1 Ivie 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Abishag gbe Odibo kẹ Devid

¹ Asakiephana ovie Devid ghworo gangan, dede nẹ a vwẹ emwa phopho na, yẹ oma rọye gbe rhorha-a.

² Fiki rẹ ọtiọye na idibo rọye da ta kẹ, E jẹn a guọnọ upele rẹ ọmọtẹ ọvo kẹ ọrovwovwe ovie, rere ọ vwẹ ẹro te; ro shevwerhẹ kẹrẹ, rere oma rẹ ọrovwovwe ovie vwọ tuabọ.

³ Ọtiọye ayen da guọnọ ọmọtẹ vẹ erhuvwu wan otọ rẹ Izrẹl na ejobi, ayen da mrẹ Abishag ohwo ri Shunẹm, ayen da reyọ vwo rhe ovie.

⁴ Ọmọtẹ na vwo erhuvwu gangan; kọye vwẹ ẹro te ovie ro gbe odibo kẹ; ẹkẹvuọvo yẹ ovie na vẹ ọye mrẹ oma-a.

Adonija vwẹ ogangan reyọ ekete na

⁵ Asakiephana Adonija ọmọ ri Haggit de mu oma rọye kpenu, tanẹ, Me dia ovie; o de rhuo ekpẹrẹ kẹ oma rọye vẹ ihwo re gua iyesi, kugbe ihwo ujuvẹ gbe ihwe re karo kẹ.

⁶ Ọsẹ rọye ji ruo bra dẹvo-o ro da nọ nẹ, Die wo vwo ruẹ enẹ vẹ enẹ? Je vwẹ ohwo vẹ erhuvwu gangan; e vwiẹrẹ kpahe Absalọm.

⁷ Ọ vẹ Joab ọmọ ri Zẹruya kọye gba jẹ iroro kugbe Abiata rẹ orherẹn na; ayen de nene Adonija ayen da cha uko.

⁸ Ẹkẹvuọvo Zadọk rẹ orherẹn na, kugbe Bẹnaya ọmọ ri Jehoiada, kugbe Netan rẹ ọmraro na, vẹ Sbimei, Rei, kugbe egba ri Devid na vẹ Adonija dia obọ-ọ.

⁹ Adonija da vwẹ ogodẹ, erhuẹn ọshare, vẹ eranvwe vẹ ivwri vwo ze izobo vwẹ oma rẹ oragha rẹ ọrọdekọ na, ro bi kẹrẹ Ẹnrogẹl, o de se emesẹ rọye ejobi, emọ rẹ ovie na, kugbe iruiruo rẹ ovie ri Juda ejobi.

¹⁰ Ẹkẹvuọvo o se Netan rẹ ọmraro na-a eyẹ Bẹnaya eyẹ egba na eyẹ Solomọn ọmọsẹ rọye na-a.

¹¹ Etiyin Netan da ta kẹ Batsheba oni ri Solomon, Wọ ji nyo nẹ Adonija ọmọ ri Haggit kọye ovie yẹ Devid ọrovwavwanre riẹnre-e?

¹² Asakiephana gba mọ, re me jẹ iroro kẹ wẹ, rere we vwo sivwi oma wẹn ọ vẹ arhọ rẹ ọmọ wẹn Solomọn.

¹³ Yanran kpata kpata bru Ovie Devid, re wọ ta kẹ, ọ dia owọwẹ, ọrovwovwe ovie, ri ve vwọ kẹ ọmọtẹ wẹn, nẹ, Solomọn ọmọ wẹn re cha re ovie vwẹ asan wo nuru, ko che tidia vwẹ ekete mẹ? Kidie Adonija rha vwọ re ovie?

¹⁴ Etiyin ọke wọ vẹ ovie je vwọ ta ota na, ke me cha ro uwevwi rhe vwa wẹ ki mi ru eta wẹn na gan.

¹⁵ Ọtiọye na Batsheba de bru ovie kpo uvun rọye yẹ ọke yena ovie na ghworo gangan-re, Abishag ohwo ri Shunẹm na ri gbe odibo kẹ ovie na.

¹⁶ Batsheba diguẹ ọ da vware ovie, ovie da nọ, Die wọ guọnọre?

¹⁷ ọ da ta kẹ, ọrovwovwe. wọ vwẹ Ọrovwohwo Ọghẹnẹ wẹn duvwu iyori kẹ ọmọtẹ wẹn, tanẹ, Sọlomọn ọmọ wẹn re cha re uvie vwẹ asan mi nuru, ko tidia vwẹ enu rẹ ekete mẹ.

