Ann Bokwakwarin 50 - Ubir

¹ On an werai Joseph it on taman irabob, on mes on taman irous ibotouousai a magin iboyayanin.

² Namon Joseph an fio orot iyores taman usin sibotitiwagai a fio simutai.

³ Fio orot Jacob usin siyayabunagai a fio sibimutai on ra orot ruam isawar ato Egypt yangan on ra orot ton, orot ta aurin auyotoat on Jacob aurin sitou siyababan.

⁴ On an werai tou yababan isawar gibunai, Joseph on aiwab orot an bainetewarotis iyawures iyau, “Karun, abifefeyanim atonio dura wobo wonai aiwab orot aurin:

⁵ ‘On an werai tamau itrabob mes on, on iyawureu aumatanai on Canaan tafanamai toun budi ibotitiwag yen on nan angarobai. On mes karun abifefeyanim, eikirireu anan tamau angarobai weie anmatabir.’”

⁶ Aiwab orot iyafotai iyau, “Om unan tamam ungarobai, mamaba uyaumatan on nanaba.”

⁷ On mes Joseph inai taman itgarob mes. Egypt aiwab orot an bainetewarotis, kuayo ta ta an bainetewarotis a orot toufumis engon Joseph mat sinai.

⁸ On awan nanatun, taitain tutuan a taman an dam warar engon mat sinai. Osi nanatus gugudis a iyabon men fofonin sitan on sheep, goat a cow mat Goshen tafanamai nan sima.

⁹ Orot on baigagam wa ato horse seteteinen sai on tafasi sigai simairirin a orot horse tefasi sigai simmair engon mat sinai, kuayo on gagamin bag.

¹⁰ Osi sinat mafam wabin Atad, Jordan Sareu au wera matan emon on nan sigat. On efanai on sabu sawareg sebobo fefemis seboseseiren ato yabis on mabisi seyaya. Osi nan ra weromin maiau usin sibotan fonas gagaminai bag sitararag sibotouousai simama. Joseph on tafaror kaitamom amonai on taman aurin itou iroro.

¹¹ On an rai Canaan sabu sites osi Atad nan sitotou on osi siyau, “Osi Egypt yangan on tou yababan gagamin bag seboai!” On fasinai Canaan sabu on efan wabin siyor Abel Mizraim.

¹² On mes Jacob nanatun mamaba ibifores on nanaba siyamai.

¹³ Osi usin siyabar sinai Canaan tafanamai ato agim dogu Machpelah motobai nan Mamre bisinai sigarobai. Abraham on Ephron Hitt orot aurin on motob itobon gagarob efan mes.

¹⁴ Joseph taman igarob isawar gibunai, on taitain tutuan a sabu on mat sinai taman sigagarob on mat simatabir men sinat au Egypt.

Joseph Taitain Tutuan Asi Bainonot Ikufaiwarai

¹⁵ Osi tamas irabob gibunai, Joseph taitain tutuan siyau, “Ot ainau Joseph aurin komasin taiyamai inbinonotai mes on, ari weie wan inyoai.”

¹⁶ On mes osi dura siyafar Joseph aurin ato siyau, “Weie tamam itrabob, on wei auri dura atonio nanaba ikakafun:

¹⁷ On iyawurei dura atonio nanaba watawurem mes. ‘Joseph, karun, yau abifefeyanim om taitaim tutuam einotbures, yawas fetag siyamai a bobo komasin bag aurim sifour.’ Ato ari on wei tamam an God an agiroti, wei ba wabifefeyanim, karun, om wei einotburei.’” Joseph atonio dura itatam on iyababan itou.

¹⁸ Namon Jospeh taitain tutuan sinat on nanai sindas sirouen usos situr ato siyawur siyau, “Wei on om am agiroti.”

¹⁹ Baise Joseph iyawures iyau, “Omi men wonaber mes, yau tou on men fofonin God an efanai anyeiniu mes.

²⁰ Omi bubuniai woyanu yau wotikomasiu mes, baise God on komasin on iyabatabir obin imatar sabu sigaraba itiyawasis mes, ato on min imatar.

²¹ Omi men aifan tani aurin wonaber mes. Yau arimon omi nanatum mat engon ankaifarem.” Joseph taitain tutuan dura ai ikufaiwaris ato moa obinai auris ikakafun nunuas ibo.

Joseph Irabob

²² Joseph on nana taman an dam warar mat Egypt simama, on an kwanda on 110 weie irabob.

²³ On imama Ephraim nanatun a wawan sirat ites. On eb on imama natun Manasseh natun Makir nanatun iboes ikaifares sirat on nanatun mes.

²⁴ Joseph taitain tutuan iyawures iyau, “Yau kafakai mom anarab, baise God on dura bag arimon inkaifarem a ininetewarim wongat wonan tafanam ato menan Abraham, Isaac a Jacob auris ibifaro on nan wongat.”

²⁵ Namon Joseph on taitain tutuan ifefeyanis aurin sitifaro mes. On iyawures iyau, “Omi waumataniu ato woifaro, on an werai God ininetewarim on tafanam aurin wonnanan on, omi au rarik wonabo mat wonan.”

²⁶ Joseph ima inai an kwanda 110 ato on Egypt nan irabob. Ato on an fio orot usin sibotitiwagai simutai ato rabobis asi didiwagai siwan.