Ann Bokwakwarin 45 - Ubir

Joseph Taitain Tutuan Ikasones On Iyafan

¹ Joseph on men fofonin an bobo orot matasi toun ititotorai itiwaniai on, on mes Egypt yangan engon tutufin iyawures goa emon sigat, weie Joseph taitain tutuan ikasones on iyafan.

² Joseph fonan gagaminai bag itou ato Egypt yangan fonan sitatam. Ato duran sibotein inai aiwab orot an goa amonai sabu engon sitatam.

³ Namon Joseph on taitain tutuan iyawures iyau, “Yau on Joseph. Yau tamau nana yawasin emama?” Baise taitain tutuan on men fofonin sitiyafotai, yabin osi engon on siber kwakwan.

⁴ On mes Joseph iyawures iyau, “Karun, abifefeyanim, omi ne ne auriu wonat.” Namon taitain tutuan aurin bag sinat. Ato on iyawures iyau, “Yau on taim tuam Joseph. Omi ato wotoboniu atan Egypt nan ati agir mes.

⁵ Ato ari on men woniyakomas a men toum woniubar bobonen yabin yau wotoboniu on mes. God Toun bag on iyafareu ainau anat nin sabu aniyawasis mes.

⁶ Ari on gomar an kwanda bairuin wat atonio tafanamai. Ato arimon kwanda nim ba amonai nan on bofefes a kuwain ambin.

⁷ On mes God ainau iyafareu anat atonio nin on omi ati baisim men wotarab mes. Yabin atonio yawas baiduduranin imamatar nan on nanatum wawam agirim fani min arimon inbotanis yawasis nin tafanamai sinama.

⁸ On mes men dura bag omi yau woiyafareu anat nin on, baise God. Yau on God iyameu anat aiwab orot, on an bainetewar orot gagamin amatar. Yau on baibad abo aiwab orot an aiwab goa amonai an sabu engon akakaifares. Yau on Egypt tafanam engon tutufin akakaifarai.

⁹ Omi ari gariwat wonan tamau aurin ato wonawur wonau, “Om natum Joseph on ato nanaba iyau, ‘God iyameu anat Egypt tafanam engon tutufin akakaifarai. Yau auriu sasasan wat unnat.’

¹⁰ Om arimon tafanam Goshen Egypt amonai nan unama, on min yau bisiui. Om, nanatum, awawam, am bobaitu a abi abi om ebinoanim engon mat.

¹¹ Om Goshen amonai nan unama on, yau arimon ankaifarem. Gomar on arimon nana inan kwanda nim ba ato yau men agogoi om am dam warar a am bobaitu mat wonibitanangi.”

¹² Joseph an dura ibotein iyau, “Omi engon a om Benjamin mat on ari weie woiteu wosagob yau on dura bag Joseph.

¹³ Omi tamau wonkasonai mamaba nin Egypt amonai faiwar gagamin abo abotan a abi abi matamui woiten on mat engon wonkasonai ato gariwat wonboai wonmatabir wonnat auriu.”

¹⁴ On tain Benjamin irous a Benjamin on eb tuan irous ato rus sitou.

¹⁵ Namon Joseph on nana itotou auman taitain tutuan kakaita kakaita irorousis iboyayanis. On gibunai weie taitain tutuan usis siforab ato sibosuruf Joseph mat sikakafun.

¹⁶ On an rai Egypt aiwab orot an bobo netewarotis mat dura sitatam Joseph taitain tutuan sinat on, osi men sunub siyasisir.

¹⁷ On mes aiwab orot on Joseph iyawur iyau, “Om taitaim tutuam yawures asi bobaitu sinabo ato sinmatabir men sinan au Canaan tafanam.

¹⁸ Om unawures tamam a ami dam warar mat engon sinboes sinmatabir men sinat au Egypt. Yau arimon efan obin bag Egypt amonai anites. Ato osi auris on arimon bayu fofonin wat sinam sinama.

¹⁹ Osi yawures motob an wa gugudis Egypt emon sinabo awawas nanatu auris a tamas mat sinboai sinmatabir sinnat.

²⁰ Osi asi sawar fani sinbikiriren auris on men siniyababan mes. Sawar obis obis engon tutufin Egypt tafanam amonai sen on engon osi asi sawar.”

²¹ On mes Jacob nanatun aifan si yawures on nanaba sifour. Joseph motob an wa gugudis ites mamaba aiwab orot i yau ba a eta an bayu mat ites.

²² On taitain tutuan usis asi sawar on eb kakaita iraramis. Baise Benjamin on usin an sawar on nim a agim silver 300 on mat itai.

²³ Joseph on Egypt sawar obis obis bag on iboen donkey auyotoat tefasis iyagagaien ato taman aurin iyafaren. Mat on donkey toub auyotoat tefasi on sawareg, rafi a bayu fani mat iyagagaien eta an bayu aurin.

²⁴ Namon Joseph taitain tutuan iyawures sinan mes. On an ra osi sibosuruf sitan mes ato on iyawures iyau, “Omi wonnanan etai on men wonagam bonen mes.”

²⁵ Osi Egypt sikirir ato simatabir men sinai au Canaan tamas Jacob aurin.

²⁶ Osi tamas sikasonai siyau, “Joseph on nana yawasin emama. On Egypt tafanam engon ebinetewar.” Osi tamas on dura itatam on iror ato men itutumes on.

²⁷ On an werai osi aifan Joseph i yau on engon tamas sikasonai a motob an wa gugudis ato Joseph iyafaren sinat on sinboai sinmatabir men au Egypt on iten weie, Jacob an not itotorai.

²⁸ Namon Jacob iyau, “Ari weie abitutum! Yau natu Joseph on nana yawasin emama. Yau anan anitai weie anarab.”