Ann Bokwakwarin 9 - Ubir

God An Dura Bo Baibasit Noah Rus Siyamai

¹ Namon God on Noah a on nanatun orot mat engon imomogines ato iyawures iyau, “Omi nanatum fifirig sigaraba wonitu ato ami dam warar inarat tafanam engon inibonuai.

² Tafanamai bobaitu tutuenis engon, kiwiu aiyetunai engon, sawar tutufin motobai sekakayam a kamit an iyan engon on arimon omi sinberuem. Osi engon min arimon omi ami baibad babanai sinama.

³ Omi on sawar yayawasis engon semama a sekakayam on engon ami bayu mes wonam, mamaba Yau matan ainau bofefes asi kanefu abitem ba. Ari osi sawar engon on abitem ami bayu mes.

⁴ Baise sawar kaitamom on masono bionai tara inen on men wonan mes, yabin yawas on tara ai nan yen.

⁵ Ato orot jever iyafan turan an yawas eboseir on arimon animakiai inarab a bobaitu ato orot jever an yawas eboseir on eb arimon animakiai inarab.

⁶ Iyai iyafan orot jever iyasubun on an garamin orot jever emon sinasubun. Yabin God orot jever ifourai on Toun anitin ba ibo.

⁷ Ato omi on fifirig sigaraba wonitu ato ami dam warar inarat onai tafanam engon sinibonuai.”

⁸ Namon God on Noah nanatun orot mat auris iyau,

⁹ “Yau ari au dura bo baibasit abiyamai omi a omi wawam agirim gibui sinrarat auris mat.

¹⁰ A mat osi sawar yawasis engon, kiwiu, gogabur an bobaitu a bobaitu tutuenis engon a tafanamai sawar yayawasis engon tutufin mat ato wa amon emon wogat auris mat abiyamai.

¹¹ Yau atonio dura ai on au dura bo baibasit omi mat tabiyamai: Yau men arimon gibui sareu gagamin aniyamai ingat sawar yayawasis asi yawas inboseseiren mes, a men arimon gibui sareu gagamin aniyamai ingat tafanam inikomasai mes.”

¹² Ato God iyau, “Yau atonio dura bo baibasit an matair omi mat sanati abiyamai a sawar yayawasis engon tutufin mat womama auris a sabu gibui sinrarat engon mat auris.

¹³ Yau au tarub on kasakasauai ayein ato on, on arimon dura bo baibasit an matair mes iniyamai Yau a tafanam mat sanayi.

¹⁴ On an rai yau kasakasau aniyamai ingat aiyetunai inaru nan on tarub mat min on kasakasauai inrobotet.

¹⁵ Yau arimon au dura bo baibasit omi Yau mat a sawar yayawasisi engon mat tabiyamai on annos. Men arimon sareu gagamin aniyamai ingat men tafanamai sawar yayawasis engon tutufin inikomasen.

¹⁶ On an rai tarub kasakasauai inrorobotet anitai on, yau arimon ato dura bo baibasit wantoanin on annos, God a sawar yayawasis sanasi tafanamai itis ta ta engon auris.”

¹⁷ On mes God on Noah aurin iyau, “Atonio on dura bo baibasit an matair yau a tafanamai yawas engon sanati aiyamai.”

Noah Nanatun Orot

¹⁸ Noah nanatun orot iyabon ato wa amon emon sigat on Shem, Ham a Japheth. (Ham on Canaan taman)

¹⁹ Atonio on Noah nanatun orot ton, ato osi nanatus wawas agiris emon on sitagege tafanam au engon inbonu.

²⁰ Noah on tar ba an orot ato on ainau ibosuruf masauai wengar wine itanum.

²¹ On an werai on sareu wine turin itoman, on ibosuruf ikokok ato on sawar igabobounen keremomotin an guwi amonai iyen bubur.

²² Canaan taman Ham on taman Noah keremomotin iyen bubur it ato igat tuan a tain ikasones.

²³ Namon Shem a Japheth rus beber sibo abarasi sitarasour, weie aufut aufut sirui tamas keremomotin iyen bubur on sisabutan. Osi magis on sab siya onai tamas keremomotin iyen bubur on men sititai mes.

²⁴ On an werai Noah unin iyobin ato imisir men, on isagob natun giyamomos Ham on bobo aifan iyamai.

²⁵ On mes iyau, “Canaan, yau audabim, om arimon agirotim bag unmatar tutuam uniagires.”

²⁶ Mat on eb iyau, “Yau abifefeyan au BADA God aurin on Shem inimomoginai ato iniyamai Canaan on innat Shem an agirotin inmatar.”

²⁷ Yau abifefeyan au BADA on Japheth an motob on iniratai ato Japheth on Shem an goa tafanam inboai. Ato Canaan on on an agirotin inmatar.”

²⁸ Sareu gagamin igat gibunai on Noah an kwanda on 350 ba ima.

²⁹ On engon ibikaita on Noah an kwanda 950 ima weie irabob.