enu rẹ ihwo nana.

³ Reyọ ikara ihwe nene oma, kugbe ọmọko ọka, kugbe ọgọ rẹ ọnyọn, re wo bro ra; ọ cha ta kẹ wẹ obo re cha phia ke ọmọ na.

⁴ Aye ri Jeroboam de ru ọtiọye, o vrẹnri o de kpo Shilo, o de rhi te uwevwi re Ahija. Asakiephana Ahija gbe sa mrẹ orẹ-ẹ, kidie ẹro rọye djeri flklridie ọ ghworo.

⁵ Ọrovwohwo da ta kẹ Ahija, Nighe, aye ri Jeroboam bru we cha che duotọ rẹ ọmọ rọye, kidie ọ mwa ọga. Enẹ vẹ enẹ wọ ta kẹ. Rọ vwọ rhire, kọ vwẹ oma ruẹ aye ọfa.

⁶ Ẹkẹvuọvo ọke rẹ Ahija wo nyo ichihi rọye, ro vwo te annrhoro na, ọ da ta kẹ, Ro uwevwi, aye ri Jeroboam; die wọ rha vwẹ oma ruẹ ohwo ọfa? Kidie a tanẹ mi gbe okpikun ri mi che gbe kẹ wẹ.

⁷ Yanran, ra vuẹ Jeroboam, Enẹ Ọrovwohwo tare, Ọghẹnẹ rẹ Izrẹl na: Fikiridie mẹ kpare owẹ kpenu vwẹ ohri rẹ ihwo na, Me da vwẹ owẹ ru osun rẹ ihwo mẹ Izrẹl,

⁸ Me da bẹrẹ uvie na nẹ uwevwi ri Devid vwọ kẹ wẹ; dede na wọ rha họhọ odibo mẹ Devidi-i, rọ yọnrọn irhi mẹ, rọ da vwẹ udu rọye ejobi vwo nene uvwe, ro ruẹ obo ri yoma ọvo vwẹ ẹro mẹẹ,

⁹ ẹkẹvuọvo wẹ kọye me ru umwemwu no ihwo na ejobi re ka obaro kẹ wẹ wo de re duvwu ẹdjọ efa kugbe ema ra wraure, wọ da kpare ophu mẹ, wo de mu vwe phihọ obuko;

¹⁰ fiki rẹ ọtiọye na nighe, ke me cha so okpetu phihọ uwevwi ri Jeroboam, ke me nyavwe Jeroboam kọshare kọshare, te ọviẹn te ọmuvwiẹ nẹ Izrẹl na ke me ghwọrọ uwevwi ri Jeroboam kakare, kerẹsiẹ rẹ ohwo a da torhẹ isọn bẹsiẹ rọ vwọ ton re kakare.

¹¹ Kohwo kohwo ro nẹ oma ri Jeroboam rhe ro ghwuru vwẹ evun rẹ orere, eranko ke riọ; Kohwo kohwo ro ghwu vwẹ evun rẹ aghwa, emephran ke rha riọ; kidie unu rẹ Ọrovwohwo tarọ nure.

¹² Gbe vrẹn, re wo kpo uwevwi wẹn, ọke wo de ghwe te orere na, ọmọ na ko ghwu.

¹³ Izrẹl ejobi ki che vwere, ki sho; kidie ọye ọvo e che shi vwẹ oma ri Jeroboam, fikiridie ọye ọvo vwẹ uwevwi ri Jeroboam na, ọye ri ru ọbo ri je Ọrovwohwo, Ọghẹnẹ rẹ Izrẹl.

¹⁴ Ọ rọ marho Ọrovwohwo cha vwẹ ovie ọfa mu vwẹ Izrẹl ohwo rọ cha guọghọ uwevwi ri Jeroboam nonẹ. Kẹ etinẹ yanran

¹⁵ Ọrovwohwo kọ cha guọghọ Izrẹl, kirobo rẹ ẹgon kpogho vwẹ enu rẹ ame, ki mi ghwie Izrẹl nẹ otọ esiri na rọ vwọ kẹ esẹ rayen na, ke me hra ayen kpo abọ oboyi ri Yufretis, kidie ayen ru ighriki, vwọ kpare ophu rẹ Ọrovwohwo.

