Ann Bokwakwarin 49 - Ubir

Jacob An Dura Kanfoun Nanatun Auris Ikakafun

¹ Namon Jacob nanatun engon iyores ato iyawures iyau, “Omi engon newat wonat wo kufifineu ato ra arimon gibui e nat omi aurim aifan inmamatar on ankasonem:

² “Omi Jacob nanatun, wonat bisiwui womair ato tamam Israel inbikakafun on wontatam:

³ “Reuben, yau natu ainau orot, om on yau au faiwar, om am rat emon on yau anat tamam amatar. Om on taseseirim a wafatatim nanatu engon tefasi.

⁴ Om on sareu egat yan egagamatabir ba, baise om men arimon taitaim tutuam uninetewaris on, yabin om yau au goa an bobo jever rum woen. Ato tamam an en bubur efan on men ukakafai.

⁵ “Simeon a Levi rus on ainau giya. Osi rus sebibasit bonen ato baigagam sawar sebobo sabu sebikomasis.

⁶ Osi rus dura bubuniai nan sebikakafun onai on men amosi anar mes a asi baidudur amosi men anikakafun on, yabin osi yatatabai on sabu sasububunues a bull seboes sas fifinimes asir yasisir kwarer ba sebiyamen.

⁷ Yau on asi yatatab on audabai, yabin osi on yas sowaris a yau on asi faiwar audabai, yabin osi on tous goyis. Yau on arimon ankugeyis sintagege sinan mabis mabis Israel tafanam engon inboai ato sinan dam ta ta mat nan sinama.

⁸ “Judah om taitaim tutuam arimon om sinifaim, om ragit arimon anyosi nan unabo unarou. Taitaim tutuam arimon namui sindas sinrouen usos sintur.

⁹ Judah on kuke lion boboun ba, on sabu yasububunues ato emamatabir e nan an ob efanai nan yeinir yen usin ebiyarirai. Men iyafan tani aurin inan inkuneneai on.

¹⁰ Judah on arimon aiwab an kututu inboai. Ato nanatun wawan agirin arimon ra fufur sininetewar. Judah on nana inbinetewar weie Shiloh innat ato sabu engon tutufin sinifonabo a nanai sindas sinrouen usos sin tur.

¹¹ On an donkey kafakai on wengar wine ai iyous etatawar, on wengar wine on obin anbabaton. On an sawar on wengar uwan wine mururin kerin tara ba onai esosouen.

¹² On sareu wine etotoman on mes matan fofous mururis, on yaya kakakaiin etotoman on mes wan kakakaiis.

¹³ “Zebulun on kamit bisinai inama. On an tore on wa asi awaru obin. On an tafanam arimon inan Sidon mafamai ingat.

¹⁴ “Issachar on wawanin donkey ba an sifumama sanasi yeinir yen.

¹⁵ Baise on it on baiyarir efan on iyobin anbabaton. Ato on tafanam on yasisir nuabo efan. On mes on ekwakwafir an bit ekikin ato serukokou ai inabo agirotin ba.

¹⁶ “Dan on arimon ininetewar an sabu auris. Osi on arimon Israel amonai dam fani ba.

¹⁷ Dan on arimon mota ba eta rewanai yen a mota wan rarabob ba on eta sesebinai yen, on horse yai an werai on ann etun egigiai ato orot horse bo ayaiotin on aufut aufut eribirirai esusur.

¹⁸ “BADA, yau amomousin Om uniyawasiu mes.

¹⁹ “Gad on arimon sabu bainauotis siniragitai, baise on arimon inrutabir gibusi infaitanis inan.

²⁰ “Asher an tafanamai on arimon bayu obis intanum inkuwain. On arimon bayu obis inbononoat aiwab orot aurin.

²¹ “Naphtali on rega an goat jever ba fetag fetag baiyaiotin. On wengar ba fafamen obis eyaya.

²² “Joseph on wengar wine ou bibirootin ba kibubur sareu bisinai ato fafamen on fafa tefanai sirabon.

²³ On an ragit wawaninai si ragitai ato si faitan sinai fiduai siyo.

²⁴ Baise on an fidu on asir ibotan mom, ato iman iyamen siwani. Jacob an God Faiwarin Bag an faiwarai, Rufafarotin Kaifarotin Wabinai Israel an Tutut Agim.

²⁵ On on om tamam an God on ibaisim, God Faiwarin Bag on imomoginem, an baimomogis usan aiyetun emon esusur a kibubur sareu motob emon segeg, a baimomogin ato jever fifirig sigaraba sinitu a bobaitu mat nanatus bobous sinitu.

²⁶ Baimomogis om tamam aurin on gagamin bag men ato sawar obis oyau wantoanin an baimomogin ba, baimomogin om tamam aurin on gagamin bag men ato sawar obis oyau atamanis tefasi ba. Yau ababayoi atonio baimomogin on Joseph uninai inan, yabin on arimon innat taitain tutuan nasi intawar ininetewar.

²⁷ “Benjamin on rega an kuke gagamin tutuenin ba. Fomenei on masono yasubunuen yam ato rabirabi on sawar aifan ibobo on eraram.”

²⁸ Atonio on Israel an dam auyotoat an yayatan ruam. Atonio on tamas an baikakaiu dura osi kakaita kakaita asi yawas mamaba on nanaba auris ikakafun ato imomogines.

Jacob Irabob Ato Sigarobai

²⁹ Namon Jacob nanatun ifores iyau, “Yau on kafakai mom anarab, usiu on tatamau mat agim dogu ato Hitt orot Ephron an motobai wongarobiu,

³⁰ agim dogu ato Machpelah motobai Mamre au wera matan na Canaan tafanamai, ato Abraham Hitt orot Ephron emon motob mat itobon gagarob efan mes.

³¹ On nan on Abraham awan Sarah rus a Isaac awan Rebecca rus sigarobis ato Leah min on nan agarob,

³² motob a dogu on Abraham nan Hitt yangan bisisi emon itobon. Omi on nan wongarobiu.”

³³ On an werai Jacob nanatun dura iyaubaiyates isawar, on ann ibo an enbubur efanai iya ato an kanfoun iyaratein ato irabob.