Ann Bokwakwarin 34 - Ubir

Dinah Aurin Bobo Komasin Sifour

¹ Ra tani Jacob a Leah rus natus jeverei wabin Dinah on inai Canaan jever itfasiues mes.

² On an werai orot wabin Hamor on Hivi dam emon ato on min tafanam an aiwab orot imama. On natun orot wabin on Shechem on Dinah it igogoiai ato irous aurin bobo komasin ifour ikafotai.

³ Shechem on Dinah it on momogin fafa. On mes on nunuan tutufinai inuaboai a on ifourtobon dura obis wat on jeverei aurin ibikakafun nunuan itboai mes.

⁴ On mes Shechem on taman Hamor iyawur iyau, “Bab yau agogoi atonio jeverei Dinah unboai ato yau on aniawan.”

⁵ On gibunai Jacob isagob Shechem on natun jeverei aurin bobo komasin ifour. Baise on nanatun orot engon sigat sinai asi bobaitu sikakaifares on mes Jacob on men dura aifan tani ikakafun ato imousin sitmatabir sitnat au go weie dura itikakafun.

⁶ Shechem taman Hamor on igat inai Jacob rus sitikakafun mes.

⁷ On werai Jacob nanatun bobo isawar simatabir men sinat on dura sitatam Shechem on osi robus Dinah aurin bobo komasin ifour ikafotai. Osi nunuas iyababan ato siyatatab kwakwan yabin Shechem ato Jacob natun jeverei aurin yawas komasin ifofour on Israel amonai on mamai gagamin ato on bobo nanaba on men itmatar.

⁸ Baise Hamor on Jacob nanatun mat iyawures iyau, “Yau natu orot Shechem on nunuan tutufinai Dinah egogoai, karun, abifefeyanim, jeverei woitai iniawan.

⁹ Ot dura bo baibasit taniyamai ato wei on omi ami jeverei waniawanis ato omi on eb wei ai jeverig woniawanis.

¹⁰ Ato omi wei ai tafanamai mat tanamair tanama ato tafanam on ruruseren omi aurim nan wonama, wonabib a motob wonabo sininoanim.”

¹¹ Namon Shechem on Dinah taman a rorobun auris iyau, “Omi ami ya obin on woiteu ato yau arimon aifan ami gogoi on aniyamai.

¹² Omi jeverei woniteu aniawan on ato wonawureu aifan siwar wogogoi on anitem. Mat kekes an rat menan fofonin on wonawureu; yau arimon an baiyan mamaba woyeyeinin on nanaba anibaiyan.”

¹³ Ato Jacob nanatun on Hamor natun Shechem rus auris on men dura bagai siyafotes on. Osi sisosoufis yabin Shechem on osi robus Dinah aurin bobo komasin ifour ikafotai.

¹⁴ Osi siyawur siyau, “Wei orot ato men siaskibubuai on men robui wanitai iniawan on. On arimon wei auri on mamai gagamin bag.

¹⁵ Wei eta kaitamomai wat nan baibasit wanitem. Omi ami orot engon woniaskibubues wonnat wei ba wonmatar.

¹⁶ Namon wei arimon wanibasitem wei omi ami jeverei waniawanis ato omi on eb wei ai jeverig woniawanis a mat omi amomui wanamair wanama ato mat dam kaitamom tanmatar.

¹⁷ Baise dura ato askibubu aurin wau on men wonbibasitai on, wei arimon jeverei wanboai wanan.”

¹⁸ Hamor natun Shechem rus atonio dura sitatam on sibasitai.

¹⁹ Shechem on ra kaita inai ato siaskibubuai, yabin on Jacob natun jeverei on inuaboai kwakwan. Shechem min wabin on gagamin an dam warar amosi.

²⁰ On mes Hamor natun Shechem rus sinai asi mafam gagamin an furi awanai nan on sabu engon auris sikakafun.

²¹ Osi siyawures siyau, “Atonio osi orot on sabu obis tanikirires nin tafanamai mat tanama ato amonai sinama sinitotobon. Tafanam on irat kwakwan fofonin osi mat auris. Ot osi nanatus jeverig taniawanis ato osi mat ot nanatut jeverig siniawanis.

²² Baise atonio bobo kaitamom aurin on tanibasit on arimon atonio sabu mat engon kaitenei tanama. On min ot orot engon tutufin siniaskibubuet tannat osi ba tanmatar.

²³ Ot ati baibasit wat on tanites ato asi bobaitu a asi sawar engon on ot sininoanit ato sanati sinamair sinama.”

²⁴ Sabu engon tutufin sinat Hamor natun Shechem rus asi dura sitatan on engon sibasit, ato orot engon on mafam gagamin amonai on siaskibubues.

²⁵ Ra ton isawar gibunai, orot engon sibiaskibubues on gawud auman simama, Jacob nanatun orot ruam, Simeon a Levi, osi min Dinah rorobun bag, asi seri siboen ato sinai mafam gagaminai sunub sirui sisafures mom ato orot engon siyasubunues.

²⁶ Osi Hamor natun Shechem rus mat seriai siyasubunues. Namon osi Dinah Shechem an goa emon sibo ato sigat sinai.

²⁷ On an rai Simeon a Levi sabu siyasubunues isawar gibunai, Jacob nanatun orot fani on engon sinat mafam gagamin amonai gugu engon siboen yabin robus Dinah aurin bobo komasin sibiyamai sikakafotai aurin on an soi sibo.

²⁸ On mes osi ainauan gigiawan on ato mafam gagamin amonai a kounai nan sheep, cow a donkey nan simama on engon siboen.

²⁹ Osi on sawar asi baiyas gagamis, jever fifi engon sifatumes, asi buder a asi goa amonai sawar siyen on engon siboen mat sinai.

³⁰ Namon Jacob on Simeon a Levi rus iyawures iyau, “Omi on bit gagamin bag on wobo wonat auriu yau wabiu woikomasai. Omi on bobo wobiyamai on Canaan sabu a Perizz sabu engon nin tafanamai semama on arimon yau sinisisiweiiu. Ot sabu men sigaraba on ato osi fofonin engon sinikaita sinnat siniragiteu on, yau au dam warar mat fofonin engon sinasubunuet insawar.

³¹ Baise osi ainauan gigiawan on siyafotai siyau, “Wei men fofonin robui wanikirir on nanaba aurin sinafour eta eta an jever ba.”