¹⁸ Asakiephana, nighe, Adonija kọye hẹ ovie, dede na wẹ, ọrovwovwe ovie, he riẹ-ẹn.

¹⁹ ọ vwẹ erhuẹn ọshare, eranvwe vẹ ivwri, kugbe igodẹ buebu vwo ze izobo, o de se emọ rẹ ovie ejobi, Abiata rẹ orherẹn, kugbe Joab rẹ onotu rẹ ofovwi; ẹkẹvuọvo o se Solomọn odibo wẹ-ẹn.

²⁰ Asakiephana ọrovwovwe ovie, Izrẹl ejobi tọn ẹro vi we, re a ta kẹ ayen ohwo ro che tidia ekete rẹ ọrovwovwe ovie nuru.

²¹ Ọ rha dia ọtiọye-e ọke rẹ ọrovwovwe ovie da tọn kpo obo ro nurhe re bru esẹ wẹn e de rhi se vwe vẹ ọmọ mẹ ihwo okpetu.

²² Ọ ke rọ vẹ ọvie je vwọ ta ota na, Netan rẹ ọmraro na da ro uwevwi.

²³ Ayen da vuẹ ovie nẹ, Netan rẹ ọmraro na rhere. Ọke rọ vwọ ro uwevwi bru ovie rhe, o de diguẹ bọvwọn opharo rhuotọ kẹ ovie.

²⁴ Netan da ta, ọrovwovwe ovie, wẹ re tare nẹ, Adonija re cha re uvie vwẹ asan mi nuru, nẹ ọye ri che tidia ekete mẹ?

²⁵ Kidie nonẹ na ọ yanran, ọ da vwẹ erhuẹn ọshare, eranvwe vẹ ivwri, igodẹ buebu vwo ze izobo, ode se emọ rẹ ovie ejobi, Joab rẹ onotu rẹ ofovwi, kugbe Abiata rẹ orherẹn na; nighe ayen ra ria ayen ra da vwẹ obaro rọye, tanẹ, E jẹn Adonija Ovie tọn.

²⁶ Ẹkẹvuọvo mẹvwẹ, odibo wẹn, kugbe Zadọk orherẹn na, kugbe Bẹnaya ọmọ ri Jehoyada, vẹ odibo wẹn Solomọn, o se avwanre-e.

²⁷ Kẹ ọrovwovwe ovie ru emu nana ro de jẹ idibo rọye ẹvuẹ ohwo ro che tidia ekete rẹ ọrovwovwe ovie nuru?

A vwẹ Solomọn ma ovie

²⁸ Etiyin Ovie Devid da kpahe, Se Batsheba rhe vwe. Ọtiọye ọ da rhe obaro rẹ ovie, o de mudia vwẹ obaro rẹ ovie.

²⁹ Ovie de duvwu iyori, tanẹ, Kirobo rẹ Ọrovwohwo herọ na, rọ tan erhi mẹ nẹ kukọn kukọn,

³⁰ kirobo Me vwẹ Ọrovwohwo, Ọghẹnẹ rẹ Izrẹl duvwu iyori, tanẹ, Solomọn ọmọ wẹ re cha re uvie vwẹ asun mi nuru, nẹ ọye ri che tidia ekete mẹ na; ọtiọye rhe mi ji che ru nonẹ na.

³¹ Etiyin Batsheba de diguẹ bọvwọn opharo rhuotọ, ọ da vware ovie, ọ da ta jẹn ọrovwovwe Ovie Devid tọn bẹdẹ.

³² Ovie Devid da ta, Se Zadọk orherẹn na kẹ vwẹ, Netan rẹ ọmraro na, kugbe Bẹnaya ọmọ ri Jehoyada. Ọtiọye ayen de bru ovie rhe.

³³ Ovie da ta kẹ ayen, Reyọ idibo rẹ ọrovwovwan, re we jẹn Solomọn gua vwẹ enu rẹ iyesi mẹ, re we suo te Gihọn;

³⁴ re we jẹn Zadọk orherẹn na kugbe Netan rẹ ọmraro na vwẹ evwri gbworo rọ dia ovie vwẹ Izrẹl; re we hworo owanre, tanẹ, Ẹ jẹn Ovie Solomọn tọn bẹdẹ.

³⁵ Ku we nene rhe, re or rhi tidia ekete mẹ; kidie ọye re cha dia ovie vwẹ asan ri mi nuru; mi vwiro mu ovie vwẹ Izrẹl vi Juda nure.

³⁶ Bẹnaya ọmọ ri Jehoyada da kpahe kẹ ovie, Isẹ, Ẹ jẹn Ọrovwohwo, Ọghẹnẹ rẹ ọrovwovwe ovie, ta ọtiọye.

