1 Ivie 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eshe kugbe Ivwighrẹ ri Solomọn

¹ Asakiephana eya erhorha je Ovie Solomọn: Ọmọtẹ ri Fero, kugbe eya ri Moab, eya ri Ammọn, eya ri Edọm, eya ri Sidọn, kugbe eya ri Hẹt,

² nẹ ẹgborho rẹ Ọrovwohwo ta kẹ ihwo rẹ Izrẹl nẹ, Wa rọvwọ aye-en, eyẹ ayen je rọvwọ ovwa-an, kidie ayen cha nẹrhẹ udu rẹ ovwan nene ẹdjọ rayen; enana keye je Solomọn.

³ O vwo eya ujori ighwrẹn, emetẹ rẹ ivie, kugbe esẹn ujori erha; eya rọye de ku udu rọye rhẹriẹ.

⁴ Kidie ọke ri Solomọn rhe vwọ ghwore eya rọye da rhe rhẹriẹ udu rọye rhi nene ẹdjọ efa; udu rọye ki ghevweghe kpahe Ọrovwohwo Ọghẹnẹ rọye, kirobo rẹ udu ri Devid ọsẹ rọye epha.

⁵ Kidie Solomọn kẹ Ashera rẹ ẹdjo rẹ ihwo ri Sidọn kọye o nene, kugbe Milkọm rẹ ẹgua rẹ ihwo rẹ Ammọn.

⁶ Ọtiọye na Solomọn de rhi ru obo re brare vwẹ obaro rẹ Ọrovwohwo, ọ gbe vwẹ udu rọye ejobi nene Ọrovwohwo, kirobo ri Devid ọsẹ rọye ruru-u.

⁷ Etiyin Solomọn da rẹ umukpe kẹ Chemosh ẹgua ri Moab, kugbe Molẹk ẹgua rẹ ihwo rẹ Ammọn, vwẹ obenu rẹ ugbenu vwẹ obaro ọnre vwi Jerusalẹm.

⁸ Ọtiọye kọye o ru kẹ eya erhorha rọye ejobi, re torhẹ insẹns ri ze izobo kẹ ẹdjọ rayen.

⁹ Ivun ri Solomọn de miovwi Ọrovwohwo, fikiridie udu rọye kurhẹriẹ nẹ Ọrovwohwo, Ọghẹnẹ rẹ Izrẹl, rọ vwẹ oma phia kẹ asiava,

¹⁰ o de ji urhi kẹ kpahe emu nana, nẹ o nenesi rẹ ẹdjọ efa-a; ẹkẹvuọvo ọ gbe yọnrọn urhi rẹ Ọrovwohwo jiri-i.

¹¹ Fiki rẹ ọtiọye na Ọrovwohwo da ta kẹ Solomọn, Rẹ Ọnana vwọ dia iroro wẹn ru wọ gbe yọnrọn ọphọ mẹ kugbe iji mẹ ri mi ji kẹ wẹ-ẹ na, vwẹ uyota ki mi si uvie na nẹ oma wẹn ke me vwọ kẹ odibo wẹn.

¹² Yẹ ẹkẹvuọvo fiki ri Devid ọsẹ wẹn mi gbi se ruo vwẹ ọke wẹ-ẹn, ẹkẹvuọvo ọke rẹ ọmọ wẹn mi de sio no.

¹³ Dede na mi ghwe che si uvie na ejobi no re-e; ẹkẹvuọvo ke me yan jẹn orua ọvo vwo kẹ ọmọ wẹn, fiki ri Devid odibo mẹ kugbe fiki ri Jerusalẹm re me jẹreyọ.

¹⁴ Ọrovwohwo de ji ukọn kpahe Solomọn, Haded ohwo rẹ Edọm; je vwẹ uvwiẹ rẹ ovie rẹ Edọm o nurhe.

