Ann Bokwakwarin 48 - Ubir

Jacob Ephraim A Manasseh Rus Imomogines

¹ Wera fani isawar gibunai, Joseph sikasonai on taman on isawau. On mes on nanatun ruam, Manasseh a Ephraim rus iboes ato sinai taman Jacob sitfasiuai mes.

² On an werai Jacob sikasonai on natun Joseph inat infasiuai mes, Jacob an faiwar engon ibo ato an en bubur efanai imisir imair.

³ Jacob on Joseph aurin iyau, “God Faiwarin Bag, on Lus nan auriu irobotet Canaan tafanamai ato imomogineu.

⁴ On iyawureu iyau, ‘Yau arimon fifirig sigaraba anitem, on emon arimon om nanatum wawam agirim inarat bag; yau arimon atonio tafanam on om nanatum wawam agirim anites osi ininoanis au wantoan.’”

⁵ Jacob an dura ibotein iyau, “Joseph, om nanatum ruam on nin Egypt sirat weie yau anat nin bisimui, osi on yau anboes nanatu mes, Ephraim a Manasseh on yau nanatu bag Reuben a Simeon ba.

⁶ Om nanatum fani gibui sinrarat on om noam, tafanam ato osi inbinoanis on arimon Ephraim a Manasseh rus emon innat.

⁷ Yau atonio bobo abiyamai yabin ayom Rachel on yababan gagamin iteu. Yau Mesopotamia emon amatabir anat Ephrath aurin abiufin on nan irabob. Yau Ephrath eta rewanai nan agarobai.” (Ephrath min ari seyoyorai Bethlehem)

⁸ On an rai Jacob on Joseph nanatun ites, on itetemai iyau, “Osi fifirig on iyabon?”

⁹ Joseph iyafotai iyau, “Osi on yau nanatu, yau nin Egypt amama on God iteu.” Jacob iyawur iyau, “Om fifirg eboes enat auriu ato animomogines.”

¹⁰ Jacob on matan idib yabin on iorokwar bag on mes on men fofonin itites tiwag on. Joseph fifirig iboes sinat aurin ato irousis iboyayanis.

¹¹ Jacob on Joseph aurin iyau, “Yau men anonosin om magim atitai men on, ato ari God iyamai on om a nanatum mat magim aiten.”

¹² Namon Joseph on Jacob atefan emon fifirig ruam ibogaiis ato nanai sindan irou uson itur isur magin motob iruyein.

¹³ Joseph on Ephraim ibo Jacob asun asugagaf ai imairai a Manasseh ibo asun asumaiau ai imairai.

¹⁴ Baise Jacob on iman iyasbonai asumai au on Ephraim tefanai iyagai, on min giya orot ato iman asugagaf on Manasseh tefanai iyagai, on min ainau orot.

¹⁵ Namon on Joseph imomoginai iyau; “God ato yau tatamau Abraham a Isaac rus aurin sibobo on atonio fifirig eimomogines! God ato yau ibinetewariu mom inat ari on, atonio osi eimomogines!

¹⁶ Anea ato komasis engon emon irufafareu on, osi eimomogines! Yau wabiui, tatamau Abraham a Isaac wabis on atonio fifirig asi yawasai inen, ato nanatus wawas agiris on inison nin tafanamai.”

¹⁷ Joseph it on taman iman asumaiau on Ephraim tefanai iyagai on men ibasitai, on mes on Ephraim uninai taman iman ibo ityabonai Manasseh uninai ityagai mes.

¹⁸ Joseph on taman iyawur iyau, “Bada, men on nanaba on. Atonio fifi on ainau orot, imam asumaiau on tefanai eyagai.”

¹⁹ Baise taman iman men iboseir ato iyau, “Yau natu, yau asagob aifan abiyamai. Manasseh nanatun wawan agirin an sabu mat on arimon inarat bag, Baise on tain giya orot on arimon inarat gagamin bag men tuan ba, ato on nanatun wawan agirin on an sabu mat on arimon inison bag.”

²⁰ On mes on imomogines ato ibikakafun iyau “Israel yangan on baimomogin an rai omi wabim on sinkurereb. Osi arimon sinau, ‘God itfourim Ephraim a Manasseh rus ba wotmatar.’” On an etai on Jacob Ephraim ainau iyein weie Manasseh.

²¹ Namon Jacob on Joseph iyawur iyau, “Om ato uit, yau kafakai mom anarab, baise God on arimon omi mat ato arimon inboem wonmatabir men wonan wawam agirim asi tafanamai.

²² Yau Shechem tafanam an motob bubusar abitem on om aurim men taitaim tutuam mat auris on. On tafanam min Amor yangan mat au seri a au fidu ai aigagam asowar aboai on.”