Ann Bokwakwarin 38 - Ubir

Judah Tamar Rus

¹ Wera fani sisawar gibunai Judah taitain tutuan ikirires ato inai orot wabin Hirah on rus sitama mes, on min Adullam mafam emon.

² On nan Judah on Canaan orot wabin Shua natun jeverei igaturai. On iawan ato rus siyen;

³ on jeverei inafot ato natun orot ituai wabin iyor Er.

⁴ Gibui on inafot men ato natun orot ituai wabin iyor Onan.

⁵ On min on fifi orot tani ba ituai wabin iyor Shelah. Ato Judah min Achzib nan imama nan fifi orot irat.

⁶ Judah on natun ainau orot wabin Er on awan irubin. On jeverei min wabin Tamar.

⁷ Baise Judah natun ainau orot Er on bobo komasis BADA matanai ifofour; on mes BADA on Er iyasubun irabob.

⁸ Namon Judah on Er tain orot Onan iyawur iyau, “Om enai tuam rabobin an kena rum wonen. Ot ati baifafaro iyau nanaba on tuam nanatun ambin inarab inan on tain giya orot on jever iniawan ato fifirig sinarat on tuan orot rabobin nanatun mes.”

⁹ Baise Onan isagob fifirig sinrarat on men arimon on nanatun on. On fasinai on tuan kena rus si yen on, an sareu motobai idedebur isusur onai on men fifi tani itarat tuan orot aurin on.

¹⁰ Onan bobo aifan ibiyamai on komasin BADA matanai, on mes BADA on Onan mat iyasubun irabob.

¹¹ Namon Judah rawan jever Tamar iyawur iyau, “Om unmatabir men unan tamam an goai nana kena unmama ato yau natu orot Shelah inarat gagamin inmatar.” On nanaba iyau yabin on iber, ari Shelah ba inarab ato tutuan sirarabob ba. On mes Tamar imatabir men inai taman an goai imama.

¹² Kwanda fani sisawar gibunai Judah awan, Shua natun jeverei on irabob. Judah on an roro wera isawar gibunai, on turan Hirah on min Adullam emon on rus sinai efan Timnah nan sabu on an sheep bubunis siyayaragen on itites mes.

¹³ Sabu fani Tamar siyawur on rawan orot Judah on enan au efan Timnah nan an sheep bubunis inyaragen mes.

¹⁴ Tamar on isagob nono Judah natun giyamomos Shelah on irat orot imatar ato men sitai iawan on. On mes on kena an baitakwakwaren usinai siyen on iboseseren ato beber ibo magin ikukum toun ibuniai. Ato on inai Enaim mafam an eta awanai nan imair imama. On eta kaitamom min on inai Timnah mafamai igat.

¹⁵ On an rai Judah ibib inat it on men isagob on yabin on magin ikukum on mes. On inos on eta eta an jever.

¹⁶ On aurin Judah irabon inai eta rebanai ato iyau, “Yau agogoi rut tanen.” Judah on men isagob on rawan jever. Tamar iyau, “Om rut tanen aurin on aifan wat arimon uniteu?”

¹⁷ On iyafotai iyau, “Yau au goat boboun etatar on aurim aniyafar.” Ato jever iyau, “Basit wat, ato om sawar tani uniteu on aumatan ba bisiwui an kakaifarai weie gibui goat uniyafar.”

¹⁸ Judah itetemai iyau, “Ato aifan egogoi anitem on aumatan ba bisimui inen?” Jever iyafotai iyau, “Om anjomui damud er wabim auman on a am tutuk on uniteu.” On mes Judah sawar iboen jever itai. Namon on rus siyen ato jever inafot.

¹⁹ Tamar inai au go, on magin beber iboseir ato an kena baitakwakwaren on iyoten men.

²⁰ On gibunai Judah on turan Hirah iyafarai goat boboun ibo inai jever ititai ato an garamin aumatan sawar ato bisinai siyen on itabo mes. Baise on jever men igaturai on.

²¹ Hirah on Enaim an orot fani nan on itetemis iyau, “Eta eta an jever nin eta rewanai imama on menan?” Osi siyafotai siyau, “Nin men eta eta an jever tani emama on.”

²² On mes Hirah imatabir men inai Judah aurin ato iyau, “Yau eta eta an jever men agaturai on. Ato orot on mafam emon on eb siyau, ‘Nin men eta eta an jever tani emama on.’”

²³ Namon Judah iyau, “Na eikirir, sawar aifan bisinai sen on bagun on ininoanai. Ot men tagogoi sabu sinikoboit sinsererit. Yau afourtobon atibaiyanai, baise om jever men ugaturai on.”

²⁴ Roke ton isawar gibunai, sabu fani on Judah siyawur siyau, “Om rawam jever Tamar on eta eta an jever ba fetag fetag orot mat siyen simimisir ato ari on inafot.” Judah dura wawaninai iyau, “Omi wobo wogat ato wairafai woter inaras inarab.”

²⁵ Osi Tamar sibo sigat ato dura iyafar rawan orot aurin iyau, “Yau on orot iyafan atonio osi sawar ebinoanai on emon on ai nafot. Omi woinateteyen tait, iyafan an sawar, damud wab auman a tutuk.”

²⁶ Judah sawar iten isagob ato iyau, “On on bobo obin iyamai, yabin yau dura aifan au on men aiyamai, natu orot Shelah men aitai iawan, ato Judah men gibui rus siyen.

²⁷ On an wera inat Tamar itatoub mes on osi sigaturai on arimon fifirig orot sisiru sinarat.

²⁸ On koun igigiyai usibaban gagamin iboai an werai on fifi tani iman ainau iyotet igat ato baitotoubis an jever on fifi iman ibo uram mururinai iyous ato iyau, “Atonio on ainau irat.”

²⁹ Baise on iman itein irui men ato tain giya orot on inau irat, on mes baitotoubis an jever iyau, “Om ato nanaba toum am eta uwawar ugat!” ato on iwabai Perez.

³⁰ Gibui on tuan imanai uram mururin auman irat ato iwabai Zerah.