¹⁵ Kidie ọke ri Devid vwọ hẹ Edọm, ri Joab osun rẹ ofovwi na re vwo shi ihwo re hweri, o de hwe kọshare kọshare vwẹ Edọm

¹⁶ (kidie Joab vẹ ihwo rẹ Izrẹl ejobi dia etiyin emeranvwe esan, bẹsiẹ ro vwo hwe kọshare kọshare rẹ Edọm nu);

¹⁷ ẹkẹvuọvo Hadad da djẹ kpo Ijipt, vẹ ihwo rẹ Edọm ẹvo rẹ idibo rẹ ọsẹ rọye, Hadad je hẹ omotete vwẹ ọke yena.

¹⁸ Ayen de mu oyan nẹ Midian ayen de rhi te Paran, ayen da reyọ ihwo ba oma vwi Paran ayen de rhi te Ijipt, rhe vwa Fero ovie rẹ Ijipt, rọ vwẹ uwevwi kẹ, ọ da vwẹ ẹkẹn emu rọye kẹ, ọ da vwẹ otọ kẹ.

¹⁹ Hadad da mrẹ ẹroesiri vwẹ obọ ri Fero, ọtiọye ọ da vwọ oniọvo rẹ aye rọye vwọ kẹ rọvwọ, oniọvo ri Tafenis aye rọye.

²⁰ ọniọvo ri Tafenis aye rẹ ovie de vwiẹ Genubat ọmọshare kẹ, ri Tafenis ghẹrẹ vwẹ uwevwi ri Fero; Genubat da hẹ uwevwi ri Fero vwẹ ohri rẹ emọ ri Fero,

²¹ Ẹkẹvuọvo ọke ri Hadad vwo nyo vwẹ Ijipt nẹ Devid vwerhẹre kẹre esẹ rọye na Joab rẹ osun rẹ ofovwi na ghwuru, Hadad da ta ke Fero, Jẹn uvwe kpo, rere mi kpo orere rẹ obọ mẹ.

²² Ẹkẹvuọvo Fero da ta kẹ, Die re kanre owẹ vwẹ obọ mẹ ru wọ vwọ guọnọ kpo orho rẹ obọ wẹn? Ọ da ta kẹ, Jẹn uvwe kpo ọvo.

²³ Ọghẹnẹ da je vwẹ ukọn ọfa vwọ suọ, Rezọn ọmọ rẹ Eliada, rọ djẹ nẹ obọ rẹ onini rọye Hadadezer ovie ri Zobah.

²⁴ O de se ihwo ba oma rọye o de rhi hirhe phihọ osun rẹ ihwo re fiọkon phihọ aghwa, kirobo ri Devid je hwe ihwo wan; ayen da yanran kpo Damaskọs, ọ da ra dia etiyin, e de vwo mu ovie vwi Damaskọs.

²⁵ Ọ da dia ukọn rẹ Izrẹl vwẹ ẹdẹ ri Solomọn ejobi, ro ruẹ emu rẹ ogbarogba kirobo ri Hadad ruru; o de tuoma rẹ Izrẹl, ọ da re vwi Siria.

²⁶ Jeroboam rẹ ọmọ ri Nebat, ohwo rẹ Ifrem vwi iferedah, odibo ri Solomọn, odẹ rẹ oni rọye kẹ Yeruah, ayeuku, ọ da jẹ kparobọ vwọ so ovie.

²⁷ Kẹ ọnana obo re sorọ rọ vwọ kpare obọ rọye so ovie na, Solomọn da bọn Milo, o de di asan ro kpori vwẹ orere ri Devid ọsẹ rọye.

²⁸ Ohwo na Jẹroboam ọgba gangan, ọke ri Solomon vwọ mrẹ nẹ emeghele na ọgba owian o de vwo mu olori rẹ otu re mu vwo ruẹ iruo vwẹ uwevwi ri Josẹf.

²⁹ Vwẹ ọke yena, ri Jẹroboam vwọ yan nẹ evun ri Jerusalẹm, ọmraro na Abijah rẹ ohwo ri Shilo da mrẹ vwẹ idjerhe. Asakiephana Ahijah ku ewun ọkpokpọ phihọ; ayen ihwo ivẹ ọvo da rhe vwa oma vwẹ uphẹphẹ phrere.

