Ann Bokwakwarin 4 - Ubir

Cain A Abel

¹ Adam awan Eve rus siyen ato jever inafot fifi orot ituai wabin iyor Cain. Jever iyau, “Yau BADA an baibaisai on fifi orot aituai.”

² On gibunai jever on Cain tain Abel ba ituai ato osi sirat gagamis simatar weie, Abel on sheep kaifarotin imatar ato Cain on masau bofefesotin imatar.

³ Wera fani sisawar gibunai Cain an masau emon bayu fani iboen inat BADA aurin sirifu ikutetai.

⁴ Baise Abel on an foro sheep sanasi abou boboun tani on iyasubun iweyab bios momos wat iboen inat. BADA on Abel a an sirifu ikutetai aurin on iyasisir,

⁵ baise Cain an sirifu ikutetai on BADA it men iyasisir. On mes Cain iyatatab kwakwan ato magin iwani.

⁶ Namon BADA on Cain aurin iyau, “Om aibo mes ebiyatatab? Om aibo mes magim iwani?

⁷ Om bobo obin wat unfofour on Yau arimon anibasitem. Baise om men bobo obis unfofour on bokomas on ebotitiwag iniragitem mes. Bokomas on egogoi bag inboem, baise om unfaskikin bokomas unbomerubai.”

⁸ Namon Cain on tain Abel aurin iyau, “Ot tagat tanai au masau.” On an werai osi masauai nan Cain imisir tain Abel irab iyasubun.

⁹ Namon BADA on Cain aurin iyau, “Om taim Abel on menan?” On iyafotai iyau, “Yau men asagob. Ato nin min yau au bobo taiu an kaifarai mes i?”

¹⁰ BADA iyau, “Om aifan uiyamai? Etatam om taim an tara on orot jever ba motob emon auriu eyoyor.

¹¹ Om taim uyasubun ato an tara on igaror isur motobai. On fasinai Yau audabim ato om arimon atonio motob emon on an faitanim ungat.

¹² Om atonio motobai masau unbobo on men arimon bayu yabin obin inyein on. Om arimon am mair ma ambin ato asir amui unidadanamim mom tafanam au engonai.”

¹³ Ato Cain on BADA aurin iyau, “Yau au baimaki ubiteu on gagamin bag men fofonin anboai on.

¹⁴ Om on ari atonio motob emon urukouwiu agat, ato arimon magim emon mat anob. Yau arimon tafanamai au goa ambin ato etai anidadanam, ato iyai iyafan ingatureu on arimon inasubunueu.”

¹⁵ Baise BADA on Cain iyawur iyau, “Ambin bag. Iyai iyafan om inasubun on arimon an garamin nimtereban ruam ba on tefanai nanaba animakiai.” Namon BADA on Cain usinai kukufot iyein onai iyai iyafan ingaturai on men inasubun.

¹⁶ On mes Cain on BADA magin emon igat inai Eden wera matan Nod tafanamai nan ima.

¹⁷ Cain awan rus siyen ato inafot natun orot Enoch ituai. On gibunai Cain on mafam gagamin iyoyonin min on natun fifi orot wabin Enoch on iwab seirai.

¹⁸ Enoch natun Irad irat, ato Irad on Mehujael taman, a Mehujael on Methushael taman a Methushael on Lamech taman.

¹⁹ Lamech on jever ruam iawanis, tani wabin Adah ato tani wabin Zillah,

²⁰ Adah natun orot Jabal ituai, on min iyabon ato guwi ai sima gogabur an bobaitu sibitues on osi tamas.

²¹ On tain on Jubal; on min iyabon ato tataf a orof sikwakwareren on osi tamas.

²² Zillah mat on natun orot Tubal-Cain ituai, on min baiyuyur ta, ta on agim bronze a agim iron ai iteteren. Tubal-Cain robun min Naamah.

²³ Lamech awawan ruam iyawures iyau, “Omi Adah a Zillah, rum tainam wonreben. Omi Lamech awawan au dura wontatam, yau orot ibigawudeu aurin on asubun a orot boboun kiyam ibiteu on asubun.

²⁴ Iyafan Cain inasubun on arimon baimaki ra nimtereban ruam inboai ato iyafan Lamech inasubun on arimon baimaki ra orot ton, orot ta aurin auyotoat an yayatan nimtereban ruam inboai (77).”

²⁵ Adam awan rus siyen men ato jever fifi tani ba ituai ato iwabai Seth, ato iyau, “God on fifi tani ba iteu Abel an efan irorog, yabin Cain tain iyasubun on mes.”

²⁶ Seth on eb natun orot irat ato iwabai Enosh. On an werai sabu sibosuruf BADA sikwakwafirai.