¹⁶ Ko siobọ nẹ Izrẹl fiki rẹ imwemwu ri Jeroboam, ro ruru rọ vwọ nẹrhẹ Izrẹl ru umwemwu.

¹⁷ Etiyin aye ri Jeroboam de vrẹn, o de kpo, o de rhi te Tirza. Ro che vwo te ugana rẹ uwevwi na, ọmọ na de ghwu.

¹⁸ Izrẹl ejobi de sho ayen de vwere, kirobo rẹ ota rẹ Ọrovwohwo wanre, rọ wan unu rẹ odibo rọye Ahija rẹ orherẹn na ta.

¹⁹ Asakiephana uruemu ri Jeroboam ro chekọ, obo ro phi ofovwi te kugbe obo ro sun te, nighe, e si ayen phihọ Ọbe rẹ Ikun rẹ Ivie rẹ Izrẹl na.

²⁰ Ọke ri Jeroboam rere da dia ẹgbnkpe uje gbe ọvo; ọda vwerhẹ kẹrẹ esẹ rọye, Hadab rẹ ọmọ rọye da re vwẹ ẹdia rọye.

Isuesun ri Rehoboam

²¹ Asakiephana Rehoboam ọmọ ri Solomọn yo ria vwi Juda. Reboboam da dia ẹgbukpe ujuvẹ gbe ọvo vwẹ ọke ro vwo mu ẹriọ phihọ, ọ da re ikpe ihwe gbẹ ighwrẹ vwi Jerusalẹm, orere rẹ Ọrovwohwo jẹreyọ vwẹ usun rẹ orua rẹ Izrẹl na, ro phi odẹ rọye phihọ etiyin. Odẹ rẹ oni rọye Naama rẹ ohwo rẹ Amọn.

²² Juda de ru obo re brare vwẹ obaro rẹ Ọrovwohwo, ayen da vwẹ imwemwu re ayen ruru vwọ kpare omẹriọ rọye, nọ obo rẹ esẹ rayen ri chekọ ruru.

²³ Kidie ayen je bọn asan ri kpenu kẹ oma rayen kugbe isunsun, vẹ ighriki vwẹ enu rẹ ugbenu kugbenu ro kpenu kugbe otọ kotọ rẹ irhe ekpokpọ;

²⁴ kugbe ẹgbẹ rẹ eshare de gbe igberadja vwẹ otọ na. Ayen de nenesi rẹ ẹgua rẹ ẹgborho re riariẹ ayen phihọ na rẹ Ọrovwohwo djẹ nẹ otọ na kẹ ihwo rẹ Izrẹl dia.

²⁵ Vwẹ ukpe riyori rẹ Ovie Rehoboam; Shishak ovie rẹ Ijipt da rhe vwọ so Jerusalẹm;

²⁶ ọ da ghwẹ efe rẹ uwevwi rẹ Ọrovwohwo kugbe uwevwi rẹ ovie na kpo; ọ da ghwẹ kemu kemu kpo. ọ je ghwa ekpọfia rẹ oro ri Solomọn duvwuru na kpo.

²⁷ Etiyin ovie Rehoboam de duvwu ekpọfia rẹ ẹrovwo phihọ ẹdia rayen, o de phi ayen phihọ obọ rẹ onotu rẹ ohẹrhẹ, rọ sẹro ẹchẹ rẹ uwevwi rẹ ovie na.

²⁸ Kẹsiẹ kẹsiẹ rẹ ovie na de kpo uwevwi rẹ Ọrovwohwo otu rẹ ohẹrhẹ na me rhoma ghwẹ ayen rhe obo uwevwi rẹ ohẹrhẹ na.

²⁹ Asakiephana eyenre ri Rehoboam, kugbe obo ro ruru ejobi, e rhe si ayen phihọ Ikun rẹ Ẹbe rẹ Ivie ri Juda?

³⁰ Rehoboam vẹ Jeroboam ki phi ofovwi kọke kọke.

³¹ Rehoboam de ghwu bru esẹ rọye e de sho kugbe esẹ rọye vwẹ orere ri Devid. Odẹ rẹ oni rọye Naamah ohwo rẹ Ammọn. Abija rẹ ọmọ rọye da re vwẹ ẹdia rọye.