Ann Bokwakwarin 44 - Ubir

Viga Isiwan

¹ Joseph an goa bobo orot iforai iyau, “Osi orot asi baik ai bayu aumiet wat eiwanen sinabo sinan, a orot kakaita kakaita asi agim silver on eb baik tefasi nan eiwanen.

² Namon yau au viga bonanamarin agim silver ai siyamai a agim silver sawareg aurin sibo sinat tobon mes on, on mat engon eikaita tais giya momos an baik tefanai eiwan.” Ato Joseph dura mamaba bobo orot i yawur on nanaba iyamen.

³ Ra itom fomenei fomenei bobo orot on taitain tutuan iyafares asi donkey siboen ato sinai.

⁴ On an rai osi mafam gagamin sikirir men weromin sinai mom, ato Joseph an goa bobo orot iyawur iyau, “Om on gagariwat osi orot gibusi enai ato unboboes on unawures unau, ‘Omi aibo mes bobo komasin auriu woiyamai?

⁵ Omi aibo mes au bada an viga agim silver ai siyamai on wobainau?’ Omi viga ato woboai on, yau au bada min on nan wat etotoman a on viga emon ebiyoboai sawar buburis gibui sinmamatar auris on eiten. Omi on bobo komasin gagamin bag woiyamai!”

⁶ On an rai bobo orot inai ibotanis ato Joseph dura mamaba i yawur on dura bainon nanaba iyawures.

⁷ Osi siyafotai siyau, “Wai kavian, om abi dura ebikakafun, wei men wasagob on. Wei dura bag wawurem on men bobo abifan tani on nanaba waiyamai on.

⁸ Om usagob wei tafanam Canaan nan agim silver aibaik tefasi si yen wagaturen on waboen wamatabir men aurim. Ato mamaba uyau on am bada an goai agim silver ai agim gold on watbainau.

⁹ Wai Kavian, wei sanayi iyafan tani ungaturai inboboai mes on, on inarab, ato wei engon on om am bada an agiroti wanmatar.”

¹⁰ On iyawures iyau, “Yau abibasit, baise orot iyafan omi sanamui on viga i boai on ekesin wat on iniagirotin, ato omi fani on ubar emon on inrufanim wonan.”

¹¹ Namon osi sasasan wat asi baik au gabur siyeiren ato osi kakaita kakaita asi baik siruserenen.

¹² Joseph an bobo orot matanubai asi baik engon irunanagen tiwag, ainau orot farat ibosuruf isur inai giya momos bag igat, ato viga on Benjamin an baik amonai igaturai.

¹³ On tutuan on siyababan kwakwan ato asi baitakwakwaren on sisafefen. Namon osi engon asi donkey tefasi asi sawar siya gagaiyen men ato simatabir sinai mafam gagamin aurin.

¹⁴ On an rai Judah taitain tutuan mat simatabir sinai Joseph an goai sigat on sit Joseph on nan nana imama. Osi engon nanai nan sindas sirouen usos situr.

¹⁵ Joseph iyawures iyau, “Omi abifan woiyamai? Omi men wosagob orot yau nanaba on au faiwar yen fofonin bobo buburis semamatar on arimon ansagob.”

¹⁶ Judah iyafotai iyau, “Wai kavian, abifan arimon aurim wanau? Mamaba wanau wanrubunagi. God on waikomasin iyamai irerebai. On mes wei engon on om am agiroti, men ato iyafan bisinai viga sigagaturai ekesin wat on.”

¹⁷ Joseph iyafotai iyau, “O, ambin bag! Yau men arimon nanaba aniyamai! On iyafan viga i boai wat on arimon yau auriu iniagir. Omi fani on wonmatabir men obinai wat wonan tamam aurin.”

Judah Benjamin Aurin Ifefeyan

¹⁸ Namon Judah on Joseph aurin igai ato iyawur iyau, “Au kavian, karun, abifefeyanim, eibasiteu obinai aurim anikakafun. Men auriu uniyatatab mes, yabin om on aiwab orot rum fofon.

¹⁹ Au kavian, om wei uitetemi uyau, ‘Omi tamam mat a taim tani mat i?’

²⁰ Wei waiyafotem wau, ‘Eee, wei tamai on iorokwar, ato on iorokwar bag weie fifi giya momos irat. On fifi tuan orot on min irabob ato fifi ekesin mom ayon ibituai on yawasin emama. Ato tamai min on fifi inuaboai kwakwan bag.’

²¹ Namon om uyawurei uyau, ‘omi wonboai wonnat nin ato tou mataui anitai,

²² ato wei waiyafotem wau on, fifi on arimon taman men inikirir, on taman inbikirir on arimon taman inarab.’

²³ Baise om uyawurei uyau, ‘Om taim giya momos men mat wonnanat on, omi men wonnat auriu.’

²⁴ On an rai wamatabir men wanai tamai aurin, aifan uyawurei on wakasonai.

²⁵ Namon on iyawurei watmatabir men bayu kafakakai ba wattobon mes.

²⁶ Wei waiyafotai wau, ‘Wei men wanan on. Wei tai giya momos mat on wanan, ato ambin mes on, men wanan aurin.

²⁷ Wei tamai ato nanaba iyawurei, ‘Omi wosagob yau awau Rachel on nanatu orot ruam mom itu.

²⁸ Tani on ikirireu nono. On rega an bobaitu tutuenis sisafefai, yabin on i nan nenei on men ait men.

²⁹ Omi ari atonio ba yau emon wonboseir ato aifan komasin aurin inmamatar on, omi yau yababan wobiteu ato on yababan emon inasbuniu, yabin yau on aiorokwar bag.’”

^30-31 Judah an dura ibotein iyau, “Au kavian, ato ari yau men fifi mat anmatabir men anan tamau aurin ato on an rai yau magiu initai ato fifi magin ininayou on arimon inarab. On taman on fifi inuaboai kwakwan bag a on iorokwar bag on mes wei atonio yababan wanbibitai on arimon inrabob.

³² Men on wat, yau fifi an yawas aurin on tamau aurin aumatan. Yau awur au, “Yau fifi men anboai anmatabir aurim, yau arimon au yawas tutufinai ubar anboai.”

³³ Au kavian, on mes karun abifefeyanim, yau on ari nin anama on fifi an efan anboai ani agirotiu, ato on eikirir tutuan mat sinmatabir sinan.

³⁴ Yau on fifi men bisiwui on anmatabir anan tamau aurin? Ambin bag! Yau men agogoi atonio komasin anitai innat tamau au tefan inag.”