³⁰ Etiyin Ahijah de shabọ phihọ ewun ọkpokpọ ro rhere na, ọ da bẹrẹ ẹbẹre ihwivẹ.

³¹ Ọ da ta kẹ Jẹroboam, Reyọ ẹbẹre ihwe kẹ oma wẹn; kidie enẹ Ọrovwohwo tare, Ọghẹnẹ rẹ Izrẹl, Nighe, Me cha bẹrẹ uvie na nẹ obọ ri Solomọn, ke Me kẹ wẹ uvwiẹ ihwe.

³² (ẹkẹvuọvo uvwiẹ ọvo kọye o vwo, fiki rẹ odibo mẹ Devid kugbe fiki ri Jerusalẹm, orere re me jẹreyọ vwẹ usun rẹ uvwiẹ rẹ Izrẹl ejobi),

³³ fikiridie ọ sen vwẹ, ọ da ra gọ Ashera ẹdjọ rẹ ihwo ri Sidọn, Chemosh ẹdjọ ri Moab, kugbe Milkọm ẹdjọ rẹ ihwo rẹ Ammọn, ọ gbe yan nene idjerhe mẹ-ẹ, o rhe ru obo ri yoma vwẹ obaro mẹ-ẹ ọ yọnrọn iji mẹ vẹ ẹgha mẹ-ẹ, kirobo ri Devid ọsẹ rọye ruru.

³⁴ Dede na ye me cha ghwa reyọ uvie na ejobi mie-e; ẹkẹvuọvo mi ruo vwọ dia osun vwẹ ẹdẹ rẹ akpọ rọye ejobi, fiki ri Devid odibo mẹ re me jẹreyọ, rọ yọnrọn irhi mẹ kugbe iji;

³⁵ ẹkẹvuọvo me cha reyọ uvie na mie ọmọ rọye, ke me vwọ kẹ wẹ, uvwiẹ ihwe na.

³⁶ Dede na ọmọ rọye na ke me vwẹ uvwiẹ ọvo kẹ, rere Devid odibo mẹ se vwo vwo urhukpẹ vwẹ obaro mẹ vwi Jerusalẹm, orere re me jẹre nẹ odẹ mẹ dia.

³⁷ Ke me reyọ owẹ ku wọ re obo rẹ udu wẹn guọnọre vwẹ enu rẹ emu ejobi, ku wọ dia ovie vwẹ enu rẹ Izrẹl.

³⁸ Wọ da kerhọn rẹ urhi ri mi ji kẹ wẹ ejobi, wọ da yan nene idjerhe mẹ, wo de ru obo ri she phihọ vwẹ ẹro mẹ wọ da yọnrọn iji mẹ kugbe irhi mẹ, kirobo ri Devid odibo mẹ ruru, ki mi nene uwe dia, ke me bọn uwevwi rẹ uchivwo rọye ghwaotọ kẹ wẹ, kirobo re me bọn kẹ Devid, ke me vwẹ Izrẹl kẹ wẹ.

³⁹ Ki mi vwi fiki rẹ ọnana kpokpo uvwiẹ ri Devid, ẹkẹvuọvo ọ dia ọ re bẹdẹ-ẹ.

⁴⁰ Solomọn kọ guọnọ Jẹroboam hwe; ẹkẹvuọvo Jẹroboam vrẹnri, ọ da djẹ kpo Ijipt, bru Shishak ovie rẹ Ijipt, kẹ Ijipt ọ diare bẹsiẹ ri Solomọn vwo ghwu.

Ughwu ri Solomọn

⁴¹ Asakiephana uruemu ri Solomọn ro chekọ, kugbe obo ro ruru ejobi, ẹghwanre rọye, e rhe si ayen phihọ Ọbe rẹ uruemu ri Solomọni-i?

⁴² Ọke ri Solomọn rere vwi Jerusalẹm vwẹ enu rẹ Izrẹl da dia ikpe ujuvẹ.

⁴³ Solomọn da vwerhẹ kugbe esẹ rọye, e de sho phihọ orere ri Devid ọsẹ rọye; Rehoboam ọmọ rọye da re vwẹ ẹdia rọye.