³⁷ Kirobo rẹ Ọrovwohwo vẹ ọrovwovwe ovie herọ na, ọtiọye ọ vẹ Solomọn je dia rhe, ko ru ekete rọye rho nọ ekete rẹ ọrovwovwe Ovie Devid.

³⁸ Ọtiọye Zadọk ọrherẹn na, Netan ọmraro na, kugbe Bẹnaya ọmọ ri Jehoyada, kugbe ihwo ri Shẹlẹt kugbe ihwo ri Pẹlẹt ayen de yanran ra vwi Solomọn gua vwẹ enu re iyesi rẹ Ovie Devid, ayen de rhi te, Gihọn.

³⁹ Etiyin Zadọk orherẹn na da reyọ ukoko rẹ evwri nẹ utughẹ na rhe, o de vwo ghworo Solomọn. Etiyin ayen de hworo owanre; ihwo na ejobi da ta, Ovie Solomọn wọ tọn bẹdẹ.

⁴⁰ Ihwo na ejobi de tue nene, ri hworo urephe, re ghọghọ gangan, ọtiọye na edo rayen da bẹre otọ na.

⁴¹ Adonija vẹ erhorha te vẹ ọye gba hẹ etiyin na de nyo rẹ ayen vwo re emu nu. Ọke ri Joab vwo nyo umri rẹ owanre, ọ da ta, didi edo re hẹ obo orere na?

⁴² Rọ ghwa vwọ ta ota na, nighe, Jonatan ọmọ re Abiata orhetẹn na da rhe, Adonija da ta, Yanrhe, kidie wẹ omamọ rẹ ohwo ikun esiri wọ ghwa rhe.

⁴³ Jonatan da kpahe kẹ Adonija, Ẹjo, kidie ọrovwavwanre Ovie Devid ọ vwi Solomọn mu ovie;

⁴⁴ ovie de ji Zadọk orherẹn na nene, Netan ọmraro na, kugbe Bẹnaya ọmọ ri Jehoyada, kugbe ihwo ri Shẹrẹt kugbe ihwo ri Pẹlẹt, ayen da vwọ gua lyesi rẹ ovie;

⁴⁵ te Zadọk orherẹn na te Netan ọmraro na de vwẹ evwri rẹ ovie ghworo vwi Gihọn; kẹ oboyi ayen nẹ cha vẹ aghọghọ na, kọye orere na vwo kuvwie vẹ edo na. Ọnana kọye edo ru wo nyori na.

⁴⁶ Solomọn tidia vwẹ enu rẹ ekete rẹ uvie na.

⁴⁷ Ọ rọ marho, idibo rẹ ovie de yere ọrovwavwanre Ovie Devid, tanẹ, Ọghẹnẹ wẹn ru odẹ ri Solomọn ro kperi usi nọ Ọwẹn, ro rhe ru ekete rọye rhonọ owẹn. Ovie de gbe uyovwi kpotọ vwẹ enu rẹ ehwa rọye.

⁴⁸ Ovie da ta rhe, Ebruphihọ kẹ Ọrovwohwo, Ọghẹnẹ rẹ Izrẹl, rọ rhọvwe nẹ ọmọ mẹ ọvo tidia enu rẹ ekete mẹ nonẹ na, mi ghene rhiẹ ẹro mrẹ.

⁴⁹ Etiyin erhorha rẹ Adonija ejobi ke phariẹ, ayen de vrẹn, dohwo dasan obọ rọye da ra.

⁵⁰ Oshọ ri Solomọn ko muẹ Adonija; o vrẹnri, ọ da yanran, ra gbane ighoro rẹ agbada na.

⁵¹ A da rhe vuẹ Solomọn, Nighe, Adonija ra djẹ oshọ rẹ Ovie Solomọn; kidie, nighe, ọ ra yọnre ighoro rẹ agbada na, tanẹ. Jẹn Ovie Solomọn ke duvwu iyori kẹ vwẹ tavwe nẹ ọye vwẹ ọlọkọ nyavwe odibo rọye hwe-e.

⁵² Solomọn da ta, O dje oma rọye phihọ ohwo ro fori, yẹ ubiẹto rọye ọvuọvo che se she te otọ-ọ; ẹkẹvuọvo a da mrẹ uvumwemwu vwẹ oma rọye, ko ghwu.

⁵³ Ọtiọye Ovie Solomọn de ji ikọn, ayen da ra reyọ nẹ enu rẹ agbada na rhe. ọ rhere ọ da rhe vware Ovie Solomọn; Solomọn da ta kẹ, yanran kpo uwevwi wẹn.